邊個最癲邊個最喪? 回顧真人版小丑4癲王

電影

廣告

自DC Comics公布開拍旗下漫畫《Suicide Squad》後,大家焦點都落喺Jared Leto演嘅小丑(Joker)身上。早排官方發布咗Leto小丑造型,即引起一陣騷動。Joker迷喺網上已經討論緊Leto版小丑可唔可以挑戰《蝙蝠俠﹕黑夜之神》Heath Ledger版小丑嘅神級演技。

其實冇返咁上下演技,係演繹唔到小丑由內到嗰種癲得極徹底嘅狀態。電影/電視扮過小丑嘅演員唔算多,但個個演技精湛,以下4位絕對係真人版小丑嘅4大癲王,除咗Heath Ledger同Jared Leto,其餘你又識唔識?

text-東 photo-網上圖片

Jared Leto《Suicide Squad,2016》

Jared Leto舊年憑《續命梟雄》摘下奧斯卡最佳男配角,演技毋容置疑。所以當佢答應係《Suicide Squad》扮演小丑時,大家將佢同已故嘅Heath Ledger比較,佢有幾癲就要喺2016年先有得睇,不過今日就有人喺多倫多嘅片場,影到Leto以西裝造型嘅小丑,同小丑女Harley Quinn(Margot Robbie飾)「打」情罵俏嘅戲分。睇張相佢個樣夠晒邪,希望佢嘅演技可以拍得住Heath Ledger啦。

2 積尼高遜《蝙蝠俠,1989》

影帝中嘅影帝,話說當年添布道版《蝙褔俠》開拍,華納同添布頓都想積尼高遜做小丑,但佢考慮咗好耐都未有決定。華納高層就心生一計,問積尼好友兼同係好戲之人嘅羅賓威廉士有冇興趣做Joker。未待羅賓答覆,就再同積尼講﹕「喂如果你重諗唔掂(做Joker),我就俾你老友做啦!」呢條計仔果然使得,積尼即時答應接job。

身為奧斯卡3料影帝,積尼嘅小丑同Heath Ledger好唔同,佢有一半用咗漫畫式嘅誇張搞笑風格演繹,再加上現實黐線佬嗰種瘋狂恐怖感混合而成。當然啦,積尼咁深厚嘅功力就拿捏得啱啱好,令你笑爆嘴,但突然又可以令你好心寒,受唔住真係睇到精神分裂!

演技大比拼~~睇Heath Ledger vs 積尼高遜

  1. Cesar Romero (《蝙蝠俠電視版 1966-68》、《蝙蝠俠,1966》)

元祖級小丑,由電視演到大銀幕。小丑好似有舊痰喺喉嚨嘅瘋狂笑聲、黐線嘅肢體動作、白面綠髮紫西裝嘅打扮,都係由Cesar Romero由漫畫帶到現實。佢本身係一個束鬚者,試小丑造型時,工作人員話要剃咗佢啲鬚(漫晝中小丑係冇鬚嘅),佢斷言拒絕,叫化妝師就咁揸白佢塊面兼啲鬚就算,但錯有錯着,令佢造型睇起上嚟更黐線。

Cesar Romero嘅名聲唔及得其他3位演員,但論經典,就連積尼高遜同Heath Ledger話做小丑時,都有參考Cesar叔嘅演繹方式。

  1. Heath Ledger《蝙蝠俠﹕黑夜之神,2008》

捨棄漫畫誇張演繹方式,Heath Ledger將小丑從新定位﹕黑暗殘酷,瘋狂得嚟智商極高,處處將蝙蝠俠玩弄於股掌之間,絕對係史上最令人心寒嘅小丑。據聞Heath Ledger喺開戲前3個月足不出戶,一心要捉摸小丑瘋狂嘅心態。佢嘅努力絕冇白費,電影上映後全世界都對佢嘅演技加以肯定,絕對係佢從影生涯代表作。不過佢亦因此無法抽離角色,要長期依賴藥物控制情緒,間接令佢英年早逝。

其實今年正正係小丑呢個蝙蝠俠最強宿敵誕生75週年。(第一次登場係喺1940年嘅《蝙蝠俠》漫畫第一期)多年嚟佢害到各方英雄雞毛鴨血,好似佢令到Batgirl癱瘓,第2代羅賓Jason Todd瓜柴,不過如果冇咗呢個咁精彩嘅歹角,我諗你都唔會有興趣入場睇《蝙蝠俠》啦係咪?

 

內容延讀﹕

小丑啲紋身係咪好正呢?順勢睇埋韓紋身下集:5大ig人氣海陸空動物紋身圖鑑

小丑成日染髮要睇!1分鐘地中海型變陳冠希招牌式摷亂頭

睇完醜惡嘢,再睇11大韓國女星狂晒11字腹股提下神先

 

 

There is 1 comment

Add yours

Comments are closed.