約雙子女出街最好有些少神秘感？！12星座女仔全方位追求大法！｜真係㗎點解嘅好叻呀
撰文：Charmaine Wong丨圖片來源：Instagram、劇照丨編輯：乖乖隆地洞、異種火星人
1. 白羊女
白羊座女生性格比較強勢，所以如果你想追白羊女，喺佢哋面前就要做真正嘅自己，唔好太扮嘢，如果唔係就會令白羊女特別反感。
仲有關鍵就係唔好拖泥帶水，千祈唔好要人估估吓咁，你要直接啲同明確啲，一就一、二就二。點追呢就冇乜所謂，但就唔好含糊不清！
2.金牛女
雖然金牛女都係好浪漫嘅人嚟，但係追佢嘅時候唔好只顧住浪漫，一定要做啲實際嘢，例如發動銀彈攻勢，送名貴禮物係個唔錯嘅方法，因為佢至少會覺得你係重視佢同埋願意花錢喺佢身上。
另外就係追金牛女時，記得絕對要同其他女仔保持距離，因為金牛女特別鍾意呷醋，仲會覺得你三心兩意，對自己唔夠真心，繼而唔再同你繼續交往，甚至連朋友都無法再做落去！
出街小tips：金牛座女仔比較鍾意啲靜態嘅浪漫，例如你哋可以去海邊吹吓風，或者喺寧靜嘅夜晚散吓步、睇吓夜景，呢個時候記得要把握機會製造吓啲身體接觸嘅機會啊！
3.雙子女
追雙子女你需要時刻保持清醒嘅頭腦，千祈唔可以令雙子女覺得你蠢！因為雙子女鍾意啲聰明、有智慧同有內涵嘅男仔。
仲有一點必須要注意，追雙子女一定要特別細心，唔好喺沾沾自喜嘅時候 miss 咗佢瞬間流逝嘅小情緒，要明白佢好需要被人明白嘅心。愛佢嘅人要知道佢諗緊啲乜，又或者至少大家可以互相溝通，一齊行更遠嘅路。
想約雙子女出街嘅話呢，佢哋就鍾意個約會富有神秘感，間唔中有啲小刺激都唔錯，咁樣會激起雙子座女仔內心真實嘅自我。仲有啊！送啲實惠又實用嘅禮物就最好不過。
4.巨蟹女
巨蟹女好怕醜，唔敢表白自己嘅愛意，同時又多愁善感，特別冇安全感，所以想追巨蟹座女仔，記得一定要主動出擊，及時給予實在嘅承諾，由被動變成主動。
5.獅子女
追求獅子女嘅話，咩攻勢都可以，但係愈浮誇愈好！尤其係眾目睽睽之下去做，例如當眾唱情歌（前提係唱得好聽啊吓），送花送朱古力去佢office，又或者去接佢放工。唔需要花好多錢，就只需要你演出一齣好戲，滿足佢嗰一顆小小嘅虛榮心。
獅子女鍾意喺人多嘅地方約會，而且約會嗰陣你要讚佢多啲，畀其他人見到佢有幾優秀，要盡你所能去發掘佢一切優點！發掘完唔好收收埋埋啊，要記住佢哋鍾意畀人讚。
6.處女女
處女女係出名嘅完美主義者，所以追處女女你就識做啦，注意多啲自己嘅外表，最起碼係追到手之前唔好畀佢見到你污糟邋遢嘅一面！仲有呢，處女女成日會感到不安，一定要花多啲心機去學識安撫佢哋嘅方法。
處女女鍾意浪漫而完美嘅約會，只要能夠順利完成對你印象分就會大大提升！如果想送禮物畀處女座女仔記得送啲特別嘅嘢，例如係別具意義嘅水晶球、或是藝術擺設。
7.天秤女
如果你想追天秤女，一定要學識製造氣氛，令佢沉醉喺浪漫嘅氛圍當中，同埋天秤女一向都鍾意social，所以就算你做咗佢男朋友都要接受佢身邊永遠都有班兵仔喔！
天秤女最接受唔到寂寞，所以要盡可能抽時間去陪佢，做嘢忙要陪、exam period要陪、時時刻刻無論你有冇時間都要陪！就算你老是常出現佢都唔會嫌你煩，但係你唔出現呢，就算媾到手都隨時冇㗎。
8.天蠍女
天蠍座女有強烈嘅佔有欲，疑心特別重，而且最憎被人背叛！如果想追天蠍女仔，就要時時刻刻畀佢知道你嘅一舉一動，你去咗邊、做緊咩、同緊咩人一齊樣樣都要同佢講，做一個會令佢放心嘅男人。
其實最難追嘅應該就係天蠍女，因為佢哋佔有慾強同疑心重之外，仲好講 feel！鍾意就鍾意，唔鍾意就唔鍾意，唔會有灰色地帶，亦都唔會因為時間而改變一切。所以要打動佢嘅心，就惟有細心觀察，祝你有一日會搵到突破口。
9.射手女
射手女係直白型嘅女仔，如果想追佢哋唔需要製造浪漫去打動佢，只要攞出你嘅勇氣、大膽啲同佢表白就夠，因為佢哋唔鍾意啲拖泥帶水嘅男仔。
同埋追射手女可以投其所好，知道佢鍾意啲咩你就了解下嗰方面嘅知識，咁做你同射手女先會有共同話題，令射手女對你愈來愈感興趣，甚至對你產生好感。
如果想同射手女更親近嘅話，可以同佢嚟一場戶外約會，甚至約埋一齊去旅行！一齊探索世界各地嘅人物風景，創造共同嘅美好回憶。不過記住唔好向佢作出任何承諾，因為今日唔知聽日事，好好享受當下，畀佢感受生活嘅自由，就係最浪漫不覊嘅愛情故事。
10.摩羯女
摩羯女將工作排喺第一位，而感情排喺第二位，所以你追摩羯女就千祈唔好打擾佢工作。仲有摩羯女更鍾意拍有把握嘅拖，要有長遠同可行嘅人生計劃，當佢感受到你有上進心，就會覺得雙方可以步向婚姻。
陪摩羯女去吓朋友或者親戚屋企，仲有學校操場，呢啲都係唔錯嘅地方。不過記得一定要守時，因為佢哋最憎男仔遲到！
11.水瓶女
水瓶女其中一個特質就係鍾意探索同挑戰高難度，所以你可以扮到自己好神秘，或者似係一個有好多秘密又清高嘅男仔，水瓶女愈猜唔透你就愈吸引到佢，甚至會主動追番你轉頭！
佢哋最希望自己嘅另一半既係朋友又係愛人更加係家人，最重要係價值觀相近，如果你嘅信念同佢背道而馳，水瓶女會因為同你無法溝通而轉身離開。
追緊水瓶女嗰陣約佢去啲好玩但係又唔會令佢失儀態嘅地方，佢哋其實都好要面㗎，所以可以約埋佢一班朋友一齊去boardgame cafe。記得追緊嗰陣要保持距離，唔好太癡纏都唔好未拍拖就太心急，要畀多啲空間水瓶女，如果唔係佢會被你嚇親而落荒而逃。
12.雙魚女
雙魚女天生柔情，隨時都希望被人保護同幫助。所以想追雙魚女仔，就要無論喺生活、事業或者學業上都幫到佢，咁雙魚女就自然會依靠你、信任你。同埋一定要講多啲甜言蜜語，因為雙魚女生浪漫多情，佢嘅愛情正正需要咁嘅養份去培養。
雙魚座女仔內心脆弱，當佢哋遇到困難嘅時候往往會偷偷地喊，呢個時候就係你進攻嘅最佳時機。如果呢個時候你可以陪住佢、安慰佢，咁雙魚女就會依賴於你。
另外就係佢哋非常感性，攻勢可以趨向少女化，例如送公仔、帶佢去主題樂園玩、送扎鮮花，計劃一場浪漫嘅約會。如果畀到雙魚女美好嘅求愛回憶，令佢覺得自己好似童話故事嘅女主角，而你就係男主角，成為你兩個獨一無二嘅回憶，就係最浪漫、最感動嘅愛情故事。
