何廣沛棄做會計師 捱足5年終於擔正上位

流行娛樂

廣告

在無綫熱播劇《超時空男臣》飾演小 太監 李進忠/小冬的何廣沛(Matthew),演出入屋,好多觀眾話佢公公味濃,佢話多謝大家鍾意進忠/小冬,又話自己個樣溫柔,其實本身已經有公公的特質。唔知大台會唔會想請Matthew做「御用公公」呢?

Text -東方新地 Edit- Cherie Photo – 東方新地 、官方宣傳照 、電視截圖 、何廣沛@IG

何廣沛棄做會計師 擔正《超》劇做 太監

28歲嘅何廣沛 喺2012年加入TVB藝員訓練班,短短5年間由茄喱啡做到第三男主角,認真叻仔。何廣沛喺美國嘅大學修讀會計,但佢放棄做專業會計師,毅然加入娛樂圈。回到2014年,佢仲爭啲成為MK POP跳唱男團「天堂鳥」嘅成員,但大台希望佢專心拍劇,好彩佢最終聽旨決定留低,唔係宜家都唔會晚晚見到佢嘅演出。回想入行初期,Matthew捱過唔少苦頭,佢以最低工資去接拍劇集,甚至畀唔到家用,面對工作及家庭的壓力, 何廣沛總算捱出頭。

 

機會不斷 孖住江嘉敏上位

喺藝訓班畢業冇耐, 何廣沛就畀吳啟華揀中喺《女人俱樂部》飾演佢嘅年輕版,啟華當時仲話:「做我年輕版,當然要揀個最靚仔。」而喺《女人俱樂部》劇中,何廣沛飾演校草得到七位少女嘅仰慕,艷福無邊,而對於新人來說,這演出機會是相當難得。

何廣沛後來拍過不少劇集,在《律政強人》中飾演大狀方中信嘅徒弟仔Nick,戲份甚重;喺《財神駕到》中做有錢仔王招財,劇中就算同好多老前輩交手,佢都表現淡定,逐漸受關注。

之後, 何廣沛喺《親親我好媽》入面做反叛學生哥,同另一位大台靚女新星江嘉敏成為熱捧年輕熒幕情侶,因而成功上位。

青靚白淨似 太監

何廣沛今次在《超時空男臣》中挑戰做不一樣的 太監 ,要宜古宜今,難唔到佢!佢話自己有做公公嘅特質,由細到大都比較似女仔,「唔麻甩、比較姿整」,何廣沛又話:「監製就係睇中我青靚白淨、少少斯文,把聲可以輕柔。」

就算骨子裏似公公,何廣沛仍然深入研究個角色:「我唔會用把好乸嘅聲講對白,觀眾都唔想聽,會覺得好煩;所以待選擇用一個比較輕聲 、溫柔 、斯文啲嘅聲線去演繹呢個角色。」認真做足功課,抵你人氣急升!

文弱書生型嘅何廣沛其實都可以好man,佢話自己喺剛拍完嘅《天命》入面做個man爆正氣二品官,而拍攝中嘅《跳躍生命線》就做麻甩佬,所以希望大家唔好當佢係「御用公公」,知道佢嘅演技範圍可以好大!

關鍵詞
何廣沛