想破G.E.M.紀錄 Celine 年尾紅館騷受阻

想破G.E.M.紀錄 Celine 年尾紅館騷受阻

Celine (譚芷昀),今年6月在美國參加才藝節目《全美一叮》後備受關注,日前更成為首位華人參賽者獲評判送出Golden Buzzer。經理人蕭定一隨即公布年尾紅館開演唱會之大計, Celine 誓破已經衝出宇宙的G.E.M.當年以19歲的紀錄,成為最年輕女藝人在紅館開騷!不過想還想,據知申請紅館檔期未獲審批,而且被網民一面倒大潑冷水,命運跟國際G.E.M.如翻版,自命衝出國際,卻不受自己友認同!
Source-東方新地 Photo-新傳媒資料庫、譚芷昀微博、譚芷昀FB、譚芷昀IG

9歲 Celine 技驚四座想破G.E.M.紀錄?!

Celine 6月時以一曲〈My Heart Will Go On〉參加《全美一叮》,技驚四座成為熱話,日前的比賽中在台上表現淡定,跟台下評判對答如流,更識做大讚客席評判Laverne Cox靚女,之後由對方按下Golden Buzzer,直接晉級入半準決賽,淡定Celine立即O嘴當場達兩分鐘。

 Celine,譚芷昀,全美一叮
9歲Celine化妝黐假眼睫毛、身穿John Galliano花裙、Moschino金色外套、腳踏3吋高踭鞋現身祝捷會,變身熟女和經理人蕭定一一起拉金色花球,之後獨自在台上揮手達兩分鐘供傳媒拍照,之後小心翼翼行到台邊由工作人員抱落台。

 Celine,譚芷昀,全美一叮

 Celine,譚芷昀,全美一叮

 Celine,譚芷昀,全美一叮
台下Celine母激動掩嘴落淚,父譚順生興奮企起身大叫。

蕭定一傍實 Celine 老積現身祝捷

成功晉級進入半準決賽,上星期舉行祝捷會,主角Celine一身名牌金光閃閃加一對3吋高踭鞋的熟女打扮現身,全程由蕭定一陪伴做訪問,提到獲評判按下Golden Buzzer時的感受,以大量英文夾雜廣東話回應,事後被網民狂插「JM式英語」、「小童連piece雅」、「好作狀」、「太老積」等一連串負評。

 Celine,譚芷昀,全美一叮
是非多多的父親譚順生冇影,由其母陪伴,出場時,多位工作人員侍候左右,勁大排場。

 Celine,譚芷昀,全美一叮

紅館唔批期

對於蕭定一透露年尾紅館開騷,Celine先望一望身旁的蕭定一,蕭對記者話:「我冇直接同佢講,開演唱會好唔好?」Celine認真思考數秒後答:「未咁快啦!」當事人唔知自己要開演唱會,但其實經理人及譚順生密鑼緊鼓張羅中,只是申請紅館一再受阻,知情人士透露:「蕭定一同Celine爸爸舊年已經度緊想今年喺紅館開演唱會,佢哋一直視G.E.M.為目標,覺得如果成功打破到G.E.M.喺紅館開騷紀錄就好威水,不過依家紅館規例同以前唔同,唔理你咩資歷,如果第一次申請一定唔會批,好似家燕姐咁都攞唔到年尾檔期,於是蕭定一改用慈善騷方式再入紙。」

 Celine,譚芷昀,全美一叮
重提當日奪得Golden Buzzer時,驚訝O嘴達兩分鐘,Celine中英夾雜話:「覺得好shock,唔會expect會happen,好開心,一啲都講唔到嘢,我好lucky,我覺得好似一個miracle,金粉跌落嚟。」

家燕姐:我都申請唔到

Celine紅爆,同時卻爆出其父兼歌唱老師譚順生一大堆是非,不但被爆虛報獎項、博士學歷受質疑,連人緣極好的薛家燕早前都對Celine父親的惡行爆seed,斥責譚順生當年要求佢捧紅,為佢穿針引線到內地參加比賽,後來又自薦在家燕姐開設的藝術中心做導師,家燕姐知人善任一一答應,最後卻被對方撬客,家燕姐指責有人「食碗面反碗底」。
 Celine,譚芷昀,全美一叮

對於Celine有意在紅館開騷,家燕姐接受本刊訪問時有讚冇彈:「我都有留意新聞,開一場唔會有問題嘅,蕭定一話做善事㗎,唔會冇人睇!」記者再問有冇留意佢被批評似唱歌機器冇感情?「我覺得佢把聲靚,咁我做人阿媽,叫我演繹番阿媽角色都冇問題,咁佢得9歲,點會唱到失戀情感?」但一提及譚順生,家燕姐立即封嘴表示「唔想再提呢個人」。
 Celine,譚芷昀,全美一叮

粉絲國際化三語直播吸Like

面對今年紅館夢隨時泡湯,再加上負評連連,無阻Celine在網上吸like之心情,早前在FB和IG同步直播,未知是否被指中英夾雜扮ABC的指控,在直播中三語廣播,以廣東話回應,但幾句過後又轉channel以普通話及英語回答,在直播中又設Q&A環節、估歌仔遊戲、又即場教摺紙。至於經常被指冇童年,被問到暑期活動,佢以廣東話回應:「同妹妹去公園玩。」一曲成名而彈起,港人意見兩極化,在直播中留意畀like佔九成是外國人,來自菲律賓、哥倫比亞、加拿大,卻甚少港人網民。

 Celine,譚芷昀,全美一叮
Celine周一在fb、IG同步開live,不過佔八成都是外國人,本地支持者極少。
 Celine,譚芷昀,全美一叮
幾部電話加電腦,表現hyper,即席獻唱,其妹妹Dion亦加入一起唱埋一份,兩姊妹熟練合唱、表情舞姿如大人,明顯久經訓練。

 Celine,譚芷昀,全美一叮

練兵要緊

經常被指專注比賽,疏忽學業的Celine透露每日練兩三個鐘歌,「視乎爸爸忙唔忙,爸爸練會少少嚴」,而佢平日在fb分享照上,除了勤練歌練琴,就是去化妝扮靚、電髮,打扮熟女。除了勤練歌,為了肢體動作能有助演繹歌曲,被安排跟郭富城御用舞導師學舞,可見其父花盡心思財力捧紅Celine。
 Celine,譚芷昀,全美一叮

 Celine,譚芷昀,全美一叮

Eric Kwok批似機器

雖然得到客席評判Laverne Cox青睞,不過歌唱老師麥潔文亦指其「唱不出感情」,本港著名音樂人Eric Kwok(郭偉亮)批評Celine如「唱歌機器」:「佢技巧係有,但一個年紀咁細嘅女仔,冇任何愛情經歷去唱〈How Am I Supposed to Live Without You〉,我覺得好好笑,但因為佢冇拍拖經歷,畀我嘅感覺係感動唔到人,即係好似一個唱歌好勁嘅唱歌機器、機械人咁,所以話佢係天才,或者佢唱畀佢爸爸、媽媽聽,想同佢哋講『我唔可以冇咗佢哋生存落去!』」
 Celine,譚芷昀,全美一叮

YOU MAY ALSO LIKE ...