【2018世界盃 場邊新聞】日本妹票選世界遺產級靚仔球星 C朗都係排第二?

【2018世界盃 場邊新聞】日本妹票選世界遺產級靚仔球星 C朗都係排第二?

2018年世界盃在俄羅斯進行得如火如荼,今年賽事好睇在實力平均,強隊唔一定贏硬,非強隊一樣有出色表現!不過對於好多女士來說,唔明「越位」咪唔明囉,反正都係睇靚仔球星啫!日本雜誌《ViVi》早前舉行咗一個「世界遺產級靚仔球星」選舉,不過地上最強C朗都只得第二?

撰文:東方新地|圖片:Instagram、ViuTV、網上圖片|編輯:乖乖隆地洞@central(原文刊於東方新地

【世界盃】日本妹票選世界遺產級靚仔球星

11|基奧特(Olivier Giroud)

出生日期:1986年9月30日(31歳)
身高:192 cm
國籍:法國
位置:前鋒
法國型男基奧特擁有俊俏性感的樣貌、模特兒般的身材,令佢一直都係廣告商的寵兒。雖然基奧特被香港球迷戲稱為「銀河第一」(唱出嚟就會明白),但佢從英超球隊阿仙奴轉會到車路士持續交出好表現,試問呢個又好波,又靚仔的球星,女士們又點可以錯過呢?

N

10|馬高萊斯(Marco Reus)

出生日期:1989年5月31日(29歳)
身高:180 cm
國籍:德國
位置:翼鋒

有唔少女網民都認為德國隊根本係一支模特兒軍團,而萊斯更是模特兒軍團中的表表者!司職翼鋒的萊斯BB除了靚仔外,亦是腳法、射術、速度兼備,可惜多年來經常受傷患困擾,曾經因傷被逼退出2014年世界盃及2016年歐洲國家盃。未知萊斯今年能否協助德國奪取佳績?

9|尼馬(Neymar Jr.)

出生日期:1992年2月5日(26歳)
身高:175 cm
國籍:巴西
位置:翼鋒

貴為足球王國巴西現時的當家球星,相信小編唔需要多介紹邊位係尼馬,呢位巴西翼鋒腳下功夫出眾、花巧悅目,外表充滿陽光氣息,不過小編就覺得佢總係有種「MK」味道,依家仲整咗個被網民評為「意粉頭」的髮型… 不過各花入各眼啦!

8|基沙文(Antoine Griezmann)

出生日期:1991年3月21日(27歳)
身高:174 cm
國籍:法國
位置:前鋒

27歲的基沙文有齊典型法國美男子的特徵,棕髮,粗眉、藍眼睛,無論係以前一頭長髮定依定剪咗個平頭裝,都一樣咁型仔!呢位法國當家球星在前線有極強威力,近年不斷有多家豪門向其招手,但佢最終都係選擇留效馬德里體育會,靚仔又忠心!

7|武藤嘉紀

出生日期:1992年7月15日(25歳)
身高:178 cm
國籍:日本
位置:前鋒

日本雜誌選舉,好自然就有日本球星上榜啦!25歲前鋒武藤嘉紀有著濃眉大眼,眉宇間帶著自信,陽光笑容非常吸引,喺亞洲地區有超多女粉絲!不過女球迷們唔好意思啦,人哋已經有個靚靚老婆!

6|大島僚太

出生日期:1993年1月23日(25歳)
身高:168 cm
國籍:日本
位置:中場

效力日本球隊川崎前鋒的大島僚太,雖然喺今屆世界盃並非必然正選,不過俾人感覺係個陽光大男孩,笑起來非常有親切感。感覺貼地啲,唔似其他男神咁遙遠,所以日本妹子特別喜歡?

5|溫拿臣(Rúnar Alex Rúnarsson)

出生日期:1995年2月18日(23歳)
身高:186 cm
國籍:冰島
位置:門將

今屆世界盃中,冰島可謂一路奇兵,呢個人口只有33萬的北歐小國首次參加世界盃就有出色表現,早前以一比一逼和勁旅阿根廷,奪得歷史上第一分和第一個入球。除了第一場撲出美斯十二碼的「導演」荷杜臣外,後備門將溫拿臣原來都擁有超高顏值,好一個金髮美少年!

4|柴崎岳

出生日期:1992年5月28日(26歳)
身高:175 cm
國籍:日本
位置:中場

去到第四位,日本妹子似乎都好支持自己人,26歲中場柴崎岳名列前茅,想必有其過人之處。不過比起其他球星,柴崎岳的外貌似乎就相對普通一點?反而柴崎岳嗰位靚靚未婚妻值得一提,佢同神劇《逃跑雖可恥但有用》女星真野惠里菜將於今年內註冊結婚,愛情事業兩得意!

Liger× pushBUTTON白色鱷魚珍珠頸鏈 $100

N

3|占士洛迪古斯(James Rodriguez)

出生日期:1991年7月12日(26歳)
身高:180 cm
國籍:哥倫比亞
位置:中場

基本上,任何咩靚仔球星榜都有一定會有占士洛迪古斯的份,典型的南美洲陽光男孩,燦爛笑容與迷人眼神,令佢俘虜唔少女球迷;不過技術上乘的占士同樣能俘虜男球迷的心,未知佢今屆能否帶領球隊闖進十六強?

2|C朗拿度(Cristiano Ronaldo)

出生日期:1985年2月5日(33歳)
身高:185 cm
國籍:葡萄牙
位置:翼鋒

葡萄牙翼鋒C朗拿度,C朗呀嘛!當今世上最知名球星之一。當年士砵亭愛賣弄腳法的花巧小子,如今已經係球會及國家隊的靈魂人物,年屆33歲的C朗仍然保持極佳狀態,早前面對西班牙時幾乎已一人之力逼和對手,個人連入三球!生得靚仔又好波,仲要人品好熱心公益,簡直係legend!

1|保羅戴巴拿(Paulo Dybala)

出生日期:1993年11月15日(23歳)
身高:177 cm
國籍:阿根廷
位置:前鋒

C朗都只屈居第二,因為第一名係來自阿根廷的保羅戴巴拿!年僅23歲的戴巴拿算係阿根廷近年少有的帥哥球員,五官標緻,身形弗到漏,而且集技術、速度及創造力於一身,慶祝入球的招牌掩面姿勢「Dybalamask」更令人津津樂道。可惜佢在國家隊同老大哥美斯「撞位」,屈居後備居多,阿根廷現時出線危危乎,球迷都唔知仲有冇機會見到佢…

YOU MAY ALSO LIKE ...