聽完歌再想知多啲? 完全解讀Juno〈雷克雅未克〉10件事

音樂

廣告

當大家仍念念不忘〈羅生門〉嘅故事,究竟個男仔可唔可以「下個一月 願如期團聚於 冰島某地方」?嗰頭Juno已經推出〈 雷克雅未克 〉,重同周國賢嘅〈目黑〉男主角一齊出現,交換悲情心得!先前相信唔少讀者都好似筆者咁,以為〈 雷克雅未克 〉純粹係〈羅生門〉三部曲嘅番外篇(定重有嚟?)其實除咗冰島係〈雷〉嘅歌曲背景之外,喺冰島首都雷克雅未克重可以搵到好多Juno舊歌嘅影子㗎!喺繼續投入Juno同周國賢悲情嘅感情世界之前,先睇以下「 雷克雅未克 10件事你要知」,配埋新歌聽,等你即時feel到晒Juno嘅10年男仔音樂感情氣氛

text-Oscar

先睇〈 雷克雅未克 〉full version歌詞:

還請你兌現約定 飛到為我破冰
置身冰島名勝 殺不死依存症
前塵埋沒那段情 約誓殘念卻沒有清
而你有講過 來年再續舊場景

冒雪獨自踏故城 北歐式配樂 靈動而冷靜
潛入我隨身聽 藍鯨在旋律間低唱遺孤的心聲
相比這市面 緩慢而潔凈
徬徨路人像我 攜同不必的感性

北極裡有一束光 你話留來伴我望
我若覺得絕望 想到亦會全釋放
這綠裡透紫的光 從未天際怒放
好比原來一起能到達的遠方 而未同往
冰川未訪 火山未闖

還是我自困空想之中 未熄的熱情用十年來放送
彷彿一眼熱泉湧進 寒冷冰窖中

炎涼大戰中 誰夠耐性便勝利冰封舊情再解凍
或者失約 一早已在你 預備中
堅守冰島只是我 未望通
根本不是天下情人都求重逢 重溫美夢
情人都求重逢 重修破洞
如情人都能重逢 情歌少很多精彩內容
來踏步空 早些心死早上進
念念的 失約以後 我便我便放鬆
讓掛念葬在最深白雪中

北極裡有一束光 你話留來伴我望
我若覺得絕望 想到亦會全釋放
這綠裡透紫的光 從未天際怒放
好比原來一起能到達的遠方 而未同往
冰川未訪 火山未闖

或我自負又氣盛 冰島的約會純屬場錯認
從沒有留心聽 情人話重返的都市無端改了姓

終不可碰面 無謂來怨命
從來並無洞察 旁人心底的本領

請你兌現約定 飛到伴我看星
往昔福島名勝 破損中顯神聖
誰人能為昨日情 過十年後再度遠征
時間廢墟裡 尋那不經污染相戀的鐵証

1. 矇矓都市
雷克雅未克被稱為「矇矓都市」,因為呢個城市地熱能源非常豐富,係歐洲最出名嘅溫泉勝地。正因為有好多溫泉,水氣令城市上空經常出現層層霧霞,所以「 雷克雅未克 」嘅冰島語就有「冒煙灣岸」嘅意思,又幾貼切Juno嘅〈朦〉喎!

 

2. 吃鯨魚的人(潛入我隨身聽 藍鯨在旋律間低唱遺孤的心聲,〈雷〉歌詞)
去到 雷克雅未克 有啲餓,你唔會買到巨無霸嚟醫肚,因為自2009年起,冰島全國3間麥當勞分店(其實都係集中喺雷克雅未克 )因成本太高而結業;呢度亦搵唔到Starbucks同7-Eleven。想醫肚,可以試下鯨魚肉。 歌詞都提到「潛入我隨身聽 藍鯨在旋律間低唱遺孤的心聲」,因為呢度係少數合法捕獵同進食鯨魚嘅國家,大家可以放心,因政府規定只可以捕捉非瀕臨絕種嘅品種,所以都可以安心進食。有人話鯨魚肉口感好似牛扒……咪住先,Juno咪重有首歌叫〈吃鯨魚的人〉囉!

 

3. 全世界最乾淨(尋那不經污染相戀的鐵證,〈雷〉歌詞)
〈 雷克雅未克 〉裏面有句歌詞:「尋那不經污染相戀的鐵證」,事實上,雷克雅未克係全球最北首都,當你以為當地人會燒媒炭取暖,會令空氣同環境好污糟;啱啱相反,呢個城市單靠地熱取能,係全世界空氣同環境最乾淨、不經污染嘅地市!

 

4. 馳名溫泉
順理成章, 雷克雅未克 最出名係浸溫泉,當中又一定首選Blue Lagoon,呢個離 雷克雅未克 市中心約40分鐘車程嘅溫泉度假區,雖然呢個係地熱發電廠排出嘅廢水形成嘅溫泉,但經過過濾之後,水中含有嘅礦物質被醫學家認為具保健作用,而且喺美景下享受露天溫泉後,重可以享用埋桑拿、spa、餐廳等設施,咁先係享受人生!唔鍾意人造溫泉,可以問下當地人邊度有天然溫泉,佢哋可能會答你:「我屋企後園咪有個!」唔通「10年男仔」想同戀人浸溫泉復合?定係佢自己1個浸治情傷?

 

5. 冰島最暖
雷克雅未克 係冰島其中1個較暖嘅地方,雖然位處北極圈邊緣,但7月普遍都有攝氏14、15度;冬天亦未算好凍,一般都係攝氏零下2、3度。正因為咁暖,好易令人有錯覺:冰島唔係咁凍啫!如果要去冰島其他市鎮(特別係北方),一定要帶多啲保暖衣物,事關遇上暴風,氣溫會跌到得零下20度!最凍國度嘅最暖地方,係咪講緊「10年男仔」喺黑暗心情中抱有一絲希望?

6. 飛行時間:17個鐘
話明係「避世勝地」,當然冇咁易去到啦!香港暫冇直航飛 雷克雅未克 ,最快捷嘅方法,係先飛倫敦再轉機去雷克雅未克,唔講機票價錢,剩係飛行時間加埋都用咗你近17個鐘……遠成咁,唔怪得個女仔話寧願去福島……

 

7. 必遊哈爾格林姆教堂
要數 雷克雅未克 「到此一遊」嘅景點,首選哈爾格林姆教堂(Hallgrimskirkja),呢座外形獨特嘅教堂由1940年開始建造,直至1960年代後期先完工。呢座教堂以冰島宗教偉人Hallgrimur Petursson名命,樓高73米(即約24層樓高),已經係全市最高嘅建築物。歌詞都有講:「置身冰島名勝 殺不死依存症」,單戀人士重會睹物思人,愈睇愈傷心……

 

8. 記得帶電話
雷克雅未克 係冰島最重要嘅交通城市,因為係唯一連接外國同冰島其他市鎮嘅城市。正如剛才所講,全國只有公路連接,所以大家去「追夢」,一係坐巴士,又或者自駕遊。不過提提你,去到愈北嘅地方就愈荒涼,可能要揸成3、4個鐘頭車先遇到其他車輛駛過,所以出發前,記得帶備手提電話(甚至帶埋衛星電話),同埋預備定食物同飲用水,否則天寒地凍好易凍死(講堅㗎!),想同女仔講聲「拜拜」都唔得……

敢唔敢挑機?5張係人睇完都想講粗口嘅圖

9. 冇得shopping
冰島雖然破過產,但物價並冇因而下降,反而企得幾硬(甚至貴咗),1支330ml嘅樽裝可樂要291冰島克朗(即約$16.8)。不過大家無須兌換太多克朗,因為當地碌卡好方便,買咖啡、買魚、買衫都可以用信用卡俾錢,只要一卡傍身就夠。另外,冇咩必要都可以唔使去Kolaportid Flea Market,因為呢個二手市場嘅價錢隨時貴過香港一手貨,最慘係衫褲鞋襪都好娘,就連《Lonley Planet》都評佢為「小型垃圾場」,所以留番啲彈藥遊覽好過!你睇,連衫都冇得買,鬼同你去冰島,實放你飛機啦!

 

10. 冰島首都(相比這市面 緩慢而潔凈,〈雷〉歌詞)
最後要講嘅係, 雷克雅未克 (Reykjavik,讀音類似「ray加vik」)位於冰島西南面,除咗係呢個北歐國家嘅首都,亦係冰島最大城市。歌詞中「相比這市面 緩慢而潔凈」真係形容得非常貼切,除咗上文講過有幾乾淨外,市民生活都冇需趕急,因為冰島除南部以外,都屬於較冰川雪國之地,加上當地冇鐵路系統,只靠全國環狀公路貫穿各個城鎮,所以冰島2/3嘅人口,即約20萬人,為咗方便生活,都集中喺首都居住,生活咁方便簡單,人都行慢啲!

 
內容延讀:

There are 8 comments

Add yours

Comments are closed.