【佐敦回帶】18年前今日 MJ着12代Bred帶病上陣贏爵士

波鞋

廣告

Air Jordan鞋持續大熱,真心自用嘅有、儲嘅有、一着一儲嘅又有,齋炒嘅大把添!

好多粉絲埋怨啲鞋俾啲唔識佐敦、未睇過佢打波嘅人炒貴晒,我又不能同意大多,(利申:小編老餅一名,當年睇亞視《NBA地帶》大,反而而家冇乜睇「勒邦」就真!)唔通未睇過畢加索畫畫就唔可以欣賞同買佢嘅畫?

又不過,波神佐敦爆籃片段你重溫得多,但佢嘅經典事跡何其多,不如趁18年前今日(6月11日)一場經典賽事「The Flu Game」講起。

1997年今日,係NBA決賽芝加哥公牛對猶他爵士Game 5(之前局數2:2),如今場輸的話就係公牛作客鹽湖城3連敗,之後會更難打呀!佐敦同整隊公牛都絕對明白,但可惜,佐敦喺比賽前不幸患上腸胃炎,要帶病上陣,大_鑊啦呢次!

小編當日有睇直播,親眼見到佢辛苦到呢,標晒冷汗盛盛,我真係擔心到瀨屎,又驚佢腸胃炎瀨屎,唉~~好亂啊~~但好彩最後佢都能夠帶領公牛贏波(全場38分、7籃板、5助攻),完場後即成個人攤屍咁攤落柏賓身上呢幕又夠經典啦!

當日佐敦着嘅係Bred紅黑12代,為紀念呢件「神蹟」,Nike喺09年復刻咗對AJ 12代「The Flu Game」,喺鞋舌位置加咗個病樣公仔,想當搞笑又出到嗰陣味,咁有「話題」對鞋全新家下炒到近3千自然有道理。

text-stanley photo-網上圖片

有甚麼波鞋推薦?

不論男女波鞋都是大家每天襯衫必備的單品之一,白波鞋更是百搭之選,必買10大易襯白波鞋,輕鬆carry每個造型!香港天氣變幻莫測,唔想濕住腳行街,一對Gore-Tex防水波鞋會是必然之選,若然唔好彩弄髒波鞋,即用這6招洗波鞋方法幫波鞋還原靚樣!

如何揀一對適合自己的波鞋?

揀鞋當然要揀一對啱size的鞋,的確很多人經常入錯波鞋size,以下就為大家綜合15款大熱波鞋size攻略,幫大家選擇最佳尺碼。除了尺碼,波鞋的性能也很重要,消委會測試了 11款防水行山鞋,大家不妨參考一下當中款式的優劣之處。最後當然是款式,最新New Balance復古經典鞋款再來襲,身為潮流達人的你快入手一對吧!