一人一票最靚仔嘅鬼佬明星 網民:頭3甲完全係《復仇者聯盟》之戰

一人一票最靚仔嘅鬼佬明星 網民:頭3甲完全係《復仇者聯盟》之戰

「哥仔丫靚呀靚得妙……」外國靚得妙嘅哥仔多到離晒大譜,如果依家要你揀一個最最最靚嘅鬼佬明星,你又會點樣揀呢?近日就有網民開poll一人一票嚴選最靚仔嘅鬼佬明星,唔知佢哋嘅心水人選又係咪你心目中嗰一位男神呢?

撰文:占士@Central│圖片來源:連登、IG、Twitter﹑Youtube截圖、劇照

一人一票最靚仔嘅鬼佬明星 網民:頭3甲完全係《復仇者聯盟》之戰

要成為一眾巴打、絲打心目中公認嘅男神當然唔係話咁易,五官精緻之餘亦要有一種隔住個芒都感受到嘅man爆男人味,六嚿腹肌當然亦都走唔甩啦!下面多圖又多肉,各位姊妹ready好未?Let’s go!

樓主拋磚引玉,提名嘅係後生顏值好高,依家髮線好高嘅Jude Law。

Tom Cruise原來已經56歲,keep得打得又睇得,宣傳最新一集《Mission: Impossible》嗰陣仲勁親民,主動走向粉絲堆度合照,難怪咁多年都係大家心目中嘅男神!

經常以不同誇張造型拍戲嘅Johnny Depp平時打扮潮到爆,仲男人味十足,不過喺最新一集《Fantastic Beasts》嘅造型就畀人話老態畢露,唔知你又點睇呢?

Leonardo DiCaprio以前就靚喺個樣度,依家年紀大咗就靚喺個心度多啲。心地善良嘅佢近年親力親為做保育工作,成個IG都係動物相,所以要睇佢個靚樣真係入戲院睇就得,諗住睇靚仔follow佢IG就會大失所望,變咗睇大猩猩同長頸鹿。

Justin Bieber自從公布婚訊後就不時喺IG喪po同未婚妻嘅親密合照,令全球粉絲玻璃心碎一地,簡直係屍橫遍野,完全令人無晒遐想空間,不過依然有不少網民投佢票!

 

Tom Hiddonston即係《Avengers》嘅洛基,同戲中哥哥雷神Chris Hemsworth玩得好埋嘅Tom仲不時喺IG分享佢同哥哥嘅合照,搞到班成日將佢哋喺心目中湊成一對嘅腐女們心花怒放,咁識做唔怪之得有咁多巴打絲打投佢一票啦!

Adam Levine成身紋身相當wild,開騷仲成日唔著衫,引死一班女粉絲。

Zac Elfron近年為咗打破乖乖仔形象真係拼到盡,喪操肌變大隻仔,無論轉型前後都勁多粉絲,相信有望成為巴打絲打心目中票選前十名。

有網民話雷神就係要唔著衫先正,你覺得呢?

喺《Avengers》扮演Iron Man嘅RDJ亦都係大家公認嘅型佬。

後生時嘅奇洛李維斯亦係個小鮮肉嚟,不過依家變咗個佬嘅佢亦絕對唔差!

Tom Hardy猛男嘅外表入面有個溫柔的心,係個愛狗之人嚟。

Tom Hardy主演嘅超級英雄片《Venom》即將上映,同佢喺《Mad Max》同《Batman》入面一樣遮住大半塊面。

Matt Bomer又拍劇又拍戲,型男形象喺美國都相當深入民心㗎!

《Fast and the Furious》嘅男神Paul Walker又靚仔又大隻。雖然佢早已經離開咗大家,但網民都冇忘記佢,視佢為最靚仔外國男演員。

James McAvoy亦即係喺《變種特攻》扮演X教授嘅男星,兩年前同太太離婚後已經回復單身,各位姊妹,機會嚟啦!

Bradley Cooper無論有鬍鬚定無鬍鬚都一樣咁正!

無論美國隊長Chris Evans有著衫,定係著緊身衫都騷到成身肌肉,引死一班女粉絲,相信佢有望成為網民心目中最靚仔嘅外國男明星,無之一。

Taron Egerton憑《Kingsman》中Eggsy一角人氣急升,著住西裝嘅佢都幾型仔㗎。

一班巴打絲打當然唔淨止投畀上面嘅一眾男神啦!廢話少講,到底邊位先係佢哋心目中公認嘅最靚仔外國明星呢?即刻開估!

第三位:雷神Chris Hemsworth

第二位:美國隊長Chris Evans

第一位:Iron ManRobert Downey Jr.

YOU MAY ALSO LIKE ...