風繼續吹 Dyson Pure Cool空氣淨化風扇

風繼續吹 Dyson Pure Cool空氣淨化風扇


作為當今最具前瞻性嘅科技產品公司,Dyson有咩新動向都值得大家留意。上月喺日本就率先公布最新產品Dyson Pure Cool,1部將空氣過濾結合自家Air Multiplifer(氣流倍增器)技術嘅風扇。發布會上,工程師更示範點樣喺幾秒之內,將白煙過濾變成透明,再轉成強風吹出,效果非常神奇。
今次我哋率先實物到手,試到呢部預計5月先見街嘅Pure Cool。更趁機會再越洋問問創辦人James Dyson各種科技問題,兼且獨家請到Dyson設計工程師為我哋親手繪出Pure Cool幾個注目位。想知呢件嘢有咩咁勁?點解要再造風扇?傳聞中嘅自動吸塵機械人Dyson 360 Eye又點解遲遲未出?即睇!

text – Nam photo – Billy、網上圖片 model – Rose [email protected] Models venue – Outofstock

spec.
重量:3.58kg
尺寸:1018×196×196mm
售價:$5,580
查詢:2926 2300(捷成消費品)

http://www.youtube.com/watch?v=RgaXz-_0q6g

Dyson愛日本夠義氣
呢座Pure Cool,雖然官方表示非常機密,記者要簽好晒保密文件先可以報道,但如上文所講,其實早喺試機前1個禮拜,日本已經公布咗。咁大細超,原因係Dyson對日本確有情意結,話說當年James Dyson非常不滿坊間吸塵機嘅集塵袋設計,於是決心製作1部無須集塵袋嘅吸塵機,最後花咗足足5年時間,經歷5,127個prototypes嘅失敗(即平均每日做3個模型,癲!)先成功,但最後各大公司仍然覺得件嘢唔掂,冇人睬佢,於是四出叩門推薦,最終只有日本Apex肯幫佢推出市場,並改名為G-Force。當年係1986年,咁你話,Dyson大細超,係咪好正常先?

將Pure Cool過濾器放喺充滿白煙嘅透明箱度,影片可見唔駛5秒已完全過濾,非常之勁。(https://youtu.be/jw7dejPfNmA)
將Pure Cool過濾器放喺充滿白煙嘅透明箱度,影片可見唔駛5秒已完全過濾,非常之勁。
當年G-Force設計好low tech,幾條吸管外露勁似渣古,偏偏又係紅色,吸力快3倍?
當年G-Force設計好low tech,幾條吸管外露勁似渣古,偏偏又係紅色,吸力快3倍?
08年Issey Miyake請埋Dyson踩過天橋,做過1次Issey Miyake x Dyson時裝系列,而家回帶睇返都覺得好爆。
08年Issey Miyake請埋Dyson踩過天橋,做過1次Issey Miyake x Dyson時裝系列,而家回帶睇返都覺得好爆。

301

空氣過濾連風扇
一般空氣清新機可以擋到PM2.5(2.5微米)嘅微細懸浮粒子,已經足夠抑制花粉、霉菌等17種過敏原,Pure Cool更加用咗新設計嘅專利濾網,可以過濾到空氣中99.95%嘅PM0.1微塵,加上本身強勁嘅氣流倍增風扇技術,一站式設計可以話無敵,難怪白煙都可以過濾到變透明。而且更換filter亦好簡單,model都做到,過程唔使1分鐘,一貫Dyson式乾淨俐落。所以咪睇Pure Cool望落同以前冇乜分別,其實陣風吹出嚟都清新啲。

今次產品最大秘密,就係呢個Dyson 360度玻璃HEPA濾網,可成個拎起更換,據知亦係Dyson首個需要定時替換嘅產品,價錢未知,估計會係4至5百蚊內。
今次產品最大秘密,就係呢個Dyson 360度玻璃HEPA濾網,可成個拎起更換,據知亦係Dyson首個需要定時替換嘅產品,價錢未知,估計會係4至500蚊內。

濾網可用1年
Pure Cool基本上都屬於風扇(空氣倍增器)系列嘅款式,由於底座要加入濾網,令以往嘅進風路線需要重新設計。另外,機身亦因此變大,但出奇地仍然維持到以往咁輕。玻璃HEPA濾網由1.1平方米並摺疊254次嘅玻璃纖維造成,據知攤平後比1隻長頸鹿更高。雖然濾網需要更換,但Pure Cool可用時間長達1年(以每日開12小時計算),相比起普通空氣清新機平均2至3個月清洗更換,壽命算非常之長。

由濾網望入去可以睇到濾網折疊嘅狀態,折疊次數原來都經過無數實試,太多會令風力降低,太少又做唔到強勁過濾功能。
由濾網望入去可以睇到濾網摺疊嘅狀態,摺疊次數原來都經過無數實試,太多會令風力降低,太少又做唔到過濾功能。
呢個混流葉輪佔機身位置超過50%,因此高速運轉時風力仍然驚人,絕對可媲美有扇葉嘅風扇。
呢個混流葉輪佔機身位置超過50%,因此高速運轉時風力仍然驚人,絕對可媲美有扇葉嘅風扇。
Pure Cool已經拎咗英國噪音控制協會(Noise Abatement Society)嘅靜音認證標誌(Quiet Mark),低速運作時近乎冇聲咁滯。
Pure Cool已經拎咗英國噪音控制協會(Noise Abatement Society)嘅靜音認證標誌(Quiet Mark),低速運作時近乎冇聲咁滯。
好多人唔知所有Dyson風扇頂同遙控器都有磁石,可以直接吸喺機頂唔怕唔見。
所有Dyson風扇頂同遙控器都有磁石,可以直接吸喺機頂唔怕唔見。

首度曝光 真跡解構注目位
我哋冇辦法率先飛去日本,帶讀者齊齊睇Pure Cool嘅現場發布,但就誠意邀請咗Dyson設計工程師Clement Christmann,公開佢親筆畫嘅Pure Cool注目位,順便可以睇到今次設計嘅布局。呢幾張鬼罕手繪真跡,只俾《新Monday》,日後都冇其他地方睇到。講到底,出色嘅產品背後,最值錢嗰part就係設計概念。

設計師用呢張圖簡單解釋Pure Cool運作原理,下面玻璃HEPA濾網吸入空氣,上面嘅Air Multiplifer就照舊送風。
設計師用呢張圖簡單解釋Pure Cool運作原理,下面玻璃HEPA濾網吸入空氣,上面嘅Air Multiplifer就照舊送風。
入面嘅混流葉輪,會將空氣從風扇底部吸入機身。
入面嘅混流葉輪,會將空氣從風扇底部吸入機身。
隨後,空氣穿過Dyson專利嘅360玻璃HEPA濾網進行過濾,淨化後嘅空氣就會經過機身內部環狀氣流槽加速。
隨後,空氣穿過Dyson專利嘅360玻璃HEPA濾網進行過濾,淨化後嘅空氣就會經過機身內部環狀氣流槽加速。
另外C.Christmann亦分享咗遙控設計圖,為咗要穩定地擺放喺風扇頂部,所以尺寸方面都有嚴格要求。
另外C.Christmann亦分享咗遙控設計圖,為咗要穩定地擺放喺風扇頂部,所以尺寸方面都有嚴格要求。
Pure Cool最主要就係下面呢個底坐,體積細細,但已經有先進嘅新技術。
Pure Cool最主要就係下面呢個底座,體積細細,但已經有先進嘅新技術。
氣流由窄縫導出,透過弧形翼面表面進行加速,再帶動埋其他氣流一齊推送,呢個就係Air Multiplifer技術。
氣流由窄縫導出,透過弧形翼面表面進行加速,再帶動埋其他氣流一齊推送,呢個就係Air Multiplifer技術。

crose

與James Dyson講人話
James Dyson已經係神級工程師,每次Dyson有新產品都令人好奇,設計背後到底為乜?有乜咁巴閉要開發咁耐?不過講到最好奇,反而係由上年講到今年,有埋產品圖睇,都仍然未有發售時間嘅自動吸塵機械人360 Eye。趁又有機會可以「與Dyson對話」,當然要問問神,求神講人話。

N:《新Monday》
J:James Dyson

N:點解會設計Pure Cool?
J:空氣污染係世界性嘅問題,大城市不斷擴大發展,令亞洲面對嚴峻嘅污染問題,香港亦冇例外。呢啲受到嚴重污染嘅城市,充滿有毒嘅粒子,佢哋可導致呼吸道感染同慢性疾病,粒子最終會停留喺室內,因為佢哋再無處可逃,令室內環境比室外更污染。現時市面上嘅空氣清新機,未能有效率咁捕捉超微粒,只有單一功能,體積龐大而且好重。所以Dyson嘅工程團隊就反問我哋能否搵出更好嘅方法去解決問題,解決問題正是我哋嘅使命。

N:Pure Cool用咗最少2年時間研究開發,當中遇到咩難處?
J:好多人都談及PM2.5(2.5微米),但Dyson嘅微生物學精英俾我睇一啲比2.5微米更小嘅粒子研究報告。粒子愈小對健康影響愈大,往往係肉眼睇唔到嘅嘢對我哋嘅影響最大。所以我要挑戰Dyson工程師,我鍾意咁,因為選擇1條簡單嘅路,或照住前人所走嘅路,都係好容易同沉悶,更唔會帶我哋走向新科技,要研發出1部能過濾99.95%小至0.1微米嘅空氣淨化機,0.1微米大概係1粒病毒嘅體積。設計出1個高效能嘅過濾網相當重要,每1步都需要深思熟慮,單單係選材就用咗一段時間,最終揀選過濾效能出眾嘅硼矽超細纖維。然後,工程師需要不斷製作實驗模型嚟測試最有效率嘅摺疊數量,好小心將氣流同過濾效果作比較。太多嘅摺疊數量會令空氣難以穿過,太少摺疊次數則令有害粒子輕易穿過重回房間。氣流同過濾效果需要1個微妙嘅平衡。

N:因為你對吸塵機、風扇不滿,於是改變咗佢哋,咁下1件你認為非改不可嘅產品係咩呢?
J:我係工程師,而工程師嘅一生都要永無休止咁對周遭嘅事物產生不滿。我經常睇到生活中一啲我哋習以為常嘅物件,再問自己件嘢有冇更好嘅方法可以去運作。我最近就挑戰Dyson嘅工程師,去重新設計1支筆,佢哋以往一直都係用塑膠嘅走珠筆,然後佢哋就着手設計1支不銹鋼原子筆,利用簡單嘅幾何理論,經過50個實驗模型之後就成功咗。我好幸運能夠跟一班才華洋溢,又對解決問題充滿熱誠嘅工程師一齊工作,我每日都被佢哋大膽同有見地嘅想法所啟發。Dyson即將會推出好多全新嘅科技,但現時重需要保持神秘。

N:我睇到好多Dyson嘅模仿、抄襲品充斥市場,你有咩感覺?
J:研究、開發1個新概念係需要時間、金錢同努力,而且永遠唔可以保證最終能夠獲得成功,當選擇創新同改良嘅同時,我哋亦要承受一定嘅風險。冇投放任何努力,而只會抄襲嘅人同事係冇道德嘅。呢啲都係Dyson能站喺同行之首嘅理念原因,我哋有無數嘅工程師帶領Dyson走進全新嘅科技年代,所以我哋先能夠有如此成就同新思維。縱容抄襲者只會令科技不能進步,因為嗰啲坐享其成嘅人令發明創新變得毫無意義。

N:非常期待360 Eye,早已曝光,但聞說今年內都唔會推出,而近期Dyson對電池公司Sakti3進行投資……兩者有關連嗎?

J:日本係高科技產品嘅基地,包括吸塵機械人。我哋現正喺日本嘅家庭進行Dyson 360 Eye測試,本年將會喺日本發售,其他國家將緊隨其後。360 Eye擁有1項與別不同嘅技術,曾令研發過程碰到唔少挫折。不過已經整裝待發,不久將來就會將智能嘅除塵科技帶到大家嘅屋企。360 Eye結合咗世界上其中1個最小同最快嘅摩打、氣旋科技、坦克屐帶同獨特嘅環境視野,連世上最聰明嘅工程師都被難倒。至於Sakti3,係個長遠嘅投資,將唔會出現喺360 Eye上。

N:同樣係提出問題、解決問題,再以新科技打破舊有觀點,已有人將你同Steve Jobs相提並論,你有咩感想?

J:能夠同世界上嘅巨頭相提並論係我嘅榮幸,但我始終專注發明,為一眾才華洋溢嘅工程師研究新挑戰。對於別人俾我嘅稱呼,順其自然吧。

N:似乎冇乜訪問提及你嘅生活,你空閒時鍾意做咩呀?
J:我鍾意睇英國欖球隊Bath,呢個地方係Dyson嘅起點,當年只有2位剛畢業嘅工程師同自己,研發咗世界第1部氣旋吸塵機(G-Force)。當我唔使製作實驗模型時,我就會去附近睇欖球賽,我已經係Bath欖球隊嘅粉絲30年,多年來一直睇住球隊蛻變。佢哋相信年輕人,培養冇經驗嘅人進入團隊,呢啲正是Dyson訓練工程師嘅方法。今季Dyson亦跟Bath欖球隊結盟,培育新一代年輕人,佢哋好有可能成為聯賽冠軍。

N:你有咩飲食習慣?鍾意邊個國家?
J:我唔會食太多肉,但又唔可以完全冇肉。另外,要我放棄飲茶係件好痛苦嘅事,1杯茉莉花茶同朱古力薑餅係我嘅最愛,尤其係當我喺實驗工作到好攰嗰陣。國家方面,我對日本有份情意結,因為30年前我所發明嘅第1部以氣旋科技運作嘅吸塵機G-Force喺日本推出,同埋東京璀璨嘅夜景仍令我覺得好震撼。但我最愛嘅地方就係法國嘅普羅旺斯,夏天時,薰衣草同百里香嘅香氣比任何1個地方都更濃郁。

 

360 Eye連香港官網都有介紹,但實物似乎冇咁快可以推出。
360 Eye連香港官網都有介紹,但實物似乎冇咁快可以推出。

伸延閱讀

精雕細琢 Logitech MX Master

YOU MAY ALSO LIKE ...

There are 2 comments

Add yours
  1. 【家電界的賈伯斯】地方的媽媽都愛他,讓主婦、少女都神昏顛倒的 Dyson 創辦人 | TechOrange

    […] (圖:New Monday) […]

  2. 【家電界的賈伯斯】地方的媽媽都愛他,讓主婦、少女都神昏顛倒的 Dyson 創辦人 | 发头条

    […] (圖:New Monday) […]


Comments are closed.