韓謎日誌-在韓唱K學韓文

Blogger

廣告

【韓謎日誌by Pink】養懶、養肥人嘅長假期終於結束喇!所有人都要重回正軌,你哋適應到時差未呀?我啱啱喺美國返嚟,重係喺jet-lagged階段,但見到你哋個個都開始返工返學,我又點可以賴喺被竇度偷懶呢?

講開返學,又係時候分享下我當年留學韓國嘅趣事喇!話說當時我初到貴境,話就話係喺香港讀咗半年韓文先過去,但好可惜,除咗「阿唷哈些唷」(안녕하세요!韓文意思:你好)之外,真係半粒字都嘔唔出,所以我並冇浪費時間,除咗下晝喺江南進修化妝課程之外,上晝就喺延世大學惡補韓文。

當初入讀韓文班前,要通過入學試,測試你嘅韓語程度嚟分班,而我當然唔會係入到精英班嘅材料啦!結果我被編到入一班同我一樣,韓文講到唔湯唔水嘅低B班裏面。我嗰班入面真係咩種族都有,德國、法蘭西、美國、芬蘭、日本、俄羅斯,重有天津等等。國際化到呢~重點當然係我大過佢哋一截啦…

起初,我本來都含羞答答咁,唔敢同佢哋講嘢,但好快就同佢哋混熟咗喇!我哋放咗學後,會約埋一齊食lunch、唱K、shopping,重有整指甲。哈哈,竟然唔係一齊溫習,真係敗家!但我想講嘅係,我嘅韓文冇因為咁而退步,反而係進步咗,因為我嘅好朋友係日本妹,我又唔識講日文,佢又唔識講英文,所以我哋夾硬都要用韓文溝通囉!

 

 

重有呀,我哋去唱K都係為咗練習韓文,因為當地嘅KTV(노래방),唔同香港咁俾你哋劈酒呀、猜枚呀、食雞翼尖咁㗎!人哋真係叫(노래연습창)唱歌練習場,我都係靠咁樣練到好正宗嘅韓文發音咋。所以話,唔一定要坐定定死背書嘅,有時動下腦筋,換下另1種學習模式,咁重容易啲入腦。我幾時都話香港嘅填鴨式教育制度係時候要改,outdated㗎喇!

 

最後我不得不佩服我班同學仔,佢哋個個都好醒又搞笑,其中有個美國仔叫我教佢講廣東話,重要叫我教佢講粗口。識我啲朋友都知我咁斯文唔講粗口㗎啦!(哈哈)咁我咪教佢認識下中國人係點樣稱呼佢哋呢班紅鬚綠眼嘅西洋人囉!點知,佢哋真係學得好快,發音又準,真係笑到我趴街!

text-Pink

 

Pink (핑크)

韓妝達人,本來過着刻板OL生活,自小愛扮靚,更鍾意韓國潮流文化,幾年前隻身遠赴韓國學藝,在江南著名化妝學府Atelier Makeup Academy實習,曾參與過無數韓國fashion shows的化妝實戰,亦試過為韓國小姐化妝。回流香港後,創辦Pink Evolution化妝學校,教授地道韓式化妝,又代理韓國化妝及護膚品牌。Pink長期港、韓兩邊飛,極為熟悉韓國地道及最新的潮流文化,連本土韓國朋 友亦為之驚歎!

詳情可瀏覽本人facebook 專頁PinkEvolution

《Instagram》 : PINKEVOLUTION

或電郵至[email protected]