運動3月

Blogger

廣告

【女生專屬byT.LUM】(IG: Teresa_Lum)

運動女生之間存在一句格言: 「冬天不努力,春天徒傷悲。」意思指冬天不努力做運動,春天面對脂肪的出現,便會傷心欲絕。但女仔嘛,往往唔係最後關頭都冇最大嘅決心。想喺夏天無憂無慮地着番背心短褲,喺沙灘自信地展示腹肌馬甲線,3、4月係關鍵時刻。喺呢兩個月,我都不知不覺為自己安排咗唔同運動,為了夏天,拼了!

跑得多,都想試下其他新運動,鍛煉下其他肌肉線條。但女生們試玩,其實運動前多數都會出現以下OS:

「我唔識㗎,唔得㗎啦。」——冇人一出世咩都識,所以唔識係正常。老土啲講句,學海無涯。
「被人見到我出醜,好丟臉。」——我哋又唔係咩大明星、萬人迷,其實你身邊嘅人應該都好專注咁做緊運動,真係冇咩人會咁留意你做緊咩。

「會好易受傷㗎。」——有難度動作,當然有危險性,但只要聽教練講解,其實受傷程度都唔高。
「好難呀,我驚做唔到。」——如果連做運動嘅少少挑戰都驚,人生其他難關點算?
換個角度去諗,可能好輕易就幫到自己踏出comfort zone。所以話明新挑戰,當然今次唔講跑步。3月呢兩個星期,分別透過NTC Week試咗Aerial Yoga同跳彈床。

而喺上星期,我亦完成咗對於自己1年1度嘅大挑戰——Outward Bound Adventure Race。4人1隊,喺短短13公里內,要完成跑步、行山、野外定向、游水、獨木舟、跳船、爬石、過水澗等等,完全係考驗體力腦力嘅大挑戰。雖然已經係第3年玩呢項賽事,但每次體驗都好唔同,每次完成賽事都覺得自己又進步咗一大步。回想起來,所有嘢都已經唔係難事。

運動就係咁神奇,佢可以令到你嘗試、令到你進步、令到你更認識自己,同時令到你對事情睇法有所不同。女生們,唔好俾自己太多理由,做運動係唔需要咁多猶豫,讓運動令到我哋成為1個更好嘅自己!

T.LUM

1個鍾意做運動嘅女生。做運動好簡單,只要鍾意嘅、喜歡嘅、想試想做嘅,就可以行動。