proclub

FIFA齊晒11個人打ProClub都唔夠細個Winning咁開心

遊戲動漫

廣告

就算喺FIFA搵到11個人同你一齊玩Pro Club,但都硬係無以前去同學仔屋企幾條友一齊打Winning嗰種激動。

text-隆仔 photo-youtube截圖、遊戲截圖、電影截圖

細個打Winning最開心唔係喺Master League練到d人幾勁幾勁,而係搵到三個Friend上你屋企同你一齊打電腦,四個人淨係轉完人搵番自己控制緊邊個都已經笑到停唔到,就算對住2星電腦都可以畀人強姦到完場,但係都一樣咁開心,因為細個在乎嘅唔只係輸贏,更係想同朋友一齊打下機。

難得終於入到電腦一球,梗係要擊掌、擁抱、大叫慶祝,依家?都得嘅,同自己擊囉,細細聲講句「好波」,唔好咁大聲叫添呀,嚇親屋企人就唔好啦,因為喺屋企人嘅角度,打緊機嘅你就好似一個傻仔咁自言自語。 可能你會話「你搵到咁多人打機,不如落去街場跟隊啦。」但唔好意思,附近嘅石地場每一晚都唔知點解會畀人Book咗,心諗:有無咁L多League踢呀。

收工返到屋企都已經8點幾9點,唔通踢一個鐘就返屋企咁無聊咩。而且就算8點開始你想搵人踢Pro Club,Whatsapp Group都會有幾個人話「啱啱OT完,10點先Join」「搭緊車返去,10半開機」,最後去到11點幾先正式齊人,但你無資格叫人快d,因為自己有時都會OT。

人大咗,諗嘅嘢都多咗,「喂,阿強打左翼好d喎。」「不如打5-3-2啦,防守好d,你哋3個前面自己搞,我逗後。」搞一大輪come好個陣先真係開到波,點知EA又玩嘢搵極都搵唔到對手,成半個鐘先打到一場,仲要係咁Lag機。

長大就係有9個人係到打FIFA都唔想落街踢波……

A post shared by Charles Cheng (@ccl_charles) on

「搞錯呀,又會彈彈波去返對手度比人補射嘅?」無錯,成晚打得幾場Proclub,仲要被EA黑,頭1、2場都仲會有啲火想「反黑」對手,但輸下一場,輸下一場,都唔知自己打緊機定畀FIFA玩緊,愈玩愈無癮。

去到凌晨2點大家都收機,一放低耳機嗰一刻就只係得番街聲,車聲,之後諗一諗:X,聽日仲要返工……

YOU MAY ALSO LIKE ...