金英光 絕世好男友

流行娛樂

廣告

要介紹金英金,可以用「《愛情雨》入面,允兒個師兄」,又或者「《Good Doctor》入面,暗戀病者家屬嗰個醫生,好高嗰個呢」。是的,因為喺《Pinocchio》之前,金英光雖然做過唔少高收視韓劇,但位置永遠都係企喺主角旁邊。《Pinocchio》雖然係第2男主角,但劇中飾演富二代嘅佢,對女主角朴信惠嘅長情同細心,確係叫人心動。咁現實中嘅佢,又係咩類型嘅男友呢?

text – Phoebe photo – Yuklocation – 帝苑酒店

單純ALL IN男
講到愛情,從影以嚟多數都係飾演暖男嘅金英光就話,自己只要遇上心儀對象,一定要all in!夠直接!咁咩類型嘅女仔會令佢瞓身呢?「特別指定邊類型又好似冇,當我同異性見面時,第1個感覺對我嚟講係最影響到我。所以如果遇上鍾意嘅對象,我係會all in自己嘅感情落去,對愛情絕對百分百,哈哈!小學嘅時候試過暗戀班長,佢係個讀書好叻嘅女仔,嗰時重問過老師可唔可以安排我哋一齊坐,哈,諗番都覺得好單純。」

辛苦晒記者
金英光曾經合作過嘅對手包括具荷拉、Dara、朴信惠、允兒,全部都係公認靚女,這些機會是否太令人葡萄?問到因《Pinocchio》而人氣急升,金英光就梗係開心啦。
「喺澳門拍攝完之後搭船嚟香港,一到步就有fans接,真係覺得好驚喜。劇中我係做記者,以呢個職業嚟演出嘅同時,我識咗好多以前唔知嘅嘢,平時剩係透過畫面去接受被報道嘅內容,為咗同大眾報道呢啲內容,原來真係要用好多時間同努力,記者們真係辛苦晒!」

hehe
同金宇彬、李秀赫一樣都係模特兒出身嘅金英光,閒時就會搵埋另外兩位長腿oppa敘舊,眼見金宇彬近年喺亞洲地區紅到發紫,身為老友,都戥佢高興嘅。
「宇彬係個好有型嘅男仔,又係個真正嘅男子漢,或者用男人中嘅男人去形容佢會更適合。不過,宇彬另一方面都好熱情,亦好正義,我諗呢個就係佢嘅魅力所在。(平時見面會做啲咩?)都係飲下嘢,講下自己同關心對方嘅近況,不過呢排太忙,見唔到佢。(咁你覺得自己魅力又係咩?)我?微笑!哈哈!講笑啫……其實我真係冇諗過自己有啲咩魅力,如果有機會我都想問下我嘅粉絲。」