39歲仲keep得咁好！廖碧兒激罕Post比堅尼照為寒冬港人送暖
撰文：東方新地、Anna｜圖片來源：instagram、新傳媒資料庫｜編輯：乖乖l（原文刊於東方新地）
39歲廖碧兒激罕派福利
39歲的廖碧兒（Bernice）2001年參選國際華裔小姐競選奪冠，同年加入第15期無綫電視藝員訓練班，一出道就在古裝版的《旨大歡喜》裡演公主一角，到現在都深入民心。
在無綫效力11年，Bernice考取國際品酒認證Level 3資格，開始賣酒和投身飲食業，更在法國購入酒莊釀酒。
一向在IG都只係發布友人聚會合照、自拍照和工作照的Bernice幾乎沒有性感。不過粉絲今年有眼福了，皆因Bernice昨日（9/12）罕有地Po了一張性感比堅尼照，身穿黑白波點三點式的Bernice坐在菲律賓沙灘上，海浪湧至上岸，非常有動感。她更說明香港天氣轉冷，所以送這張照片給大家溫暖一下。究竟能讓港人溫暖的是陽光與海灘，還是Bernice呢？
廖碧兒秘撻富豪
貴為華姐冠軍的廖碧兒，樣貌身材都絕對係女神級，多年來曾與劉愷威、陳豪及「富二代」林忠豪等拍拖，但通通都係分手告終，劉愷威及陳豪現時亦各自有家室。Bernice年紀都唔輕，往年不時都對外宣稱單身，話想搵番個好男人。去年就傳出佢終於有著落，秘撻一位神秘富豪男友！
秘搬豪宅買千萬酒莊
有男友照顧的Bernice全面升呢，遷離與父母同住的將軍澳寓所，秘密搬到大埔倚龍山莊千萬豪宅，更有一名女司機管接管送。有大水喉射住，Bernice更全力向商界發展，擲千萬在法國買酒莊、中環開酒吧、香港仔開設中央廚房等，果然生財有道！
低調拍拖
Bernice與富豪男友拍拖後極力保持低調，出入警覺性十足。去年38歲生日的Bernice在生日前一日密會男友，據知佢當日下午由女司機接載離開大埔豪宅，先與朋友歎茶及晚膳，至晚上約十時就由司機直駛山頂，趕住與男友甜蜜慶生。期間司機更不斷在附近兜圈，確保冇人跟蹤，隨後駛入僑福道的山頂豪宅。
闊太生活
升呢後的Bernice平時唔使開工就過住闊太生活，得閒就約朋友歎茶行街街，又會去美容院扮靚，仲有做瑜伽keep住弗爆身材，時刻保持最佳狀態！而為免男友呷醋，Bernice樂意做異性絕緣體，平時出街只會約女性朋友見面，連司機都係女仔，似乎一心一意等做富貴少奶奶？
廖碧兒與疑似新歡遊芬蘭
早前就有報道指，有讀者在芬蘭赫爾辛基的機場，目擊廖碧兒與一位型男一同乘搭芬蘭航空商務客位返港，兩人都係作全黑型格打扮，相當惹人注目。返到香港後廖碧兒隨即戴番黑超，仲坐埋機場電動車避人耳目。
廖碧兒疑似型男新歡
被指係廖碧兒新歡的呢位型男好快就被起底，呢位型男叫盧啟賢(Calvin Lo)，年約40歲，係一位失婚富二代，而且仲有一個女兒。呢位金融才俊Calvin家底豐厚，家族持有不少物業，自己更住在市值8千萬的山頂豪宅！
不過事情唔係咁簡單，有報道指Calvin離婚後，其實已經有一個名叫Nina泰籍百億電訊太子女女友，咁即係點呢？
廖碧兒認戀失婚富二代
今年3月廖碧兒身穿火紅低胸裝，出席由其代言的纖體廣告記者會，同場仲有兩位赤膊猛男陪實！廖碧兒最近傳出新戀情，與失婚富二代Calvin Lo同遊芬蘭，對此廖碧兒甜笑承認！佢表示兩人拍拖幾個月，喺一個慈善活動上認識，並大讚Calvin人好好、好細心，大家都鍾意動物。
廖碧兒：對感情一向認真
提到Calvin曾經結過婚並有小朋友，而且有個泰籍女友Nina，廖碧兒就話係對方有一個女兒，不過大家已經見過面，而且相處得OK；至於泰籍女友呢方面，廖碧兒澄清冇呢回事：「冇，冇，以我所知佢係單身。」
另外問到是否以結婚為前提拍拖，廖碧兒表示自己對感情一向認真，希望大家畀多啲時間、空間佢哋，有開心事一定會分享！
