奈良美智  講身後事

奈良美智 講身後事

今個月香港可以話係奈良美智月,事關呢位日本當代藝術家大師,喺香港一口氣搞咗3個展,分別係金鐘嘅「無常人生:奈良美智」、中環嘅「奈良美智:星星」展,以及下星期日喺香港會議展覽中心舉行嘅Art Basel,都會有大師嘅作品展出。當中「無常人生」更係大師日本以外首個大型個人展。

喺今次展覽大家會發現,奈良筆下嘅小女孩同以往唔同咗,少咗份調皮同邪氣,變得沉靜,甚至哀傷。原來呢啲係傳統日本美學觀念嘅「物哀」(唔係默哀,唔好搞錯),即係當我哋接觸景物、事物時,內心泛起嘅哀傷同感慨……大師重喺專訪中提到佢死後遺產嘅事,咁大吉利是?

text – Jessie photo – Sun、Billy

無常人生!(2007) 呢幅木板畫係點題作品。一臉稚氣嘅小女孩同代表死亡嘅骷髏頭形成強烈對比,令睇到畫作嘅人不斷思考生命中嘅重要問題。
無常人生!(2007)
呢幅木板畫係點題作品。一臉稚氣嘅小女孩同代表死亡嘅骷髏頭形成強烈對比,令睇到畫作嘅人不斷思考生命中嘅重要問題。

奈良美智profile

1959年青森縣出生,愛知縣立藝術大學碩士畢業後,再留學德國杜塞道夫藝術學院(國立藝術學院)。94至2000年間喺科隆定居工作,其間曾喺美國加州大學(洛杉磯分校)擔任客席教授3個月。2000年後回流東京定居。佢嘅作品都被紐約現代美術館、倫敦大英博物館、東京都現代美術館、德國新美術館等重要美術館同藝術機構所收藏。

http://www.youtube.com/watch?v=oE6fM6hVuD4

白夜(2006) 奈良經常以小朋友為作品主角,佢話係好自然出現嘅事。「我冇深思熟慮過畫嘅主題同主角,而係喺作畫時我腦中已經呈現出嚟,相信係代表我自己過去嘅小朋友形象。」
白夜(2006)
奈良經常以小朋友為作品主角,佢話係好自然出現嘅事。「我冇深思熟慮過畫嘅主題同主角,而係喺作畫時我腦中已經呈現出嚟,相信係代表我自己過去嘅小朋友形象。」

311創作分水嶺

「無常人生」分5個部分:明日回憶、何去何從、今昔對話、無盡生命以及生命樂章;聆聽今天。展出嘅作品都係大師20年嚟嘅心血結晶,當中更有20幾件係全新作品。

佢所畫嘅小女孩一向俾人奸奸哋、憤怒,串串貢但活潑嘅感覺。但近年大師風格一轉,筆下嘅小女孩變得沉靜,好似多嘢諗咗,甚至有哀傷嘅感覺。

一切原來係因為2011年311日本大地震,同埋奈良爸爸去世嘅事有關。「我喺青森縣出生長大,同福島好近。而家媽媽仍住喺嗰度,311後,我經常買日用品俾佢。以前我好享受由我屋企至媽媽屋企嘅路程,因為中間嘅大自然景色好靚,但地震後就變晒廢墟,令我心靈極度震撼,好傷心。」

大師話當時好多藝術家都會去災區視察兼創作,但佢就完全冇創作意慾。「喺呢種情況下衍生嘅藝術品,我實在難以抱有正面態度。當時我有用相機影低啲相,但唔會show俾人睇,純粹係影俾自己,所以只影過4張相。」同年夏天,大師爸爸亦去世,雙重打擊下,佢冇創作一段時間。「地震發生之後,我用咗1年時間,唔用任何工具,只用雙手以黏土製作雕塑,俾時間自己心情沉澱。」

被遺棄的小狗(1995) 大師經常用上白色或好淺嘅色調,佢話係受成長地嘅雪景影響。「我係喺日本最北嘅地方成長,冬天,成個地方所有嘢都會被雪覆蓋,全部都係白色,所有污糟嘢都被白色遮蓋變到好靚。所以影響到我經常會用白色,以及一啲喺白雪中會見到嘅顏色,如淺粉紅同淺藍。」
被遺棄的小狗(1995)
大師經常用上白色或好淺嘅色調,佢話係受成長地嘅雪景影響。「我係喺日本最北嘅地方成長,冬天,成個地方所有嘢都會被雪覆蓋,全部都係白色,所有污糟嘢都被白色遮蓋變到好靚。所以影響到我經常會用白色,以及一啲喺白雪中會見到嘅顏色,如淺粉紅同淺藍。」
小狗(2005)各高26cm、寬22cm、深45cm 除咗小朋友,大師覺得狗仔都代表住佢。「小狗係同我一齊成長嘅回憶。今次展覽冇1件作品係表達未來,所有都係以我個人回憶同經驗作為靈感。」
小狗(2005)各高26cm、寬22cm、深45cm
除咗小朋友,大師覺得狗仔都代表住佢。「小狗係同我一齊成長嘅回憶。今次展覽冇1件作品係表達未來,所有都係以我個人回憶同經驗作為靈感。」
生命之泉(2001/2014) 小朋友嘅頭疊喺巨大茶杯上面,喺上方嗰幾個頭嘅眼睛重不斷流眼淚,淚水不停流落杯中,表達出生生不息。呢度同隔籬攝影展區只有幾步之隔,聽住照片slide show嘅配樂,威爾斯民謠歌手Mary Hopkin嘅〈Voyage of the Moon〉,成個氣氛都有種哀傷感。
生命之泉(2001/2014)
小朋友嘅頭疊喺巨大茶杯上面,喺上方嗰幾個頭嘅眼睛重不斷流眼淚,淚水不停流落杯中,表達出生生不息。呢度同隔籬攝影展區只有幾步之隔,聽住照片slide show嘅配樂,威爾斯民謠歌手Mary Hopkin嘅〈Voyage of the Moon〉,成個氣氛都有種哀傷感。

希望傳承作品

奈良大師經此役後,對人生有新睇法。「我睇過1個統計,日本男人平均壽命係78歲。而家我55歲,如果有78歲命,我已經活咗大半世。311加上爸爸離世,令我意識到我嘅生命同死亡愈來愈接近,而家我希望能活得更有樂趣,學習享受人生。」大師重話佢已經開始諗身後佢作品遺產嘅問題。「當我過世之後,我希望大家都可以繼續感受同欣賞我所創作嘅藝術品,所以我而家最想嘅就係希望盡量做多啲作品並分享俾大家。」

展覽主題係「無常人生」,咁大師又相唔相信輪迴呢?「我20歲時,有日媽媽車我去機場時閒聊,佢話我出世前兩年曾經懷有1個女胎,但不幸夭折。嗰次係我第1次知道呢件事。之後我諗番起,其實我自細都有好女性化嘅一面,完全了解女仔諗咩,同埋我細細個就好鍾意花或者一啲好靚嘅物件,我突然覺得兩者係有關聯,覺得一切變得好合理。不過,當然我係鍾意女仔嘅,哈哈!我細個時唔鍾意女仔嗰面性格,中學時,開始打欖球、學柔道,希望自己男仔啲,我係柔道黑帶嚟!」

不安的日子(2015)  呢幅作品放喺「何去何從」嘅展品入面,充分感受到小女孩對於過去同未來都感到好不安,並缺乏安全感。
不安的日子(2015)
呢幅作品放喺「何去何從」嘅展品入面,充分感受到小女孩對於過去同未來都感到好不安,並缺乏安全感。
喺偏廳展出奈良大師多幅畫喺信封或紙板上嘅作品,好多都係佢靈感湧現一刻時畫低嘅,基本上佢哋係「草圖」,但亦可視為完成咗嘅藝術品。
喺偏廳展出奈良大師多幅畫喺信封或紙板上嘅作品,好多都係佢靈感湧現一刻時畫低嘅,基本上佢哋係「草圖」,但亦可視為完成咗嘅藝術品。

 

快啲排!香港獨家精品

唔止有得睇,今次展覽重特別有幾款限量精品俾大家買返屋企留念,就喺亞洲協會香港中心商店發售。

專登為香港設計嘅1套3款「香港九龍新界」陶瓷套碟,會喺3月24日至7月26日逢星期二下午2時公開發售。每位限買1套。每星期售100套,先到先得。$988/套
專登為香港設計嘅1套3款「香港九龍新界」陶瓷套碟,會喺3月24日至7月26日逢星期二下午2時公開發售。每位限買1套。每星期售100套,先到先得。$988/套
於3月6日至7月26日展期內,有合共6款奈良美智作品嘅iPhone 6、iPhone 6 Plus手電殼發售。各$250(iPhone 6)、各$280(iPhone 6 Plus)
於3月6日至7月26日展期內,有合共6款奈良美智作品嘅iPhone 6、iPhone 6 Plus手電殼發售。各$250(iPhone 6)、各$280(iPhone 6 Plus)
大師標誌作品小狗嘅小型版模型,身長約10cm,有黑色同白色兩款,撳佢條尾,個鼻重會着燈。於3月24日開始公開發售,粉絲必定要入手!$380
大師標誌作品小狗嘅小型版模型,身長約10cm,有黑色同白色兩款,撳佢條尾,個鼻重會着燈。於3月24日開始公開發售,粉絲必定要入手!$380

無常人生:奈良美智

日期:即日至7月26日

時間:11:00am-6:00pm(星期二至四);11:00am-8:00pm(星期五至日、3月16-19日);逢星期一休館

地點:金鐘正義道9號亞洲協會香港中心麥禮賢夫人藝術館

費用:免費

查詢:2103 9511

連走3場

香港人有福了,事關一不離二,除咗「無常人生:奈良美智」,由即日至4月25日,喺中環嘅佩斯畫廊同時有另1個佢嘅展覽──「奈良美智:星星」,展出佢最新創作嘅「星星」系列。而畫廊喺3月15日至17日嘅香港巴塞爾藝術展(Art Basel)1C06展位,亦會展出奈良美智另一啲新作系列。所以奈良嘅忠粉,要走晒3度喇!

 Eight Stars(2014)(左)、Ten Stars(2014)(右) 今次有多幅作品都係以星星嘅數目而命名,不過問到每幅畫星星嘅數目有冇咩意義時?佢話其實係冇特別意思。
Eight Stars(2014)(左)、Ten Stars(2014)(右) 今次有多幅作品都係以星星嘅數目而命名,不過問到每幅畫星星嘅數目有冇咩意義時?佢話其實係冇特別意思。

大師愛星星

「星星」展出大師嘅7幅作品,主題係由佢自己揀選,屬於宇宙奧秘嘅星星,星星亦係佢一直所鍾情嘅嘢。佢話星星喺小朋友眼中有好多唔同象徵,例如係社會上慣用嘅嘉獎符號,佢嘅作品中就呈現出喺小童世界中,星星所代表嘅各種意味。

「我唔係好識用語言表達我嘅意念,但相信我嘅作品可以令大家感受得到當中嘅意念。如果對象係3歲小朋友,就可以好容易同佢哋講到每幅畫係點解。如果係對住成年人嘅話,佢哋已經有好多經驗同經歷,每個人都有自己嘅體會,所以都係留待大家自己思考。」

Nine Stars(2014) 喺「無常人生:奈良美智」展覽偏廳有多幅大師嘅紙板作品,當中有幾幅係「星星」展品嘅縮細同較簡單版,應該就係呢幾幅作品嘅草圖。
Nine Stars(2014) 喺「無常人生:奈良美智」展覽偏廳有多幅大師嘅紙板作品,當中有幾幅係「星星」展品嘅縮細同較簡單版,應該就係呢幾幅作品嘅草圖。
Lone Star(2014)(左)、Flowers(2014)(右) 大師筆下小女孩嘅眼神冇以前作品咁銳利,除咗係前文提到嘅人生經歷令佢轉變之外,佢再補充:「而家年紀大咗,已經過咗反叛期,個人變得愈嚟愈安靜,亦反映咗喺作品上。」
Lone Star(2014)(左)、Flowers(2014)(右) 大師筆下小女孩嘅眼神冇以前作品咁銳利,除咗係前文提到嘅人生經歷令佢轉變之外,佢再補充:「而家年紀大咗,已經過咗反叛期,個人變得愈嚟愈安靜,亦反映咗喺作品上。」

奈良美智:星星

日期:即日至4月25日

時間:11:00am-7:00pm(星期二至六)

地點:中環皇后大道中30號娛樂行15樓C室「佩斯香港」

費用:免費

查詢:2608 5065

 

香港巴塞爾藝術展

日期:2015年3月15日至17日

時間:1:00pm-8:00pm(3月15日);12:00nn-8:00pm(3月16日);12:00nn-5:00pm(3月17日)

地點:香港會議展覽中心

購買門票:快達票網頁hkticketing.com

 

延伸內容:

洪卓立邀合作 黎特自畫成家

YOU MAY ALSO LIKE ...