拍戲拍到厭 The Rock將重返WWE摔跤舞台？！想掟對手上月球！？
廣告
對於好多人嚟講，「The Rock」Dwayne Johnson 係一個演員，《逃出魔幻紀》、《末日困獸戰》等都係好出色嘅作品。但係對於某部分人嚟講，佢喺WWE時嘅表演絕對非常精彩。而近日有傳聞指佢又會重返WWE嘅舞台，到底係真係假，都仲係未知之數！
撰文：白仔丨圖片來源：影視截圖、Instagram
拍戲拍到厭 The Rock有機會重返WWE舞台！？
喺The Rock仲係WWE選手嘅時候，佢曾經被認為係世界上最偉大嘅摔角選手之一，贏過18項嘅冠軍寶座，因此好多人都稱The Rock係WWE上嘅傳奇人物。
其實The Rock都唔係第一次話要離開電影界。之前侵侵當選嘅時候，佢都因為不滿侵侵嘅處事手法而想參選下一屆嘅美國總統。當然，佢都係得個講字啦。又點會有一個WWE選手會成功成為總統呀？如果係，咁華仔咪一定做到特首！？
講完做總統之後，Joe Peisich 主持嘅《Barnburner’s Fired Up》節目中提到The Rock可能會重返WWE舞台。Joe話The Rock已經同WWE個邊傾好晒，準備喺第1000集時再次登場，其後引來大枇Fans討論，或者佢真係有機會再次成為WWE嘅王者，成為傳說。
The Rock所參與拍攝嘅電影其實都唔差，《逃出魔幻紀》喺香港都算歡迎。佢大大隻隻用肌肉取勝嘅形象非常鮮明，但係都有人認為就係因為佢一身肌肉所以限制咗佢嘅戲路。
