【音樂專訪】GDJYB：從地下走到地上 我哋都係雞蛋蒸肉餅 ！
text: lai photo: wing location: Mini-O 小圈子
雞蛋蒸肉餅＝GDJYB
雞蛋蒸肉餅，簡稱GDJYB，成軍於2012年。四個女生，原本各自夾band或solo，後來主音Soft及鼓手HeiHei先組成最初樣的GDJYB，後來又經朋友介紹加入結他手 Soni及 bass手 YY，組成眼前及為歌迷熟悉的雞蛋蒸肉餅。團名源自愛美食的Soft，亦是Soft媽媽的拿手菜式。HeiHei笑言：「當初想叫咸魚蒸肉餅，不過咸旦無益，菜式又普通，所以改成『雞蛋蒸肉餅』，比較特別。」
百分百香港製造
雞蛋蒸肉餅名符其實，家常小菜，非常「香港地」。Soft除了是樂隊主音，曲、詞都是她包辦，喜歡將日常生活、社會發生的大小事入歌。從歌曲故事講及雨傘運動時的社會現象《榴槤乜乜乜》、反映雙非問題的《Double No No》，到以Honglish為創作語言，甚至最近以咸魚作MV主角的《That Day I Went To His Funeral》，少點香港靈魂都難以理解，但她們卻樂於做百分百「陀地」，以音樂紀錄此時、此刻。
自己標籤自己
雞蛋蒸肉餅就連曲風，都拿捏了港人性格。自稱走「Math-Folk」路線，結合了「Math－ rock」與「Folk」。Soft坦言：「香港人好鍾意標籤人，與其被別人亂標籤，不如我哋自己先標籤自己。」正因如此，雞蛋蒸肉餅的音樂更是只此一家，別無分號。結他手Soni 說：「好難界定我哋嘅音樂有幾多percent係folk，幾多percent係rock，真係咩都有啲。」聽過雞蛋蒸肉餅的歌都知道，她們的音樂編曲複雜卻不嘈雜，清新流暢卻又不矯揉造作，氣氛一致而不單調。 難怪曾被《Time Out Hong Kong Magazine》選為城中23 New Rising Stars其中之一，2014年推出的EP更被音樂網站Bitetone選為32張推薦中港台唱片之一。
從地下走到地上
「出道」四年，由獨立樂隊開始，到現在簽了唱片公司 － 紅線音樂，與觸執毛 (Chochukmo) 及Supper Moment 份屬同門。不但多了外地音樂節邀約，更與愈來愈多品牌合作，不少人如筆者一樣，見過太多老生常談的變質樂隊，作為當中主角又擔心別人會投訴樂隊變得商業化而被歌迷唾棄嗎？「如果因為我哋簽咗唱片公司而唔再鍾意我哋，係佢變咗，唔係我哋變咗！我哋嘅音樂始終如一，無變過！」的確，最新推出的大碟《23:59 BEFORE TOMORROW》由概念到設計、包裝（！），依然像當初做獨立樂團一樣，一手一腳自己做。問她們真的沒甚麼分別嗎？「有呀！以前我哋互相得對方，而家多咗好多大哥哥 （指觸執毛 及Supper Moment）照顧我哋！有咩音樂上或技巧上嘅嘢唔明，佢哋都好樂意去教、去分享，感覺多咗好多屋企人。」
變幻才是永恆
成團四年，從地下走到地上，距離第一張同名EP相隔兩年，今年年尾終於推出大碟《23:59 BEFORE TOMORROW》，同時與JOOX 合作，同日舉行發佈音樂會。大碟概念來自「限期」，以23:59每日最後的一分鐘說「deadline」。「今年得與失同樣多。雖然加入了紅線音樂這個大家庭，卻又失去了Gary這位伯樂 (紅線音樂創辦人，於今年年中病逝）。四個人去咗很多海外不同的音樂節，但YY在今次音樂會以後就正式退團。做人嘅野，永遠唔知幾時係『最後』。珍惜當下，有咩事想做一定要即刻去做。」本來是首個大型自家音樂會，卻變成四人同場的最後一次，世事永遠離奇又吊詭。
首個大型音樂會，當然要隆而重之，結合音樂與影像，採用故事形式執行。未知四人元祖組合後會何期，她們異口同聲提醒大家不但要準時入場，更要留守到最尾。HeiHei大賣關子：「今次我哋嘅特別嘉賓好『特別』，而且會在開場頭幾分鐘演出， 大家遲到就走寶。尾聲時，YY亦會在台上交代退團的事。」據聞樂隊更打算在開場前與歌迷大玩 time capsule，希望大家寫下片言隻語，留言給三年後的自己。「三年後我哋開箱，睇下大家有無盡力做好今天對自己許下嘅承諾。」從初次到最後，再展望將來，生命原本就是一場開始與結束、再開始的輪迴，今天你過得好了嗎？
JOOX presents
Show Timable x GDJYB 雞蛋蒸肉餅 -23:59 Before Tomorrow- CD 發佈音樂會
日期 ：17/12/2016 (Sat)
時間：8pm
地點：九龍灣國際展貿中心 Music Zone
票價： $260 (預售）／$330 （音樂會連CD組合）／ $300 （即場）
獨家網上購票 ： http://timable.com/event/1299167
實體票地點 : Zoo records （旺角彌敦道608號總統商業大廈）／ White Noise Records （上海街720號1/F）
