ASICS日本遊 王者の道
text - Lok & Fung photo - Fung design - Hin
ASICS Sports Museum 虎走根源
唔怕同大家講，平時冇咩人可以去到ASICS總部，所以今次筆者一定要完整披露入面每個細節！要知道1個品牌嘅成功之道，先要了解佢嘅過去，於是我哋首先去到位於神戶嘅ASICS博物館（ASICS Sports Museum）。實不相瞞，即使有我哋報道，你哋都唔會睇到博物館嘅全部，因為博物館對於館內展品保護極度嚴格，所有有日本跑手肖像嘅相關物品都唔可以拍攝，不過剩係憑呢點，已經睇得出佢哋對自己國家嘅文化保護做到足。
起點係位於2樓嘅電影室，先睇睇ASICS創辦人鬼塚喜八郎由1949年起創立品牌到今嘅奮鬥史，睇完之後就可以欣賞由Onitsuka Tiger到ASICS嘅發展，當中展示咗好多ASICS喺國際賽事中登場嘅跑鞋原作，由跑步到足球以至各種運動都有，成就非常輝煌。
之後轉到以運動場為設計靈感嘅地面樓層，呢層分為跳、投、走、觸等唔同區域，你可以憑地面上嘅刻度，或者係大螢幕嘅模擬片段，真實體會各項世界紀錄，原來博物館都可以咁好玩。
ASICS Institute of Sports Science 終極科研
睇完博物館，了解咗ASICS演進過程之後，我哋就去到ASICS工學研究所（ASICS Institute of Sports Science，簡稱ISS），親身見證科研嘅成果，呢個ASICS總部亦係一切技術嘅起點。
先講呢座建築，作為ASICS技術研發中心，ISS可以話結集所有頂尖科技同設計，ISS本身外圍圍繞住3條唔同地面嘅跑道，可作產品實際測試之用。而成座大廈每個角落都經過精心設計，只能用「大開眼界」嚟形容，包括地底有偵測器嘅網球場、可作足球或欖球訓練嘅草場、產品QC工場、各式測量儀器等等，最驚訝係連天台都改裝成有3種唔同路面嘅上落斜跑步測試場地，可以望住個夕陽於天台跑步，相信只有ISS做得到，而且ISS內重有好多充滿藝術感嘅布置，有呢種工作環境，難怪會有如此高質素嘅產品。
參觀過ISS就會明白，唔同國家對於「研發」一字本身存有好大差異，如果喺香港，要起座咁嘅建築物，基本要考慮係有冇得益、有冇錢賺，工場就係工場。但喺日本，佢哋就係可以不計成本咁起1座集工場、科研、測試場地於一身嘅ISS，為嘅係將來得出更好嘅產品。有遠見，呢個就係人哋成功嘅地方。
東馬2015の血拼EXPO
講完ASICS歷史同科研，又係時候講番shopping，東京馬拉松前，大會喺Tokyo Big Sight東京國際展示場舉辦為期3日嘅「東京馬拉松EXPO」，集結有關運動健身嘅尖端商品，衫褲鞋襪應有盡有，咁啱近期日圓匯率偏軟，絕對會令人買到唔想走！「東京馬拉松EXPO」係東京馬拉松另一重點節目，香港跑手可能對EXPO呢個名比較陌生，事關渣馬由開跑到完結都係1日之事，正因為咁，東京馬拉松無論規模同氣氛都贏足幾條街，同時EXPO亦係36,000名參賽跑者登記報到嘅場所，報到完即時shopping。博覽會先展出有關東京馬拉松嘅簡史同歷年大會海報，再行入去就會見到同跑步有關嘅各種最新商品，貨品絕對係價廉物美，場內更有好多東京限定商品，唔買真心對唔住自己。
ASICS Store Tokyo
東京跑店
返到東京又點可以錯過ASICS東京店？同時嚟到東京先發現原來日本人對跑步係充滿住熱情。
去到ASICS東京店，林林總總新款跑鞋同服裝將會第一時間吸引住你目光，因為好多款式同色系都係東京限定，喺香港絕對搵唔到。而店內設有FOOT ID區，透過3維足跡測量機同跑步攝影機，將跑手雙腳資料即時傳送去電腦再作分析，從而令跑手揀到最適合自己嘅跑鞋。而喺筆者參觀過程中，周不時有啲大汗淋漓嘅人士進出鋪頭，一問之下，原來東京店嘅ASICS Store係設有沖涼房，事關好多日本人都會選擇返工前一跑，而東京ASICS Store開正喺東京核心地段，各位職者可以跑完即返工，呢個就係日本跑者對跑嘅熱情。
