龍珠都可以抗疫？！細數《龍珠》10大秘聞│買了球鞋再買玩具
撰文：Jessie│編輯：海月│圖片來源：龍珠、網上圖片
龍珠都可以抗疫？！細數《龍珠》10大秘聞
《龍珠》風靡幾代漫畫迷，不過就算你睇到爛熟，都未必知道下面嘅10大秘聞！
1. 最強戰鬥力角色？
戰鬥數值絕對係《龍珠》最偉大嘅設定。到底系列裏面邊個最好打，肯定係粉絲最感興趣嘅問題。如果唔計屈機嘅悟空比達合體人「格古達」（粉絲推測係25億），到底邊個最好打呢？
除咗原著漫畫同埋原創動畫入面有提及過戰鬥力數值外，鳥山明喺《龍珠大全集7》中亦記述咗一啲人物嘅戰鬥力數值，不過喺以下圖中全集嘅結尾亦有講，喺菲利篇之後啲角色戰鬥力數值已經大得無法推測。所以官方從來都冇公布過菲利篇之後嘅數值。如果喺網上睇到除此以外嘅數值，都唔係官方數據，只係粉絲推測。
不過呢，當年《少年jump》及《vjump》（集英社旗下雜誌），亦有記載過部分人物的戰鬥力，有一部分被《龍珠大全集7》收錄成為正式數值。
網上就有粉絲估計成個系列最好打嘅頭幾位：菲利阿哥古拉有4億7、真正超級撒亞人布羅利有14億、悟空超4有20億，重有劇場版中《復活之F》復活嘅菲利，官方話佢嘅戰鬥力有100,000,000,000,000,000,000！！！！你知唔知點讀？不過呢，都應該唔夠喺《神與神》中出現嘅破壞之神比魯斯打。
2. 鳥山明設定角色愛用食物名
呢樣真正忠粉應該好早發現，例如撒亞人日文係サイヤ人Saiyajin，Saiya喺日語中有蔬菜嘅意思，jin就係人，所以，如果直接按字面翻譯就係「蔬菜人」咁解。
幾乎所有《龍珠》內角色嘅名都用各種食物命名：
孫悟空嘅撒亞人名Kakarot，係carrot紅蘿蔔嘅諧音。
比達Vegeta，一睇就聯想到vegetable，即係蔬菜。
孫悟空哥哥拿迪斯Raditz，即係radish，都係蘿蔔嘅意思。
立巴Nappa，個名係嚟自napa-cabbage，即係大白菜。
地球人阿樂Yamcha，即係飲茶。
動物型地球人八戒Oolong，即係烏龍。
鶴仙人徒弟餃子Chiao-tzu。
3. 比達原來有個細佬？
身為撒亞王子嘅比達，個性驕傲好勝，但原來王子唔止得佢1個，佢重有個細佬。個樣同比達幾乎一樣，因為佢性格比較溫和，喺佢哋星球被毀滅後，冇成為菲利手下，而係移居咗去邊境行星平靜咁生活，佢唯一喺2008年嘅OVA《歸來！悟空與他的夥伴們》中出現過。
4. 比達其實係舞林高手
比達係個戰鬥狂就應該大家都知，不過應該好少人知道佢擁有好強嘅舞藝。佢喺《龍珠Z神與神》中，為勢所迫，突然要即興又唱又跳，先至令粉絲知道原來佢嘅唱跳能力都幾高喎！
5. 撒旦原名叫做馬克（マーク）
喺《龍珠》入面一向好有喜劇感嘅撒旦，其實佢原名叫做馬克（マーク），以日文嘅假名轉換之後，就會由マーク變成アクマ，又即係惡魔嘅意思，而撒旦就係惡魔個名，所以就用咗嚟做佢個「藝名」，真複雜！
6. 《勇者鬥惡龍5》人氣女角客串演出？
同樣係鳥山明所畫嘅《勇者鬥惡龍5》中，有個人氣女角色比安卡。喺《龍珠改魔人歐布篇》入面，魔人歐布去麵包店搶劫時，有個店員同比安卡好似。不過都有可能只係「人有相似」。
7. 無閑用前女友個名嚟幫個女改名
無閑同人造人18號個女叫做マーロン，喺動畫《魔凶星篇》中，無閑曾經有位女朋友，叫做マーン，只係有少少唔同，但發音都係差唔多。不過將個女嘅名改做ex嘅名，佢都算大膽喇！
8. 最命大嘅角色係？
喺《龍珠》入面死係好平常嘅事，撒旦喺多個篇章入面都好順利咁避過死亡嘅危機，就算喺外傳劇場入面，佢都一樣冇死過，佢真係極命大。
9. 《龍珠Z》片尾曲隱藏咩訊息？
就咁聽首《龍珠Z》片尾曲，會覺得係冇乜特別嘅咒語之類，但如果將佢逆向播放，就會發現原來佢隱藏咗一連串工作人員嘅名，好有趣！
10. 龍珠可以抗疫
玄學家李居明大師早前就在YouTube上載多條「李居明談抗擊肺炎」短片，由親自教大家做健身操，到早前在網上瘋傳教大家用兩隻手指做出不同的手勢，並同時念出口訣「臨兵鬥者皆陣列在前」，為口罩加持，李居明更在不同短片中，都會教大家擺放風水布局及貼上符貼，還稱這就可以防疫，當然信則有不信則無。
