【三聯幫牟中三】金莎藍罐嘉頓餅　拜年禮盒演化史

嘉頓家庭什餅最早出現香港，幾十年前已經係本地送禮之選，有情懷有故事，係好多星斗市民嘅兒時回憶。藍罐大概80年代打入香港市場，丹麥牌子丹麥設廠，仲係09年攞到代表為丹麥皇室供貨嘅認證。意大利嘅金莎則係90年代興起，入市最遲但火速成為後起之秀，同嘉頓、藍罐三分天下。

到咗今時今日，金莎同藍罐已成為拜年禮盒之中嘅中庸之道，始終來路貨比較攞得出手，即使食咗廿幾年收到都唔會話特別開心或者唔開心，但自用或者轉送都可以，絕對係一份進可攻退可守嘅禮盒。相反，嘉頓擺脫唔到草根、土炮嘅形象，多年來堅持大大個鐵罐，捨棄送禮嘅虛榮感，講真幾十蚊咁X大盒餅，仲要咩味都有啲，做生意嚟講都算得良心啦。但係窮人恩物嘅形象深入民心，無論送或者收都硬係好似接濟緊獨居老人咁，個罐仲要寫住「家庭什餅」，「什」？什麼「什」呀？好似佢自己都好疑惑咁樣，喺呢個多數人都唔識中文嘅年代真係冇乜著數。

廿年前三分天下嘅形勢不斷改變，隨住時代變遷，越來越多更加高級嘅選擇出現，日本貨充斥市場，外國貴價朱古力大行其道，本來咁多年嚟以金莎、藍罐為上，嘉頓為中嘅版圖不斷變動。當金莎同藍罐都變成入門級保本之選時，家庭什餅已經要轉打低階市場，不過，低階市場亦都風起雲湧。

自從金莎同藍罐打開咗過年送禮充大頭嘅市場，好多抄襲品順應而生，外型似足九成，但味道基本係一個大伏嘅假金莎、假藍罐、假嘉頓大為泛濫，新年前行轉百佳惠康都可以見到成架一樣樣但原來分成十幾隻牌子嘅貨品，仿冒品價錢比原版平一大截，令到三巨頭面對競爭更加激烈。當你以為拜年之時攻防戰已經難打，原來超級市場入面更加係戰國時代。

今時今日親朋之間拜年嘅攻防戰難度越嚟越高，想得體唔失禮又唔想中伏簡直難比登天，當你聽到包裝紙入面傳出「噹噹」聲，諗住哎呀，送金莎點知換來一盒乾爭爭嘅嘉頓餅，不過算啦，威化餅都幾好食。唔好意思，你收到嘅其實係中國出產嘅「家人雜餅」。

什－以十為單位的古漢語，什物可指物件數量種類多的意思，好地地嘅什餅變雜餅，然後你先發現，原來見到繁體字都一樣可以令人新年流流想講粗口。

內容延讀：

三聯幫牟中三專欄（一）！　《原來波鞋街術語竟然同天地會有關？》

三聯幫牟中三專欄（二）！《如果我是陳奕迅，為何一點也不快樂》

>>> LIKE我們fb <<<
www.facebook.com/newmonday.com.hk