等埋「法」哥先! 3大週末市集 過百港、台、法檔仔買窮你

等埋「法」哥先! 3大週末市集 過百港、台、法檔仔買窮你

Yeahhh~~又到每個星期小編最期待嘅活動喇!今個六、日有3大週末市集推介俾大家,地點分別位於港、九同新界,全港覆蓋晒,咁似電訊商廣告嘅喂!?

先有由Triple Square舉辦嘅「麥田捕手•假日市集」,超過160檔本地同台灣嘅攤位,以展出及售賣自家製嘅手創作品為主,當中包括首次參與市集嘅著名台灣插畫家爵爵同貓叔(《爵爵港不停》作者),呢陣文青台風我諗我好繁忙都市人都想去感受下。本地薑則有原創品牌《Chocolate Rain》,佢啲百家布產品手工靚到真係認第2都冇人再敢認「第2」呀,第1更加冇啦^^重有不計其數嘅品牌俾你發掘。

第2個又咩料呢喂?哦~~今個週末除咗可以去淺水湾the pulse享受陽光與海灘之餘,亦同時能體驗別樹一格嘅地攤購物樂趣!雲集香港本地設計師心血嘅「週末衣櫥」,堪稱香港版Brick Lane嘅Vintage Market,係由一班本地時裝達人及設計師發起,集合香港最受歡迎嘅IG 店,以推廣原創及支持本地設計為宗旨。無論你行開清新文藝style、定係玩layers行浮誇路線,抑或日本簡約風,你喺「週末衣櫥」都可以買到嘢!

第3個位於調景嶺,咪以為好遠,查實喺調景嶺站一出就到,方便!市集名叫《Instamarket》,以 Instagram 為主題嘅市集,結聚所有具潛力 Igshops 及 designers,將佢地由網上帶到地面。除一般本地手作品小店外,市集內重有一間專賣法國小物嘅小店Joyeuserie,好「磅梳」啊~~呢個「法」哥一定要等!

YOU MAY ALSO LIKE ...

There is 1 comment

Add yours

Comments are closed.