【理性足球分析】足總盃曼聯球員就係贏呢2個字!

【理性足球分析】足總盃曼聯球員就係贏呢2個字!

足總盃四強,曼聯反勝熱刺2:1,是曼聯繼曼市打吡後又一場重要反勝,今場比賽雙方集中力,入局狀態成為比賽關鍵。

撰文:理性足球分析|圖片來源:英格蘭足總盃官網、Livescore、theguardian.com|編輯:隆仔

內容由博客提供及授權轉載,不代表本刊立場。

首先雙方正選陣容無驚喜,曼聯以433出戰,D.Gea位置不可動搖,中堅Smalling搭Jones,左羊右華,中場Matic最後,Pogba偏左Herrera偏右,Lukaku攻堅,左邊Sanchez右邊Lingard。

足總盃
曼聯以433出戰

熱刺亦以最強的4231迎戰,普捷天奴繼續傳統以第二門將Vorm打足總盃,中堅Sanchez拍Vetonahen,右閘Tripleer左閘Davies,雙防中Dier及Dembele,Son大部分時間出現喺左翼,Alli亦偏左協助Son,Eriksen則自由度較大,好多時會墜後較炮,最前當然是Kane掛帥。

足總盃
熱刺亦以最強的4231迎戰

上半場一開始優勢很明顯偏向熱刺一方,曼聯成隊都未入局,速度慢,表現甩甩漏漏,特別係後防線面對熱刺嘅迫搶顯得有啲騰雞。曼聯嘅中場線面對Alli同Eriksen嘅走位亦有啲不知所措,摩連奴無特別指示要盯死Eriksen,主要喺Eriksen偏右位置當然對應番曼聯嘅左邊由Pogba負責,但Pogba嘅防守,你懂的。曼聯亦用番前場迫搶對付熱刺,但曼聯根本唔擅長迫搶。之前幾場比賽都證明過曼聯嘅迫搶唔夠整體性,唔係成隊迫嘅迫搶等於馬騮搶球,嘥氣。熱刺第一個入球就係曼聯迫搶唔成功所致。

足總盃
熱刺第一個入球就係曼聯迫搶唔成功所致

當時熱刺開龍門球,Alexis Sanchez去迫熱刺中堅Davinson Sanchez,Young跟到Davies上前場,防止D.Sanchez短傳。Eriksen見Young捨棄左閘位置當然立刻走到Young身後嘅空位,呢個時候Pogba無為意Eriksen嘅走動,反應明顯慢咗一步,到發現時已經輸咗一個身位,之後都唔知算唔算全力跑,總之就係追唔到Eriksen。其實畀Eriksen入到禁區邊,熱刺Kane同Alli同時高速插入禁區,作為防守球員真係好難守,Smalling見Kane從後入緊小禁區,去防守Kane都好合理,尾柱Valencia的確唔夠Alli快,所以D.Sanchez畀穿Eriksen嗰下已經輸咗八九成。

D.Sanchez畀穿Eriksen嗰下已經輸咗八九成。

被先入一球嘅曼聯都仲未開始醒覺,熱刺繼續主導比賽,中場繼續Mark唔到人,後防亦多次被Kane喺禁區頂做支點然後轉身。Son喺左邊攞住波竟然無人夠膽埋去搶波,差啲傳中畀Kane射入。然後又有一球Jones喺十二碼點附近完全走甩咗Kane…根本成隊曼聯都仲發緊夢。

被先入一球嘅曼聯都仲未開始醒覺

直到23分鐘,估唔到又係因為曼聯嘅迫搶,Dembele喺右路控球想用身體擋住Pogba,但被Pogba捉到路搶到,當時已經喺禁區嘅K角位。Pogba嘅傳中恰到好處剛剛笠過Vetonahen,入攝嘅Sanchez忍住道力點向遠處,頂向Vorm嘅反方向,無得救。講真當時曼聯嘅迫搶都唔係話好緊密,但因為Dembele嘅犯錯令熱刺形勢急轉直下。

講真當時曼聯嘅迫搶都唔係話好緊密

曼聯追番一球之後球員終於開始入局,跟人跟得足,落腳亦落得好準,特別係Valencia守到Son無乜表現,Herrera喺中場亦截咗唔少波。曼聯嘅攻勢亦非常簡單,踢番一貫嘅摩連奴足球,防守反擊。喺後場攞番波後好簡單幾腳就斬上去畀Lukaku、Sanchez或者Lingard去跑,始終面對熱刺嘅迫搶,簡單直接就係最好嘅解決方法。

面對熱刺嘅迫搶,簡單直接就係最好嘅解決方法

不過Eriksen同Alli都好鍾意走到防線與中場之間搵食,Alli有Matic喺中間還好,但偏右嘅Eriksen就好似曼聯第一個失球一樣,明顯針對Pogba防守唔夠積極,經常走到Pogba嗰邊搵食。Pogba雖然比之前已經有進步,有回防,但佢嘅防守力度都仲係懶洋洋,佢只係企喺個位度但唔集中,Eriksen只要一加速變向,或者再走深一啲Pogba就唔會跟。好多次Eriksen可以喺禁區頂附近轉身,曼聯中場穿晒,Jones被迫殺出嚟後,Smalling要1對1Kane,造成驚險場面。雖然熱刺多數從左路Son發難,但較入肉嘅攻勢好多都來自右邊,就係因為Pogba,令Young多次受壓。相反雖然較多攻勢來自Valencia嗰邊,但因為Herrera有積極協防,令威脅較少。

熱刺多數從左路Son發難,但較入肉嘅攻勢好多都來自右邊

上半場其後雙方你攻我守都無太多入肉攻勢,直到換邊後,摩連奴嘅曼聯明顯刻意死守,連迫搶亦都減少咗,真真正正打番摩連奴最擅長嘅防守反擊,一有波就斬上去,比上半場明顯更簡單更直接。個人認為現階段的曼聯這種沉悶打法才是最有效…非常諷刺。

換邊後,摩連奴嘅曼聯明顯刻意死守

熱刺受到嚴密嘅防守果然變得老鼠拉龜,今次輪到熱刺從下半場出來後不夠入局。熱刺投入更多人手進攻,曼聯嘅長傳亦相對慢慢變得有威脅。直到61分鐘,曼聯嘅長傳首先Lukaku頂漏到Sanchez腳下,然後傳番畀Lukaku,Lukaku控甩咗,個波反而漏到禁區頂, Herrera突然出現射個貼地波,收死咗Vorm。整個過程跌跌撞撞帶點幸運成分,但被曼聯把握到,非常典型的摩連奴打法。

熱刺受到嚴密嘅防守變得老鼠拉龜

曼聯領先之後當然更加死守,所有球員除Lukaku都回防防守。普捷天奴亦立刻投入Moura換走Davies,把Dier拉後當中堅,Vetonahen移往當左閘。但效果非常差,因為Moura鍾意上腳,講得難聽啲有啲獨食,而且又鍾意內切,Eriksen、Alli、Son全部都鍾意入中間,形成熱刺喺中路塞到死晒,彷彿幫助曼聯更易防守。

足總盃
曼聯領先之後當然更加死守

熱刺所有球員集中中路想讓邊路畀兩閘,但又換走咗左閘Davies,Vetonahen根本唔夠攻擊力,而且被曼聯兩翼Sanchez同Lingard回防Mark死,其後摩連奴換入Rashford之後更加明顯。摩連奴用體能充沛嘅Rashford防守攻擊力較強嘅Trippier,無乜氣嘅Sanchez就轉去右邊守無咁有威脅嘅Vetonahen 。Rashford喺左邊完全跟足Trippier返自己禁區,然後用體能速度反擊,最後一球單刀就係例子。呢個時候就反映咗熱刺兩閘嘅不足。

足總盃
Rashford喺左邊完全跟足Trippier返自己禁區,然後用體能速度反擊

其餘時間就係熱刺塞死喺中間,曼聯輕輕鬆鬆泊大巴,曼聯反擊嘅射門仲多過熱刺,熱刺只能靠零星遠射威脅D.Gea。只要唔畀空間熱刺發揮,熱刺球員自自然然就愈踢愈急,愈踢愈無態。

足總盃
熱刺球員愈踢愈急,愈踢愈無態

所以今場雙方球員嘅集中、入局程度成為分野,上半場曼聯未入局被熱刺壓住嚟打,到中段Dembele犯錯將曼聯帶番入比賽當中;下半場曼聯轉死守,熱刺久攻不下後防線一次唔集中就被曼聯偷雞成功,最後曼聯非常集中泊大巴到完場。

所以曼聯球員可以話贏在「集中」2個字身上。

YOU MAY ALSO LIKE ...