【藍橘子】《 考車 最大敵人,係亂過馬路嘅老人家同的士佬》

熱話

廣告

【藍橘子】《 考車 最大敵人,係亂過馬路嘅老人家同的士佬》

text-藍橘子 photo-電影截圖、Youtube截圖edit:希彤

「搞錯啊~男人梗係學棍波啦!」

「我覺得考第二次已經唔係男人啦!」

「使唔使畀咁多錢去駕駛學院啊?出去搵師傅補多幾堂好過啦。」

每次聽見身邊有朋友話想學車,就一定會好似戒毒中心分享會咁,講自己學車慘痛經歷。

喺香港養部車咁貴,十個有車牌嘅,有九個都係用嚟去旅行時可以自駕遊。

有好多人甚至考完車牌十年都未揸過一次車,不過我好肯定,考車嘅短短十幾分鐘,係一世難忘。

老實講,呢十幾分鐘,係我成世人最守交通規則嘅時間。阿叔我喺《GTA》,

逆線奔馳、鏟上行人路、中途跳車、撞飛警察…連半秒都無考慮過!

考車時只係簡單由小路出大路,我望左望右幾次先夠膽慢慢踩油門駛出去。

回想起我學車經歷,好好彩遇到個好好嘅教車師傅,佢好理解第一次揸車嘅人有幾緊張。

「慢慢定啲嚟~撞車我一定會剎停你,況且有咩事都係我賠錢啫,你唔好撞到人就OK啦。」呢句說話師傅幾乎每次學車都會同我講。

網絡有條學車短片,成條片就係個師傅不停用流利嘅粗口鬧個學生,有好多網民都話個師傅鬧得好正,更加表揚佢呢種做法,話唔好畀啲唔識揸車嘅人危害馬路安全。

我好想知呢班人係咪被虐待狂,有冇諗過自己學車時,全程畀人鬧係咩感覺,會愈被人鬧就愈興奮,學車精神啲?

其實我個人覺得,用「鬧」呢個方式對成件事冇咩幫助,你鬧到我隻狗咁,我個人又緊張,更加記唔入腦。就算師傅點教都唔識,考車自然會唔合格,唔會有機會出到馬路害人。

考車最大嘅敵人,就係亂過馬路嘅老人家,同埋的士佬…

有好多老人家以為自己健步如飛,但行路慢過蝸牛,仲會喺暗角位突然竄出嚟橫過馬路。當你緊張急停,考試就好大機會肥佬…

另外,有好多黑心的士佬專登玩你,見你揸慢少少就不停響號「呠呠呠」到你手都震埋。又或者佢會突然切線去你前面,然後再急停。

我考車時就遇到呢一種,個的士佬唔知係咪食飽飯無屎屙,全程都跟實我。一開始喺紅綠燈位猛咁「呠」我。(考過車都知,開車前又要望來望去先可以開車,點會咁快呢)

然後,個的士佬爬咗我頭,就不停喺我面前急剎車,好似誓要玩死我咁。

好彩,個考官好好人,同我講:「放心,係佢唔啱,你慢慢揸。」最後,我都順利一次搞掂。

結論,考車要合格其實唔係你揸得有幾好,而係你夠好彩,遇到一個好嘅教車師傅同考官。

 

內容延讀:
【藍橘子】《去婚紗展就見識到咩叫神級推銷》
>>> LIKE我們fb <<<
fb.com/newmonday.com.hk

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!