重溫簡淑兒六年進化史 唔敢發誓冇整容:只係妝同角度唔同!
Text-東方新地edit-C Lam photo-東方新地、微博、電視截圖
簡淑兒六年進化史重溫
無綫劇《平安谷之詭谷傳說》, 觀眾口碑出乎意料地好,一班女演員的演出備受讚賞,其中簡淑兒飾演一個天真可愛的小女孩淼淼,不過就有個獸父鄭子誠,仲差啲被侵犯!紥一對孖辮、楚楚可憐的樣子,簡淑兒真係無得輸!
《波士早晨》又見到佢
接住《平安谷》出街的《波士早晨》,男主角方面有黃智賢、洪永城等,吸引力一般;反而女演員陣容更吸引!除了人見人愛的Ali李佳芯、好耐無拍無綫劇的陳慧珊外,觀眾在同一時間又見到簡淑兒!今次簡淑兒飾演一個初級秘書仔,怕怕醜又驚青咁,由佢演繹就適合不過!
簡淑兒:我以前只係黑同肥
講開28歲的簡淑兒,雖然佢出名樣子甜美,但其實整容傳聞由佢16年加入《愛回家之八時入席》出演秘書仔時就傳到㷫烚烚。當時簡淑兒經已反客為主,自post 11年回流前美國留學舊照,自嘲曾經又肥又黑、再自嘲EQ差、話傳媒專揀妝頭出事的相片對比,水蛇春咁長hashtags,曲線自辯係女大十八變唔係整容囉!
真面目判若兩人
對於簡淑兒的變臉疑雲,本刊曾獲得一批2012年香港小姐競選官方照,當年簡淑兒20強不入,一早做咗炮灰。係同屆黃心穎、朱千雪、湯洛雯等太高質,還是簡淑兒方面、細眼、扁鼻實力差太遠?雖然話女大十八變啫,點解事隔多年冇人話心穎BB同千雪BB唔同晒樣嘅?又點解可以變變吓變咗撞埋Baby樣呢?
簡淑兒愈大愈靚
事隔六年,面目全非,愈大愈靚,簡淑兒就曾經解釋係當初官方妝頭出事喎!
簡淑兒進化史
12年:面形尖咗,個鼻直咗,不過本來輪廓仲喺度,當年仲有小小似張慧儀。
13年:明顯下巴更尖,鼻形筆直,對眼都比選港姐時圓咗又深咗。
14年 多咗大眼仔美化對眼,不過明顯雙眼又大又圓,已見腰果眼雛形。
16年:間尺鼻成形、嘴唇突然飽滿,角度突登低抄,其實拍埋一齊邊個係Baby,邊個係簡淑兒已經好難分!
16年:進化成功再加埋全新化妝,簡淑兒連pose表情都有意無意以Baby為藍本,正式變身成為新一代女神。
17 – 18年:新一代女神地位奠定,腰果眼笑臉已成招牌,整體樣貌都無咩改變,最多都係齊陰髮型有時會變吓。
簡淑兒笑自己象腿麒麟臂
簡淑兒今日代表劇集《波士早晨》參與麻雀王比賽,簡淑兒透露接下來會有著泳衣鏡頭,係自己首次在劇集中泳衣上陣!雖然唔算好性感,但自己三年前拍呢套劇時都有一點肉地,笑說如果大家想看麒麟臂、象腿都可以留意一下。
讚江嘉敏演技好又後生
另外唔少人稱簡淑兒為宅男女神,佢搞笑道做呢一行太多女神,係女星就係女神。而最近都有網民將佢同另一女星江嘉敏比較,簡淑兒話自己喺網上都有留意,但就覺得冇咩好比較,但如果自己要揀當然都揀江嘉敏!因為對方靚女、演技又好,最緊要係夠年輕,鍾意佢都好正常!
簡淑兒拒發誓粉碎整容傳聞
人紅是非多,關於簡淑兒整容的傳聞從未間斷,簡淑兒表示呢類型的新聞已經澄清了很多次,再度強調只係妝容與角度問題。雖然自己之前會有介意,但認為唔需要理會其他人的睇法,現時只需做好自己的工作。
被問到會唔會發誓粉碎傳聞,佢就表示拒絕,因為每個人都有唔同要求,唔可能一一滿足,愈係在意就好似會沒完沒了。