無雙新世界《One Piece：海賊無雙3》
廣告
《One Piece》粉絲留意，距離最新一集《One Piece：海賊無雙3》（簡稱OP無雙3）發售時間唔足1個月，係時候儲定錢啦！今集首次登陸PS4，畫面同系統令人更加期待，上集因原創故事同自由流程嘅玩法，令關卡少咗又悶咗，搞到唔少粉絲冇晒癮，就算系統搞得幾好都冇用。好在BANDAI NAMCO今次醒目，主要模式唔止再次以呈現原著故事為基礎，遊戲劇情更索性以第二部「新世界篇」做起點，包括埋連漫畫都未畫完嘅「德雷斯羅薩篇」，登場角色自然更多更新，粉絲必玩！
text-Nam photo-Yuk、網上圖片
平台：PS4、PS Vita、PS3
類型：動作
發售日：3月26日
夥伴攜手出擊
原著角色數量極多，主角路飛嘅草帽海賊團、王下七武海、超新星、世界政府等唔同組織嘅人物加埋近百，要放晒入game內都好考功夫。今集追加咗全新嘅「羈絆打擊（キズナアタック）」系統，令到唔同角色有更多出場機會。而每個角色可帶夥伴角色上陣，夥伴會不時出現幫手攻擊，產生嘅傷害更會轉化成羈絆能量，令你嘅攻擊更有威力，面對強敵時亦唔使再孤軍上陣。
藤虎初體驗
上星期SCEH舉行大型「新春傳媒預覽會」，展出嚟緊唔少PS4勁game，《OP無雙3》當然有份，更有體驗版展出，除咗路飛、羅兩個上集已有嘅角色外，今集新登場嘅新角色新任海軍大將藤虎都可以試用。短短一關進攻魚人島已經玩到我停唔到手，藤虎動作慢但攻擊範圍巨大，開山劈石乜都得，而且靠住PS4強大機能，今集敵人數量大大提升，係咁易玩10分鐘已經做到千人斬，爽到極！最後提提你，遊戲中文版預定5月發售，要早玩早享受定遲玩睇劇情，自己諗諗好喎。
