8款創新端午粽 韓風芝士最潮

飲食

廣告

其實有冇人會期待食端午粽?正如各種傳統應節食品,每年都推出各種創新口味,以滿足食到個嘴刁晒嘅香港人。創新嘅嘢,不外乎將啲你冇諗過會用嘅餡料加入糯米中,最慣常手段就係將西式食材入粽,好似近期乜都有份出現嘅芝士,「溶」入粽中原來好「芝」味,重有藥膳、肉食同甜糭。要食梗係食而家最新嘅口味,粽之今日(新派款),何必(食)當初(傳統)。

text-William photo-Hin

芝士組

韓系至hot芝士

韓風吹到無孔不入,而近期韓食最hit就係乜都加芝士,而家連端午粽都加入芝士同韓辣醬,韓味爆燈,即使端午節假期去唔到韓國,食隻粽都可止止癮。

新蚊屈原食評︰「味道相當新奇,即使市面上已有唔少帶辣味嘅粽,但韓式辣醬確係少見。而芝士配牛腩新奇得有少少奇怪,年糕條亦冇預期咁煙韌,不過食落都幾有趣。如果作為哈韓族,真係要試一試。」


超有誠意3重芝士

要玩就玩到盡,好似帝京軒要整芝士粽,就用咗3種唔同味道口感嘅芝士,令味道一啲都唔單調,誠意滿分。

新蚊屈原食評︰「賣相超靚,橫切面都睇到層次分明,入口食到松露香,由於用咗3種芝士,芝士味真心濃,餓嘅食完會想再食第2隻!味道鹹香適中,唔會過濃。」

內容延讀:

止韓癮 梗係食最hit韓零食

唔想個頭成隻粽咁? 2分鐘擸頭大變身

藥膳組

食粽都要揀有菌

近年嘅粽都變矜貴變健康,加入具食療價值嘅牛肝菌,令本來易滯油膩嘅粽減少幾分食肥人嘅感覺。

新蚊屈原食評︰「牛肝菌本身味道好濃,喺菌類中屬於重口味嘅一種,配合返黑蒜雞肉,一濃一淡,特別得嚟唔會抗拒。」


韓人蔘補一補

再有一款粽向韓國致敬。充滿韓國特色嘅高麗蔘竹絲雞湯,大家都飲唔少,而家將佢哋放晒入粽,咁就食得更健康。

新蚊屈原食評︰「切開粽身,人蔘味已經湧出嚟,同時間滲透到每一顆糯米之中。人蔘甘香,after taste頗強,而粽走健康路線,味道較清淡。後生一輩未必會啱食,但懂得養生嘅朋友會識貨。」


內容延讀:

止韓癮 梗係食最hit韓零食

唔想個頭成隻粽咁? 2分鐘擸頭大變身

肉食組

鴨王不及鵝皇好

鴻星上年玩咗八寶鴨入粽,今年再下一城,用上更貴價嘅鵝做餡,無非都係想隻粽矜貴啲,大家送禮好睇啲。

新蚊屈原食評︰「糯米中最特別嘅地方應該係多咗份油香,燒鵝肉質細嫩,皮脆帶油香,配類似扁豆嘅肉豆,口感獨特,更加惹味。」


和風亂入中國風

見個樣「白雪雪」就覺得好清淡,原來櫻花係其中1種食材,又用日本珍珠糯米,成為日系之選。雖然韓流強勁,但日本嘢仍然好多人捧場。

新蚊屈原食評︰「聽落和風味濃嘅粽,口味反而比一般傳統粽來得輕盈。櫻花其實無咩香氣,而豚肉配栗子呢個拎晒分嘅配搭,如果可以再肥少少,多一點油香就重正。」

內容延讀:

止韓癮 梗係食最hit韓零食

唔想個頭成隻粽咁? 2分鐘擸頭大變身

甜味組

潤肺止咳薑蜜柑桔

而家新沙士搞到人心惶惶,聽見薑蜜同柑桔可潤肺兼止咳,真係忍唔住想食多兩啖,心理上或多或少會覺得安心啲。

新蚊屈原食評︰「將果香帶入粽,的而且確減少咗飽滯感。食嘅時候配埋柑桔薑蜜,由內至外全面配合,略嫌附送嘅柑桔薑蜜唔夠多,因為呢個薑蜜相當出色。」


粽有3兄弟

1set3款,一次過品嘗3種唔同嘅甜味,又可以同其他人一齊分享,圍埋齊齊食粽,滋味更sweet。

新蚊屈原食評︰「3款甜粽質素頗高,各有特色,令人印象深刻,我最鍾意無花果蓮蓉鹼水糭,蓮蓉滑溜,同無花果嘅口感好有對比。配埋塔斯曼尼亞純蜂蜜俾你淋上,甜而不膩。」

 

a.帝京軒

地址:太子太子道西193號帝京酒店

電話:2928 8822

營業時間:11:00am-3:00pm、6:00pm-11:00pm(星期一至六),10:00am-3:00pm、6:00pm-11:00pm(星期日及公眾假期)

b. 超群

地址:九龍灣牛頭角道77號淘大商場地下11號

電話:2769 6320

營業時間:7:30am-10:00pm(星期一至六),8:00am-10:00pm(星期日)

c.香宮

地址:尖沙咀東部麼地道64號九龍香格里拉大酒店B1

電話:2733 8754

營業時間: 12:00nn-3:00pm、6:30pm-11:30pm(星期一至六),0:30am-3:00pm、6:30pm-11:30pm(星期日及公眾假期)

d.鴻星海鮮酒家

地址:觀塘開源道64號源成中心1樓

電話:2628 0339

營業時間: 10:00am-11:00pm(星期一至五), 9:00am-11:00pm(星期六日及假期)

e.帝玉庭

地址:沙田白鶴汀街8號帝都酒店

電話:2694 3939

營業時間:9:00am-3:00pm、6:00pm-11:00pm(星期一至六),9:00am-4:00pm、6:00pm-11:00pm(星期日及公眾假期)

f.逸東軒

地址:佐敦彌敦道380號香港逸東酒店B2

電話:2710 1093

營業時間:11:00am-11:00pm(星期一至六),10:00am-11:00pm(星期日及公眾假期)

g.欣圖軒

地址:尖沙咀梳士巴利道18號香港洲際酒店地下

電話:2313 2323

營業時間:12:00nn-2:30pm、6:00pm-11:00pm(星期一至六),11:30am-3:00pm、6:00pm-11:00pm(星期日及公眾假期)

 
內容延讀:

止韓癮 梗係食最hit韓零食

唔想個頭成隻粽咁? 2分鐘擸頭大變身