美好的 鄭容和

text-Phoebe photo-Sun

反應好到癲咗
專輯名稱《One Fine Day》嘅由來，鄭容和解釋係因為專輯嘅歌同內容都好有one fine day感覺，而問到佢近來最美好嘅1天，鄭容和毫不考慮咁揀咗香港演唱會之日。首次推出個人音樂大碟，既要作曲、作詞，又要編曲兼搵啱嘅人去featuring，1日24小時真係夠用嗎?
「因為係大碟，唔想好急咁做，想慢慢去做，用最大誠意去做，第1次同前輩們合作，各自嘅音樂風格都好唔同，一齊作曲覺得自己學咗好多嘢。喺CNBLUE時，自己較少唱慢歌，所以今次solo時，試咗ballad，fans反應都唔錯，唱現場嗰陣，反應好到癲咗。（平日創作靈感嚟自邊度？）睇書、身邊朋友嘅事，其實多數都係好突然，瞓瞓下突然有靈感，就會用手電錄音，或者係突然諗到一啲詞語/生字，之後會創作番一啲歌詞去符合。遇上樽頸位嘅話，會馬上停低休息，因為喺咁嘅情況之下創作出嚟嘅作品，之後都一定會改，咁就冇咗本身嘅意思。」

操肌變打機
首次以個人身分喺韓國進行宣傳，鄭容和認為最唔慣係上音樂節目時，遇上新人歌手嚟打招呼，會唔識點反應，除此之外，一切都好自在。轉眼出道5年，除咗多咗個個人歌手身分之外，最大改變，佢話真係唔認老唔得。
「年紀，哈哈！真係老咗好多，返唔到轉頭……你問我有咩改變？當然有，好似出道時咩都唔怕，咩都想試，好有熱情。有膽量可以係優點，亦可以係缺點。（之前騷過嘅肌肉而家重有冇?）呢排完全冇做過運動，所以好需要去做，哎……為咗今年夏天⋯⋯其實都重有，但得番少少，要再練下，而家嗰啲已經唔係你講嗰啲肌肉，哈哈！其實本身都鍾意踩單車，但韓國冬天真係太凍，所以唔想出門，到而家天氣好，又發現條軚已經冇晒氣，加上之前買咗PlayStation，而家成日打機。」

開騷好分裂
首次以個人身分喺亞洲博覽館開騷，鄭容和high足兩小時，冇林俊傑（JJ）合唱嘅〈Checkmate〉，才子1人分飾兩角，唱完韓文再唱中文，之後突然笠上假髮戴黑超，原來係要唱Oasis嘅〈Supersonic〉同Bon Jovi嘅〈You Give Love A Bad Name〉，誠意可以有幾盡？才子一口氣以廣東話表示：「大家好，我係鄭容和。我係你男神，你係我女神。我好開心呀！今次出咗第1張個人專輯，重有第1次喺香港開個人演唱會，因為有你哋嘅支持。」雖然唔算講得好標準，但一定冧死粉絲。以為才子會含蓄？唔係囉，演唱會上照樣聽到「I love you」甚至係「you are my energy」。