合則去,不合則來……

Blogger

廣告

Trend’s Like Wind】小女在多年前認識了1位跟自己非常相似的男性朋友,我倆無論在性格、行為、思想、習慣、喜好、生活方式,甚至工作性質上也很相似,似到好像在世上竟然找到另1個杜如風一樣,十分恐怖!!

起初認識時,大家都以為互相有發展的空間,於是我們便每日都在聊天,認識得愈深,心就愈寒:「嘩!乜你又係呀?好邪呀!」這句說話經常出現在我倆的對話中,當時雙方都以為緣分已至!我倆都屬粗枝大葉、不拘小節的人,家裏都像亂葬崗一樣,經常找不到東西、找不到又再買過,結果end up家裏存了很多一模一樣的廢物!試過有1次,他跟朋友在半夜去食糖水,小女問他:「你叫咗咩嘢糖水食呀?吖!你都係唔好講住,等我估下!」「好呀!」「係白果腐竹糖水,呀,重要加隻雞蛋添!」他登時呆了,立即影低放在他身前的白果腐竹糖水加雞蛋,然後立即發相給我看:「你好恐怖呀!成間糖水店有至少幾十款糖水,你咁都噏得中?重要連另加雞蛋你都估中?好驚呀!」「唔使驚住,你叫嗰隻雞蛋係將佢打散成蛋花伴糖水咁食嘅,唔係成隻食嘅,中唔中呀?」他又連隨發了1張蛋花四散在腐竹糖水上的相片給我看:「Bingo!全中!可怕呢?」「非常!你點會估到㗎?」「其實好簡單之嘛!我只係喺度點緊我平時會食嘅糖水之嘛!點知中到咁嘅地步!哈哈!」連我倆的common friends也很替我們高興:「你兩個夾成咁,唔拍拖嘥晒!」可惜我倆的工作量都太大,雙方在港時間都很少,單靠1個電話來溝通!

當時我的姊妹好友們都為我這段「奇緣」而很着急:「點啫?一齊未啫?你兩個咁鬼死似!」「唉……我覺得我哋愈嚟愈似好朋友多過1對情人喇!可能就係因為太似,所以先唔work!1對情侶應該係一凹一凸、互補不足㗎嘛,但係我哋就樣樣嘢都一樣嘅,性格同樣火爆,我諗呀,鬧起交上嚟呀,拆屋都似!重有呀,同佢出街食飯,嗌啲嘢食全部都一樣嘅,想食多款餸都冇!所以我哋兩個都覺得唔係好work……既然呢個世界已經有1個我,做乜重要搵多個呢?我哋都一致覺得做friends啱啲!」

之後,我跟另1位男子拍拖了(但那個他依然是我的好友!)這「另1位男子」和我完全不相似,哼,但卻反而夾得來喎!他是個很有條理、很講道理的人,亦生活得很有規律,基本上,在很多方面,我們都是相反的,但竟然這樣的相處,才覺得舒服。自己是個大情大性,毫無條理,又容易發脾氣的人,吖!竟然被1個「道理王」慢條斯理地說道治到,哼!勁!好嘢!

原來,真的是一物治一物,同類的治不到,不同類的反而做到!所以小女認為:「合則去,不合則來……才對!」

text-杜如風