獨家訪 台灣最索鐵人 王麗雅

女生

廣告

跑步運動喺香港大熱,喺台灣更加熱上加熱,台灣人形容呢幾年係「全民瘋路跑」,已非正式被列入為國民運動,無論係普羅大眾或名人都加入喪跑行列,有唔少台灣人更以長跑嚟跑出人生谷底,好似之前我哋訪問過嘅潮人歐陽靖就係其中之一。今期我哋再次飛過台灣,同超模鐵人 王麗雅 (Liya)作獨家專訪,佢都係藉跑步走出人生谷底。

王麗雅 喺兩年前因婚姻失敗而陷入人生低潮,就喺呢個時佢候認識咗一班跑友,叫佢以跑步減壓,點知一跑不能自拔,由最初400米都跑唔到,去到年半內可以完成40多公里嘅全馬,重玩埋三項鐵人,目前為止已參加過大大小小20個跑步及鐵人賽。

跑步對麗雅嚟講,係恩賜,亦係奇跡。

text-Jessie interview-Eve Yang photo-劉智遠、由王麗雅及伊林娛樂提供 design-ran

王麗雅 profile

台灣超模,身高178cm,因為皮膚黝黑而有「黑珍珠」之稱。05年曾獲精英國際模特兒冠軍。09年12月同拍拖唔夠1年嘅上海公關公司老闆林先生閃婚,喺12年閃電離婚。隨後繼續專注事業,同時間愛上跑步,2013年10月喺舊金山參加人生第1場半馬,同年12月喺夏威夷參加第1場全馬。

 

激出興趣

麗雅身材高䠷,加上古銅色皮膚,好多人以為佢由細到大都係運動健將。「其實我以前好少做運動,間中做gym,只係為應付工作需求。跑步更加係排斥,因為讀書時跑步就係老師用嚟體罰學生嘅,我好唔鍾意。」

兩年前,麗雅因離婚進入人生低潮,每晚去夜店以飲酒麻醉自己。「因緣際會識咗班鍾意運動嘅朋友,有日佢哋討論去過邊度跑馬拉松,我覺得點解我咁討厭嘅事,佢哋講得咁開心?我開始好奇話要跟埋去,有次佢哋隨口講句:『聽朝6點我哋會去跑步,你起唔到身㗎喇!』我梗唔服輸啦!可以話我係被朋友激出對跑步嘅興趣。」

處女全馬好痛苦

麗雅喺2013年5月開始積極參加路跑活動,佢第1次正式參加21k半馬係同年10月嘅「NIKE舊金山女子馬拉松」,嗰次令佢更肯定自己對跑步嘅熱愛。

舊金山半馬之後,麗雅個心好「雄」,即時報全馬。「嗰時好傻,覺得跑完舊金山半馬,返到台北再跑多兩個半馬,3個加埋就超過1個全馬,夠晒訓練啦!於是舊年12月就參加『夏威夷檀香山馬拉松』42k全馬。馬拉松好誠實,我訓練不足,一開始身體已經負荷唔到,加上可能每次做完運動拉筋做唔夠,令我成日着高踭鞋嘅腳踭肌肉過度僵硬,跑起嚟每步都好痛苦。」

移動式冥想

運動除咗改變咗佢同屋企人嘅關係,重令麗雅學識點樣同自己相處。「以前我好怕寂寞,經常搵朋友去玩,因為心靈空虛,唔知自已想點。而正如有人話跑步係移動式冥想,喺過程中,不管係調整呼吸、跑姿,或者係自我審視,都令我更知道點樣好好對待自己。

呢位黑珍珠又會唔會嚟香港跑渣馬?「我幾乎每年都會因工作或shopping去香港,未來都有計劃參加渣馬。我曾經喺台灣嘅路跑活動遇到香港跑者,佢哋都有經驗又跑得快,所以都好希望有機會可以喺香港同佢哋一齊跑,遲早都總有呢個機會嘅。」

王麗雅相關影片:

我哋今次獨家專訪所拍製嘅影片。

http://www.youtube.com/watch?v=0yledKwaBIM

呢條係麗雅最近幫個台灣媒體拍攝的挑選運動內衣教學片段。

http://www.youtube.com/watch?v=5usHdHbEvg4