啱用一世!Game界術語識用好好玩

啱用一世!Game界術語識用好好玩

各位「升四」,「粗磚」、「M磚」、「陳四」、「春四」呢啲波鞋街術語,你肯定已經袋咗幾個喺身(唔明呀?快啲睇波鞋街術語全晒冷Part 1Part 2),係咪好玩先?今次再同大家share下日常生活最常聽到嘅術語─Game界術語!Game界術語有趣在喺日常生活都可以經常用到,就算唔係宅男宅女,身邊都肯定有幾個朋友成日講,唔輸蝕得過高登術語。而且唔小圈子之餘,亦好有畫面感,應用範圍亦非常廣闊,同一個術語可以係名詞、動詞同形容詞,轉數唔快都未必跟到。唔講咁多,睇完即刻「秒share」啦!

text-Nam photo-網上圖片

入門「機」字術語篇
「玩電子遊戲」廣東話可以講成「打機」咁全神,由機字衍生嘅術語自然最多,由淺入深慢慢講。

「挑機」
街機術語,源自《街霸》(Street Fighter),指主動挑戰對手,重要充滿殺氣同自信嗰隻。
例句:成條波鞋街邊個唔知我儲最多AJ先?條友走嚟挑機話佢先最齊貨喎,都傻傻哋!

01

「跟機」
同樣嚟自街機,即等於排隊。以前打機時如果部機已經有人,你可以放1蚊喺機台上示意你跟緊(因此好多時前面會跟埋「擺低1蚊」用),咁玩緊嘅人自然唔會霸住部機玩。
例句:對鞋8折你到底要唔要呀?你唔要我擺低1蚊跟機呀!

02

「爆機」
完成遊戲後就叫爆機,實際生活應用上,你完成到一個目標都已經可以叫做爆機。
例句:份project終於做完,正式爆機!

04

「hang機」
電腦術語,但打機應用亦多,其實佢有個正式名叫「當機」(System Crash),指電腦系統出錯,令電腦不斷運行程式,直至耗盡記憶體導致癱瘓。今時今日,都可以用嚟形容人呆呆滯滯唔識郁。
例句:坐咗喺公司4個鐘都寫唔完份稿,今日個腦有少少hang機。

05

「lag機」
同為電腦術語,當電腦操作突然變得延遲,就叫做lag機。Online game盛行年代,因為網速問題(當年重係56K上網)經常會有lag機情況,呢個術語亦因此流行。不過好多小學雞讀咗做「leg」機。
例句:開緊會呀,俾啲反應啦!唔好lag機咁啦!

06

>

內容延讀

>【2015恐怖片王?】 鬼航拍《THE DRONE》

>EMOJI又有新嘢,今次加推負面版,原來背後好有意義!

進階「攻擊」術語篇
「今日決定爆seed開無雙,打電話俾女神約佢睇戲!」你知唔知我講乜先?熱完身要去進階啦,以下都係同「攻擊」有關係嘅術語,唔識都唔使心虛,因為冰山一角已經好煩。

「秒殺」
字面意思就係「一秒瞬殺」,出處係對戰遊戲,指一方玩家被另一方玩家用極速打敗,有「好快完結」嘅意思。「秒」字而家亦扭到乜嘢動詞都夾到,例如秒like、秒share……
例句:NB1300JP一出即秒殺!

07

「超必」
即超必殺技,最早出現喺1992年格鬥遊戲《龍虎之拳》,當玩家就快冇晒體力時先可以用,由於破壞力最高,所以超必亦變成「一發逆轉」、「最後絕招」嘅代名詞。如《龍珠》嘅悟空往往打到最尾先出元氣彈,呢樣就係佢嘅超必嘞!
例句:少林功夫隊大戰山西豆腐隊嘅比數已經去到50比0,呢鋪真係出超必都追唔番。

08

「無雙」
2001年PS2遊戲《真三國無雙》誕生,由於玩法創新,當時冇人可以準確分類,結果此後所有同類玩法嘅遊戲都叫做「無雙式」玩法。同時,一般遊戲嘅「超必」,喺呢隻game入面叫做「無雙亂舞」,所以「無雙」同樣有超必嘅意思。由於呢個字太有畫面感同代表性,經過歷年進化,已經去到可以當成名詞、動詞同形容詞咁用,例如當形容人「好似開咗無雙咁」,其實意思即係等於「呢條友好屈機」。字面解就多數形容「以一敵百」,實際應用大家慢慢摸索。

例句:套《全力扣殺》真係拍得好正,懷疑郭子健開咗無雙。
例句:丁蟹開無雙一拳打到方進新變咗傻仔!

09

「爆seed」
非常近似「無雙」,指「爆發自身潛能」,但出處唔係任何遊戲,而係動畫《機動戰士GUNDAM SEED》,當主角開啟潛在能力時,畫面會有粒種子爆開去表達,爆seed後主角可以將敵人秒殺。「爆」字亦係打機友常用形容詞,夾乜都得!
例句:菲利今次爆seed變咗金色,終於打贏咗悟空!

10

「打大佬」
以往唔少遊戲都係有關卡設計,經過種種關卡,去到爆機之前,總會有個最後強敵需要打敗,呢個強敵就會稱為「大佬」,game友亦會用「Boss」或「魔王」稱呼,但仍唔及打大佬咁「地」。所有艱難嘅工作或任務,都可以將佢形容為「打大佬」,我有fd子直情將屙屎形容為打大佬,件事係咪即刻勁咗?
例句:阿邊個又去咗廁所打大佬呀?叫佢打完大佬快啲交稿啦!

11


內容延讀

>【2015恐怖片王?】 鬼航拍《THE DRONE》

>EMOJI又有新嘢,今次加推負面版,原來背後好有意義!

YOU MAY ALSO LIKE ...

There are 2 comments

Add yours
  1. 新Monday / 【搵到眼花!】尋找比卡超遊戲 - 新Monday

    […] >Game界術語識用好好玩 […]

  2. 新Monday / 5個香港睇星好地方 + 8個星際啟示嘅品牌 - 新Monday

    […] 〉啱用一世!Game界術語識用好好玩 […]


Comments are closed.