29歲林秀怡解凍新節目分享置業經驗 男友助圓上車夢為入伙 做慳家格價妹

流行娛樂

廣告

父母離異從小與母親相依為命、母親腳傷生活重擔一直落在自己身上、年前耗盡40萬積蓄為癌母醫癌、去年更加因為口直心快慘被無綫雪藏,生活坎坷不過一直知足常樂孝順又慳儉的林秀怡總算捱出頭來!今個月終於從雪櫃重出生天擔任新節目《我要做業主》主持,更在節目中自爆多得導演男友Kevin畀首期,置入屯門新樓成功上車。新屋入伙在即,二人日前就拍住拖為新屋添置電器,一齊供樓一齊慳住買一齊迎接人生新一頁,兩口子目標一致的幸福有錢都買唔到。

撰文、圖片:東方新地丨原文刊於:東方新地丨編輯:白子

林秀怡視對方為結婚對象 望30歲前成婚

拍拖四年,林秀怡(Kirby)從Kevin由助理編導捱到升職做導演,Kevin就陪著林秀怡共度林母抗癌再從雪櫃重出生天。原來疫市之下,去年工作量大不如前,林秀怡還是選擇疫市出擊,與男友夾份買入樓價500萬的300呎屯門新樓。據悉自己份積蓄早於18年母親患病時耗盡,今次新樓一成約五十萬首期是來自男友,物業及持有人只寫上林秀怡一人。男友出首期、做埋擔保人、再送埋層樓到自己名下,難怪林秀怡感動之餘,亦直言早視對方為結婚對象,物業將會公一份婆一份一齊供,一年後收樓便會開始同居試婚。

林秀怡,TVB,我要做業主
男友梁啟政Kevin在無綫由低做起,由助理編導現升為導演,明年就滿30歲的林秀怡不諱言視對方為結婚對象,希望三十歲前成婚。
林秀怡,TVB,我要做業主
被雪一年,同友人合資的餐廳又因疫情令生意大跌,林秀怡都咬住牙關下去,捱完一關又一關,近日才有新節目出街,林秀怡在《我要做業主》分享首次置業經歷。
林秀怡,TVB,我要做業主
林秀怡自爆上車單位由男友付首期購入屯門掃管笏三百呎單位,佢話:「我唔介意畀人話靠男友,真係有個人肯畀我靠有咩唔好?我有好男友我自豪!」係恨死隔籬至真。
入行12年一直坎坷唔易過,林秀怡守得雲開榮升業主,日前就同負責畀首期將來一齊供的男友齊齊行 APM睇定入伙電器。
入行12年一直坎坷唔易過,林秀怡守得雲開榮升業主,日前就同負責畀首期將來一齊供的男友齊齊行 APM睇定入伙電器。
林秀怡,TVB,我要做業主
小兩口乘搭升降機直達商場高層,十指緊扣行勻幾間電器舖專攻家電。
林秀怡,TVB,我要做業主
指指點點有商有量一齊睇勻新屋必備的電視洗衣機和雪櫃,癡纏到攬埋一嚿。

拍拖四年仍如熱戀

雖則距離收樓日還有一段日子,不過搬新屋全屋傢俬電器要添置,睇啱款格得價嚟時間剛剛好,更是小兩口最佳過日辰拍拖節目。日前就見男友驅車、林秀怡坐副駕,一齊去到觀塘APM行電器舖。 離開停車場,二人目標一致電梯直上高層家電專區, 全程十指緊扣還整個倒在Kevin懷裡研究吓洗衣機性能、又打開個雪櫃睇吓容量;行完一轉有商有量格完價,對於心水家電價錢心目中大概有個譜,咁就放下心頭大石,又係黐實攬腰去睇商場水牌揀餐廳醫肚。拍足四年拖,感情竟然尚未降溫難捨難離猶如熱戀期,睇完家電醫埋肚,準備離開,臨開車時,二人互相對望再自動波湊個嘴仔埋來個深情一吻,呢種默契已經夠一生一世。

林秀怡,TVB,我要做業主
心水電器價位大概心裡有數,二人轉場搵食醫肚,林秀怡又係徹底投進男友懷裡睇商場水牌。
林秀怡,TVB,我要做業主
連體揀家電後上車準備離開,未開車先咀嘴,當年戀情曝光就係因為車廂熱吻,想不到拍拖四年仲有熱戀感覺,表達對對方的愛,無分時候。
林秀怡,TVB,我要做業主
八歲時父母離異、從小與母親相依為命,家住天水圍,18年林母患癌,孝順女林秀怡就二話不說拿出全副身家約四十萬為媽媽醫病,多年來貼身照顧,係圈中出名的孝順女。
林秀怡,TVB,我要做業主
母親抗癌期間,男友愛屋及烏車出車入陪覆診、幫執屋,熱心孝順又錫到Kirby燶,因此早被林母當正自己人。

關鍵詞
林秀怡tvb