專訪丹尼士‧艾雲 傳奇襲港
text – Lok（ig：loklokb1021） photo – Rover
6度訪港
雖然我係1個記者，但對於艾雲呢種神枱級嘅legend，真係冇諗過有機會見到，點知上星期馬會舉行「同心同步同樂日」大型嘉年華，請到艾雲現身香江，雖然時間緊逼，但作為1個曼迷，唔係唔去捉佢問幾句吓話？
N：《新Monday》 D：Denis Irwin
N：今次係第幾次嚟香港？對香港足球有咩睇法？
D：「其實今次已經係我第6次訪港，當我重係現伇足球員時就已經訪港兩次，退休之後都嚟過3次。雖然我對香港嘅足球接觸唔多，但我可以睇得出香港嘅青少年，不論男女都對足球有一份熱愛。我年紀開始大，體能冇以前咁好，但都好高興可以同香港嘅青少年互相交流。」
N：香港對足球嘅support比較少，點樣可以提升青少年嘅水準？
D：「雖然香港嘅足球設備比外國少，但我認為咁樣唔會影響小朋友對足球嘅熱情。因為足球係一項非常簡單嘅運動，只要有一個足球，就可以做到所有訓練。而且足球唔單只帶俾佢哋快樂，同時重可以促進人同人之間嘅溝通、社交能力、團隊精神，對小朋友將來嘅發展好有幫助。」
N：作為一個後衛，你認為現今世上邊支球隊嘅防守能力最好？
D：「我認為巴塞隆拿係目前擁有最佳防守能力嘅球會，他們嘅後衛技術好好，善於喺防守嘅同時策劃更多進攻。令球隊可以即時轉變形勢。」
N：點睇今年曼聯喺英超嘅前景？
D：「曼聯早前對熱刺同利物浦時都表現出色，不過未來將會有連場硬仗，好似對戰維拉、曼城同車路士都不容有失。其實今季曼聯嘅陣容已經有進步，有信心球隊可以打入英超前4，再戰歐聯。不過今年人事變動好大，我理解法卡奧未必喺曼聯得到想要嘅發展，但呢啲係領隊雲高爾嘅決定，當然我好希望門將迪基亞可以留隊，最重要一點，我認為球隊需要於每場比賽後檢討球員表現同策略，先可以喺未來嘅比賽中發揮最佳狀態。」
