黃子華袋錢落你袋！翻煲10大經典金句

翻煲10大黃子華經典金句

1.「婆媳」糾紛

「香港回歸中國，就好似阿媽標個仔參，邊個畀贖金？當時係個母子關係，當時大家以為係。但而家已經唔係，變咗奶奶同新抱嘅關係…而家香港嘅問題，係婆媳糾紛，所謂婆媳糾紛，係種必然瀨嘢嘅關係，除非你老婆第1日入門就全心全意同奶奶講：『奶奶，我愛你！』唉呀！我講錯，對唔住，講多次，『阿媽，我愛你！』當然我哋係講唔出啦！係咪？」

2.有得揸唔揸呀？

「有日，奶奶教訓新抱:『你第1日入門就藐嘴藐舌，而家你有咩就攤出嚟講！』於是新抱就問:『咁6月4日你去咗邊？』奶奶就話:『你講呢啲？』最搞笑係，新抱問奶奶，話之前明明講好過幾年畀佢揸fit，點知奶奶話佢聽錯，係揸lift唔係揸fit，其後奶奶繼續補充：「揸fit又係揸，揸lift又係揸，你唔係有得揸唔揸呀？」

3.愛情如股票

「愛情同股票一樣，未入之前係不停咁升。但當一擁有，你就問：『點解會咁㗎？』世上有100分男孩、100分女孩，但就冇100分伴侶。如果仲有人唔肯承認，相處就代表開始扣分，我有個例子：2人相愛，當然唔想有第三者，但點解你想生仔？『仔點會係第三者呀？』仔唔係人呀！喂，呢個第三者佔你哋好多時間㗎喎！呢個第三者，1日食6餐，隨時食埋你嗰份，『咁1男1女就梗係要生仔㗎啦！』係囉！點解呢？因為當世界只剩下1男1女，得番你同我，你就feel到，呢個遊戲係唔玩得耐。」

4.「一個男人點都會 hurt過一兩個女人。但作為一個女人一世未畀男人 hurt 過，咁就係真正嘅 hurt 啦。」

5.「你愛的，得唔到；你唔愛的，你甩唔到。」

6.「感情呢家嘢呢，你預咗係唔OK 嘅，你就OK」

7.「化妝就係你落咗妝，我仲認得你，你落咗妝，我唔認得你，嗰啲叫做喬裝。」

8.「男人喺愛情上係要求新鮮，女人對愛情最大要求就係保鮮。」

9.「戀愛係一盤生意，你要二十四小時諗住佢。」

10.「基本上男人係做到三個不，不主動，不抗拒，最重要我哋係不負責嘅。」