宣萱破紀錄第26次被脅持! 盤點《使徒行者2》必睇位

流行娛樂

廣告

非常時期,唔少人都 WFH,第二日唔使晨咁早返工,自然有藉口畀自己深夜煲劇啦!緊接TVB《九五至尊》後,今個星期開始播出警匪臥底劇《使徒行者2 》,第二輯並非第一輯故事嘅續集,而係前傳,冇咗「爆Seed 」林峯同「釘姐 」佘詩曼都好正路,不過換上周柏豪、袁偉豪、黃翠如、連詩雅等後輩,似乎失色咗唔少喎!好彩仲有元祖級人物「卓Sir 」苗僑偉、「歡喜哥」許紹雄等核心,再加埋演藝生涯第二十六次被挾持嘅宣萱、奸出國際嘅陳豪,總算挽回不少分數!

撰文、圖片:東方新地丨原文刊於:東方新地丨編輯:白子

《使徒行者》未解謎團一籮籮

林峯、佘詩曼先後離開TVB,前傳《使徒行者2 》「順理成章」冇咗「爆Seed 」、「 釘姐 」。回吓帶先,第一輯故事嘅大結局,「 歡喜哥 」許紹雄驚現警方臥底file內,點知被神秘人刪去資料……而第二輯嘅主軸劇情,刑事情報科(CIB)「 卓 Sir 」苗僑偉前往泰國搗破跨國毒品交易時,被當地黑幫埋伏,導致五名警方臥底殉職⋯⋯其實自從「 臥底聯絡員黎 Sir 」張兆輝死後,「 公海 」到底仲有幾多位警方嘅「 針 」,一直成謎!有幾多人因為自身安全而變節為黑警?又有邊個因為利益而成雙面臥底?事有蹊蹺,卓 Sir 再次踏上尋找臥底嘅生涯。

宣萱,TVB,使徒行者2
「歡喜哥」許紹雄創立黑幫「福和」,暗戰「長興」,其得力頭馬「樂少」周柏豪涉及多宗黑警被殺案。
宣萱,TVB,使徒行者2
宣萱係高級會所合夥人兼陳豪女友,最後難逃被挾持嘅演藝宿命。而卓Sir苗僑偉為查案而向宣萱埋手,結果惹上亞洲犯罪首腦陳豪。
宣萱,TVB,使徒行者2
連詩雅係卓 Sir 嘅下屬,被委派混入黑社會做臥底,取得證據後發生氣爆誤當意外身亡,實際上被炸至重傷。
麥明詩因臥底資料被刪除,而加入「 民間刑事情報科 」,任務係查探警隊內嘅黑警名單。「 臥底聯絡員黎 Sir 」張兆輝死後,「 公海 」還有多少警方的「 針 」,一直成謎。
麥明詩因臥底資料被刪除,而加入「 民間刑事情報科 」,任務係查探警隊內嘅黑警名單。「 臥底聯絡員黎 Sir 」張兆輝死後,「 公海 」還有多少警方的「 針 」,一直成謎。

宣萱破紀錄第26次被脅持

今次故事背景推向國際化嘅毒品交易網,陳豪繼《天與地》、《心戰》後第三度飾演反派,佢係社團「 長興 」嘅龍頭、亞洲毒品總代理,為揪出犯罪組織內嘅警方臥底而大開殺戒之餘,仲有時間同苗僑偉爭女(宣萱)㖭!最搞笑嘅係自94年《 餐餐有宋家 》以來,每逢宣萱參演嘅 TVB 古裝劇、時裝劇,其角色全被綁架,呢位「 人質之后 」今次會否因為「 主角光環 」而安然無恙呢?

宣萱,TVB,使徒行者2
劇中嘅終極反派陳豪,犯罪版圖遍及亞洲,係卓 Sir嘅天敵。
宣萱,TVB,使徒行者2
雖則係犯罪大魔頭,但陳豪為女死為女亡,最終為救宣萱而被歡喜哥連開多槍擊斃。

黃翠如、周柏豪、袁偉豪玩三角戀

劇中鐵膽「 歡喜哥 」許紹雄絕對係《 使徒 》系列最受歡迎嘅人物,繼續秉承香港人打不死精神。佢做臥底喺「 長興 」搜集犯罪證據,卻導致太太死亡。 復職無望,惟有將錯就錯,另起爐灶做大佬,創立黑幫「 福和 」,勢要將「 長興 」連根拔起!為生存、復仇,游走黑白兩道,笑臉下隱藏盤算與計謀,將由得力新貴「 樂少 」周柏豪幫助下操作與執行。

宣萱,TVB,使徒行者2
專責毒品生意嘅長興「 天堂哥 」袁偉豪,情傾「 妹頭 」黃翠如。
宣萱,TVB,使徒行者2
袁偉豪、黃翠如鬥氣場面,頗有當年「 爆 Seed 」同「 釘姐 」互寸互窒打情罵俏feel。

周柏豪係《使徒行者2 》嘅新人物之一,同「長興」嘅「天堂哥」袁偉豪同時迷上「 妹頭 」黃翠如 ,男女鬥氣場面,頗有當年「 爆 Seed 」同「 釘姐 」互窒對方嘅味道。而呢段三角戀中,各有不可告人的秘密。此外,呢齣劇係周柏豪同連詩雅首次參演嘅TVB劇集,前者牽涉入多宗黑警被謀殺案,後者作為主要角色之一,開場就被炸死,呢個當然係伏線啦,而所有陰謀都再次指向「卓Sir 」苗僑偉……節奏明快嘅《使徒行者2 》,訊息量大,真係睇少集都唔掂呀!

宣萱,TVB,使徒行者2
黃翠如係警方委派進入黑幫調查嘅「 針 」,其後同「 福和 」周柏豪互生情愫。

過億製作費係點使?

由港中合資嘅《使徒行者2 》,據知製作費過億,賣點之一就係全實景拍攝。第一輯嘅「港味」茶餐廳、油麻地警局等實景經常出現,搭建嘅廠景有黑社會談判個倉庫以及「釘姐」嘅按摩房等。而《使徒行者2 》則是一幅亞洲地圖,除在中國取景,還有航拍鏡頭下泰國曼谷、湄公河等大場面。而故事線不再局限於本地社團撕殺,人物設定方面,陳豪同宣萱呢對犯罪男女,一個係前美國海軍陸戰隊上尉,一個係英國軍情六處退役特工,係真正嘅國際大鱷。動作場面例如飛車追逐、槍戰等,採用大量場景轉換,透過多個鏡頭切換來鋪排驚險時刻。

宣萱,TVB,使徒行者2
劇組遠赴泰國拍攝,首集就見卓
Sir坐上小艇在泰國地標湄公河出
場。