【理性足球分析】曼聯絕殺阿仙奴 雲加確係一個傳奇

賽前更由費格遜費爵爺代表曼聯致送紀念品俾雲加，有睇過佢地兩個大戰既球迷一定覺得異常感動，正式係一代足球時代既終結。加上摩連奴，曾幾何時，摩連奴剛執教車路士，破壞雲加同費Sir既壟斷，三大名帥互相變陣角力，三種完全唔同既風格，當時既英超比而家既金錢世界，更有味道。

講番戰術，曼聯繼續用番上場足總盃對熱刺既433，只係Jones換左Lindelöf，似乎摩連奴開始搵到最平衡陣容，用Herrera平衡番Pogba既不積極，放手俾佢攻上，由Matic同Herrera執漏，相信到時足總盃決賽都會以此陣出戰。不過Pogba比之前已經跑多左好多(定只係之前跑得太少？)，希望佢會keep住呢個心態。曼聯大部分攻勢都黎自左路，左路Sanchez同Pogba配合開始較多，加上Young亦積極助攻，Fellaini既入球就係由Young助攻。不過最後要由Fellaini補時階段頂入致勝入球，代表曼聯空有6成控球，17腳射門，卻只有3腳中目標，曼聯球員確實當左呢場係友誼賽咁打。

Fellaini呢個Plan B雖然唔係咩漂亮足球，但去到比賽中後段仍然攻唔入，Lukaku傷出無左前場高空支點，最簡單直接換入Fellaini，轉打兩邊傳中，有波就搵Fellaini去頂，不得不承認製造左好多驚險場面，包括Rashford既詐糊。講到Rashford球詐糊，不得不提Martial，後備入替之後係左路非常有威脅，Rashford詐糊由Martial傳中，Smalling有一球門前踢空氣亦係由Martial從左路傳中。但真係無計，面對Sanchez既空降，只能屈居後備，因為Sanchez下半場調去右路真係一事無成。

所以Fellaini值得續約，始終係突破僵局既武器，呢種用途單一，效果明確既球員已經買少見少。

至於阿仙奴，前文都講左為留力歐霸派出年輕球員以4231應戰，再睇睇後備席，只有Welbeck同Monreal係一隊成員，嗯…Holding算唔算？不過阿仙奴整體表現仍然值得掌聲，Mkhitaryan同Nelson雖為兩翼，但經常走入中間，阿仙奴仍然主要由中路進攻，亦方便左曼聯既防守。將曼聯防守集中中路再由兩閘壓上助攻，不過Kolasinac同Bellerin都唔算有太大威脅。

不過不得不提阿仙奴新簽既年輕中堅Mavropanos，雖然只有20歲但身高194，而對Lukaku完全無處於下風，將Lukaku既威力減到最低，雖然剷傷左Lukaku但個腳其實係清脆無犯規。就算之後換入Fellaini都勇於對抗，除左Fellaini入個球有少少幸運成份，其餘佢都成功化解。Mavropanos好過Holding或Chambers好多，希望下任領隊會多d用佢。

雲加確係一個傳奇。而家既即食文化，唔好話廿年，仲會唔會有一個領隊帶同一球隊超過十年？我諗好難再有。