提名10幾次但都攞唔到！細數8位與視帝視后無緣藝員

撰文：東方新地｜圖片：新傳媒圖片庫、微博、電視截圖｜編輯：乖乖l（原文刊於東方新地）

細數8位與視帝視后無緣藝員

｜徐子珊

徐子珊因選美而入行，當時備受力捧嘅子珊於多套劇集飾演女主角，出街劇集簡直係一部接一部！

當時子珊更與鍾嘉欣、楊怡、胡杏兒及陳法拉被TVB力捧為旗下新「五大花旦」之一，多套劇集同時亦大受歡迎。

自07年起合共提名8次最佳女主角嘅子珊，年年陪坐，最後子珊都心淡離巢。

｜蒙嘉慧

蒙嘉慧2000年加入TVB，第一套電視劇《新鮮人》就已經坐正做女一，證明當時TVB對其疼愛有加。

其後，蒙嘉慧參與多套劇集，如《妙手仁心II》、《法證先鋒》等更令其人氣急升！

然而，先後獲提名最佳女主角共10次嘅蒙嘉慧都未能獲獎，最後亦與TVB結束13年嘅賓主關係，更於婚後逐漸淡出電視螢幕！

｜吳卓羲

吳卓羲加入TVB後，於2003年嘅《英雄刀少年》擔正做男主角，其後憑《衝上雲霄》演唐亦風而成功走紅。

大家對佢印象最深刻嘅應該係吳卓羲多年嚟飾演衝動警察，網民仲笑指佢過去13年喺警隊不停轉部門，履歷不斷更新。

多年嚟吳卓羲不停演唔同警察部門嘅角色，但原來佢都曾10次提名最佳男主角！

｜鍾嘉欣

作為親生女嘅鍾嘉欣原來都曾獲提名視后達11次，但同樣食白果！

當年，嘉欣擔任唔少劇集嘅女主角，同時更深受觀眾喜愛，非常入屋，嘉欣更成為TVB當家花旦之一！

縱然如此，嘉欣依然未能一嘗視后滋味，實屬相當可惜！而嘉欣更喺今年1月約滿後離開TVB，逐漸淡出娛樂圈，做個幸福人妻兼人母！

｜馬國明

相信要數到坐喺頒獎典禮台上等攞獎但又多次陪跑嘅藝員，大家都會馬上諗起馬明！原來馬明由2005年首次獲提名最佳男主角，至今已獲提名該獎項11次！

近年，馬明憑再憑《on call 36小時》及續集《on call 36小時II》飾演張一健一角，而連續兩年獲提名最佳男主角，可惜仍一無所獲。

上年，馬明再憑《降魔的》一劇被網民睇好做視帝，不過就輸俾黃浩信。雖然噚晚馬明憑《宮心計2深宮計》奪得「最受歡迎電視男角色」，但依然與視帝一獎繼續擦身而過！

｜郭可盈

數到獲提名做視后最多次數嘅，原來係郭可盈，一共獲提名最佳女主角12次咁多。

仲記得當年郭可盈同蔡少芬、宣萱及陳慧珊四人被譽為TVB「四大花旦」!

而郭可盈最後一部參與嘅TVB劇集已經係09年播出嘅《富貴門》，其後郭可盈拍完《富貴門》後翌年更生咗囡囡林天若（Tania），自始淡出電視圈。

｜黃宗澤

黃宗澤（Bosco）1999年加入TVB，所拍劇集貼樣多不勝數，由2004年嘅《足秤老婆八兩夫》首次擔任男主角。

2005年，Bosco憑《我的野蠻奶奶》演甯茂春令觀眾留下印象，並首次提名最佳男主角！

回顧過去，Bosco就先後15次被提名最佳男主角，雖然2016年憑《幕後玩家》入圍該獎最後5強，但可惜亦未能一嘗視帝滋味！

｜林峯

唔好以為15次提名都拎唔到最佳男主角獎嘅Bosco已經叫最多次，原來數到當中獲提名但未曾獲得該獎項次數之冠嘅竟然係林峯！

林峯曾被提名16次，而早年嘅《溏心風暴之家好月圓》同《使徒行者》等劇集皆表現出色，獲得唔少觀眾喜愛！

可惜，直到林峯離巢都未拎到視帝一獎，真係陰公豬！

延伸閱讀：
《萬千星輝頒獎典禮2018》 同你睇盡紅地氈上各女星戰衣
【懶人包】萬千星輝頒獎禮2018得獎名單 馬德鐘、Ali奪視帝視后 跳躍生命線獲「最佳劇集」