【香港人撐香港運動員】專訪長跑天后 姚潔貞：「唔相信真係可以跑奧運！」

text – Lok（ig：loklokb1021） photo – Billy

目標愈遠大 進步愈快
本身係註冊護士嘅潔貞，為咗衝擊奧運資格，上年毅然放棄工作，宜家成功大家當然話咩都值得，但想當日要面對壓力有幾大？佢同老公陳家豪獲傳媒稱為「長跑情侶」，咁家豪對佢嘅支持又有幾重要？一齊睇睇。
N：《新Monday》 C：姚潔貞

N：到底點解當初會以奧運為目標？
C：「其餘喺因為一次北京馬拉松比賽，當時成績係2小時44分，家豪係我主教練，佢見到我練嘅時間唔多但都可以跑出唔錯嘅時間，就覺得如果我可以投放更多時間，衝擊奧運資格唔係冇可能，所以就鼓勵我去嘗試。」

N：奧運對你嚟講嘅意義？

C：「好遙遠，係一個夢，細個嘅時候好希望可以代表香港出賽，但諗都冇諗過可以參加奧運，奧運係所有運動員視為最大最高嘅一個榮譽，一直冇幻想過，到宜家成功咗，都重係覺得好神奇，好難以置信，但其實愈遠大嘅目標就令自己進步得愈快，即使最後失敗，我都會有所進步。」

N：除咗放棄護士工作，重為奧運犧牲咗啲咩？
C：「重要係同屋企人相處嘅時間，以前返工已經少見，但宜家基本上每日都長時間練習，所以見面時間更少，不過佢哋都好支持我，呢點令我更有動力。」
內容延讀：

＞2015 NIKE BASKETBALL「RISE 打出名堂」蓄勢待發

＞邊個話做運動唔可以化妝？教你5招化防溶妝！

＞【王麗雅】如何開場屬於自己的運動PARTY？

https://www.youtube.com/watch?v=MKrKQvNHDjQ

&feature=youtu.be

代表香港有壓力

N：家豪對你嘅支持起咗咩作用？
C：「跑步上，佢係我教練，佢可以準確咁估計到我每場比賽跑到咩時間，幫我set up好多訓練同目標，而佢所講嘅嘢我都好信任。心靈上，佢會不斷鼓勵我，配合我嘅時間訓練，最大嘅support係叫我放棄護士份工，收入方面大減，佢自己就做多啲搵返多啲錢，如果唔係都好難維持年幾兩年時間冇正職收入，所以佢真係幫咗我好多。」

N：講返布拉格場馬拉松，聽講你帶傷上陣？
C：「其實去到開賽前一刻身上都重有傷在身，有諗過唔參賽，有諗過完成唔到賽事，但馬拉松賽唔同短跑比賽，我哋博盡長跑比賽做時間，個身體一年只得幾次quota，變咗每次大賽都要好珍惜，我嚟得呢度就要博。」

N：咁沿途感受係點？過程中你知唔知道自己成功達標？
C：「其實一直跑都留意住自己嘅腳嘅傷勢，直到過咗28K，發覺隻腳狀態仍然ok就比較安心，係會唔舒服，但我可以自己調整步伐，當然去到最後10K就開始有信心，因為計返自己pacing，知道穩穩陣陣就可以達標。但就到嘅時候都feel到自己肌肉有啲反應，所以都唔敢好似平時咁爆到盡，直到衝線一刻，知道自己真係成功咗，真係好開心好興奮，非常難忘。」

N：對奧運有咩展望？
C：「成績依然係一個重點，世界各地最高級嘅運動員都會喺度，馬拉松同其他跑步比賽好唔同，地方、對手、天氣全部元素都可以影響發揮，所以奧運前嘅世錦賽我會好好吸收經驗，再慢慢部署奧運。其實有時著起代表港隊嘅衫係有壓力嘅，但同時亦係一種動力，因為我代表緊香港嘅女子運動員，一定唔可以掉假，所以會盡自己全力爭取好成績。」

內容延讀：

＞NBA決賽狂熱 MINIONS單挑浪花兄弟！

＞呢期必定要有NIKE PHOTOSYNTHESIS PACK花花跑鞋