竟然叫你唔好換機?記者專業試iPhone 6s 2大功能 舊殼未必用得番

每年iPhone出新機都係行內大件事,跟傳聞、追新料、睇直播,完事後又要繼續關注炒價同發售日。同大家講定先,未來最少1個月,你都少不免會聽到「iPhone 6s」呢個名,悶都冇計!6s最先注目嘅係新色Rose Gold到底係咪粉紅?答案係,其實真機並非想像中咁pink,叫Rose Gold有原因,「pink友」係用粉紅色機殼頂住先。機就聽日出,但可以動手玩嘅iPhone 6s,已經由Apple官方交到咗記者手上,不過唔係Rose Gold而係土豪金,點解呢?可能係唔想Rose Gold搶眼過頭掛?皆因部機睇落只屬小改,原來實際用落先知分別,老土一句,講外表不如講內涵。諗真啲,Apple嘢向來講細節同操作體驗,講規格?講性價比?咪玩啦!

text-Nam photo-Nam

iPhone 6s
重量:143g 尺寸:138.3×67.1×7.1mm
晶片:64-bit A9 屏幕:4.7寸1,334×750像素326ppi
鏡頭:1,200萬像素 f/2.2光圈iSight、光學影像防震、Turn Tone閃燈、63M像素全景相
前鏡頭:5M像素、f/2.2光圈、Retina閃光燈、720p HD影片攝錄攝錄:4K攝錄(30fps)、HD攝錄(60fps)、慢動作攝錄(240fps)
售價:$5,588(16GB)、$6,388(64GB)、$7,188(128GB)

3D Touch 立體操作
Gestures、Multi-Touch之後,Apple又再次示範手勢操作嘅可能性。Apple Watch初推出時,科技玩家對其Force Touch最為好奇,唔少用家甚至未能摸清Force Touch用途,但由此演變出嚟嘅3D Touch已經加入到6s之中。3D Touch技術嘅3D,唔止代表立體操作,亦似乎同樣反映佢擁有3重壓力感應。6s會自動感應用家嘅按壓力度,而衍生出唔同嘅hot keys功能,例如,當你手指用力撳落「相機」icon,你可即時選擇你想影相、自拍定拍片等,用作check郵件時就更加方便,唔止每封郵件都可輕按預覽、重按開啟,輕按嘅同時更可做拉向左、右及上,進行唔同嘅進階操作。Apple將此功能名為Peek與Pop。新手可能會誤解3D Touch使用會非常繁複,實際上憑住超勁嘅Taptic Engine,所有嘅按壓,你都可以feel到部機會俾你有唔同嘅回震反應,唔使半日其實已經知晒撳芒嘅力度,好易上手。

用3D Touch睇email固然方便,更重要係好玩。做記者日收半百新聞信,以往多數只讀不回,但轉機後可能會回多咗。PR們,請多謝Apple。
用3D Touch睇e-mail固然方便,更重要係好玩。做記者日收半百新聞稿,以往多數只讀不回,但轉機後可能會回多咗。PR們,請多謝Apple。

Live Photos及4K拍攝
iPhone鏡頭iSight今代終於進化,由800萬像素一躍成1,200萬。對其他手電嚟講,1,200萬像素似乎仍只屬中階規格,偏偏iSight早就所向無敵,升級只係錦上添花,何況新鏡頭已支援4K拍片,更可怕至能隨時喺睇片中途,用兩隻手指對影像任意進行流暢嘅放大縮小。自iOS 9後,iPhone刻意將所有自拍照分類成「Selfie」文件夾,結果6s亦加入利用Retina屏幕替selfie補光嘅Retina Flash功能,用前鏡自拍時,螢幕會變成全白光,影落就似有打燈效果,一於以用行動回應全民自拍熱潮。講到尾,要提嘅係一樣未來趨勢Live Photos,要拍攝Live Photos,只需如平常拍照一樣按下快門按鈕,無論係iSight定FaceTime HD鏡頭都用到,每次影相,佢都會自動記錄低影相前後幾秒間嘅影像,影完後,撳落Live Photos嘅任何一處,即可令相片變成短片,效果非常有趣。一隻手掌拍唔響,直到facebook及Instagram亦全面支援,改朝換代就係時候。

iphone6s_103
無論Live Photos定4K,都難以用相片說明,鏡頭有咁強升級,近睇亦同上代冇分別。另外,功能多咗,但用落又好似快咗?Apple最新64-bit A9處理器功不可沒,連Touch ID解lock都冇再窒機。

溫提:舊殼未必用得番
外國有一早攞咗機嘅VIP傳媒表示,其實iPhone 6同6s嘅尺寸分別不大,所以舊嘅iPhone 6殼可以用番唔會浪費。於是,記者攞機後即時喺附近腦場,買咗個價值近$200嘅有牌子透明殼測試,結果強行用的確係入到位,但窿位就唔多準。最慘係唔易拆番出嚟。所以要注意部分較為貼身,或市面上流行嘅硬身防撞殼同防水殼,其實都極大可能裝咗但唔fit,好易出問題,既然都買得新機,買個新殼唔好慳,慳少少錢而整花咗,重唔開心。

有圖有真相,明顯見到舊機殼裝上新機後,喇叭窿位會唔啱,其他功能係就係用得返,掣位亦fit,但用得iPhone都係有要求,sorry接受唔到。
有圖有真相,明顯見到舊機殼裝上新機後,喇叭窿位會唔啱,其他功能係就係用得番,掣位亦fit,但用得iPhone都係有要求,sorry接受唔到。
後來重發現拆唔到(太啱位),要夾硬整爛完搞得掂。
後來重發現拆唔到(太啱位),要夾硬整爛完搞得掂。
 短期未必有啱心水case推出,一如以往我嘅推薦,新機可以買返Apple原廠殼,今次新色質料仍然屬上上之選,四邊包晒夠保護力,冇失手。

短期未必有啱心水case推出,一如以往我嘅推薦,新機可以買番Apple原廠殼,今次新色質料仍然屬上上之選,四邊包晒夠保護力,冇失手。

YOU MAY ALSO LIKE ...

There are 2 comments

Add yours

Comments are closed.