成份人工俾晒老婆 張穎康 每日只用$100

流行娛樂

廣告

日前 張穎康 同太太麥雅緻(Angie)一齊出席商場活動,被問到酬勞是否很豐厚時,他自爆其實唔知自己搵幾多,因為全部交晒俾老婆,老婆就會準備晒飯盒同入油,每日都會俾返$100零用錢佢,仲笑言有時放工想買支酒飲,都要儲兩日先得。Angie就反駁話唔想佢用晒啲錢嚟買酒!

text-Sunday Kiss photo-Sunday Kiss,新傳媒資料室

成份人工俾晒老婆 張穎康 每日只用$100

大部分網民都大讚 張頴康 係好男人,又讚Angie持家有道!不過都有人話「咁大個人,$100點用啊?」

其他網民留言:

「有女人管住財務,咁樣先可以儲更多錢,令將來衣食無憂! 同埋男人有錢就身痕,所以金錢配給係一件好事!」

「好男人不須用錢來行量的,就算比晒啲錢妳,對妳唔好又係無用,有錢都唔開心喇,只須他對妳好以足夠了。」

「唔係俾晒啲錢老婆就係好男人嘅!」

「唔使理人啦!啲人葡萄咋嘛!」

麥雅緻將頭家打理得妥妥當當

雖然阿康好似有投訴咁,但其實佢好感激太太將頭家照顧得妥妥當當!早前阿康被網民大讚顧家好男人時,他坦言自己顧家是因為老婆好,「唔係一個男人想顧家就顧家,都要老婆照顧得個家庭好,個女又聽話。」Angie又幫老公準備飯盒,又安排好家中的大小事務,連架車入油都係佢負責,令老公可以放心追夢!

夫妻吵架 邊個讓步?

活動中,佢仲分享同老婆嗌交時解決方法,就係大家拗到幾面紅耳熱都千萬唔好講分手同離婚!因為當嗌交時大家都堅持自己是正確的,冷靜後就容易解決得多,而麥雅緻就sweet爆話:「咁通常都係老公讓步嘅。佢講句sorry啦,唔好嬲啦,講一句大家好快就冇嘢。」

享受做住家男

阿康日日歸心似箭,享受做住家男,假日必定一家三口出動,經常被讚廿四孝老公、好男人典範。「都要成個家庭感覺好,大家鍾意一齊去玩,一齊過啲簡單生活, 好似買餸返屋企食飯、睇電視,成家人都鍾意過呢種生活先會令男人有顧家嘅感覺。如果個老婆成日出去玩,你都冇得顧家啦。」阿康與Angie不追求大富大 貴,拍拖行公園、一家三口行街已經好開心,「我哋知足,好易開心,我又唔係後生仔鍾意出去玩,所以就覺得我顧家啦。」

張頴康 麥雅緻 10條夫妻恩愛宣言

麥雅緻篇

1 老公好man

「佢係一個好man嘅人,對於一啲唔公平嘅事會好打不平,我覺得呢樣嘢好好。」

2 老公愛屋及烏

「佢好顧家好錫屋企,唔單止錫我同個女,連隻狗都好錫,對我屋企人又好,尊重我之餘,仲尊重埋我朋友同屋企人。愛屋及烏好緊要,唔會咁易有磨擦。」

3 工作態度認真

「我欣賞佢做嘢態度好認真、好勤力,我係真心佩服,佢會花好多間為工作做好準備。兩個人相處除咗相愛之外,仲可以令我敬佩佢,好鍾意佢有呢種態度同恆心。」

4 老公好幽默

「唔使講佢係好有幽默感,我嘅笑點又低,好容易氹,所以佢講嘢可以氹得我好開心,令我哋相處有好多趣事。」

5 真心緊張老婆

「佢好緊張我,我知道嗰種緊張係從心而發,好似我出街買嘢,佢會提我小心揸車,咁多年都仲會講;夜晚去跑步,佢又提我小心過馬路,唔好掛住聽歌。呢啲生活細微嘢唔係咩大事,但日積月累知道佢心底裏好緊張我,扮都扮唔到。」

張頴康篇

好正呀

「我哋十年前訓練班識,好似喺台慶或歡樂滿東華跳舞表演中,有日於排舞室外走廊同佢迎面擦身而過,見一個女仔冇化妝,嘩好正呀!我即刻問訓練班同學仔佢係邊個,先知佢係做娛樂直播,之後用網上通訊聊天工具add佢做朋友,上網聊天慢慢認識。」

太太係好女人

「因為我想早啲過簡單家庭生活,好早認定麥雅緻係我呢世冇可能再搵到咁好嘅女人,所以我膽粗粗向佢求婚,而佢又膽粗粗唔怕死嫁俾我,所以就變成個家庭。」

太太叻又靚

「老婆叻又靚,娶到佢直頭自豪啦!邊有可能搵到個咁靚咁叻嘅女人,所以點解要結婚,係唔可以放過咁好嘅女人!我老婆又叻又靚女又知慳識儉又幫我管理財務,呢類女人真係好難搵!」

怕老婆係啱

「怕老婆會發展得好係啱嘅,其實唔係怕,係尊重,咁太太叻啲指引條路你行,跟住行自然發展得好啲快啲,否則亂衝亂撞發展得差啲!若有朝一日我發達,就可以印證呢句說話!」

愛太太一生一世

「結婚當日真係好緊張,眼淚不期然流下來,因為覺得終於搵到個陪你一生一世嘅人,你會好感恩好感動,所以自然有眼淚流出來。」
內容延讀:
【鄺俊宇 有一種幸福叫忘記】陪你療傷的人
>>LIKE我們fb<<<
www.facebook.com/newmonday.com.hk