Staycation又出事！港女帶刺蝟去酒店泳池打卡 IG發文投訴酒店 網民：原來咁有來頭

撰文：海月｜圖片：Lihkg

Staycation又出事！港女帶刺蝟去酒店泳池打卡 IG發文投訴酒店 網民：原來咁有來頭

家下好多人都鍾意次酒店Staycation，不過Staycation就引起爭議不斷，繼之前放煙花、搗亂酒店房、20人酒店房內慶祝生日後，今次就有港女Staycation帶刺蝟去酒店泳池打卡引起網民熱話。一名港女日前帶所飼養嘅刺蝟入住位於旺角嘅康得思酒店，當佢帶刺蝟到泳池打卡時，就被其他住客投訴，希望佢收起寵物。

雖然港女當時應從勸喻收起刺蝟，不過之後就喺Instagram限時動態以英文反映事件，指自己只係放刺蝟外出幾分鐘，又強調酒店職員並無告知刺蝟不淮進入酒店。當中更包含粗口字眼，直斥不能接受刺蝟嘅人「嘔心」，並標記康得思Instagram帳戶及地點。

之後有前酒店業人士得知事件後看不過眼，決定放上連登公審，先貼出康得思酒店的政策：列明除導盲犬，任何寵物不得進入酒店範圍。及後更有網民到港女嘅Instagram留言指責，不過港女就回應自己「付了錢，不需要研究酒店政策」。

有網民留言：想人尊重你，唔該學下尊重人。酒店係服務性行業，唔代表你比錢就咩都得，比番少少質素啦。亦有網民認為如果刺蝟喺泳池走失，不但麻煩酒店員工，亦有可能整親其他住客，直指「到底咩家庭先會養到呢啲是非不分自我中心嘅人」，更取笑對方嘅英文能力，睇到好尷尬「呢位女士英文應該係小學程度」、「用廣東話去解讀成件事好順」、「唔知考緊我廣東話定英文」等。

最後港女再喺Instagram限時動態以中文回應事件，指康得思酒店處理方式有問題，員工既唔了解公司政策，令佢得知錯誤資訊。因為佢表示曾帶刺蝟到同一集團酒店亦無出現問題，因此以為可以即樣帶刺蝟入住。後來被人投訴後深感到不滿，已立即退房。不過之後網民亦對港女作出「起底」，表示跟中央人士關係密切，直言「唔怪得咁大牌，原來咁有來頭！」。