網民籲罷睇移民Youtuber：賺香港人錢嘆 唔好咁蠢！
網民指：移咗民但賺香港人錢去外地享受
討論區上有網民發文：「建議大家唔好再聽啲移左民既YouTuber」，樓主指這呢班移民外地嘅YouTuber ，移民英國、日本、加拿大後靠香港人嘅錢維生。「得閒笑吓你地班留港X，仲可以用你地嘅view數幫佢哋喺外地享受錢玩住」，直斥呢班移民YouTuber沒有方法係他鄉生存，要靠香港人才有收入，而佢地賺咗香港人錢但就喺當地消費。稱移民YouTuber表面上同大家分享資訊，幫助大家了解移民前後嘅事項。實質譁眾取寵，吸引點擊率，透過香港人支持而賺取香港人錢供佢地喺當地享受，嘲移民Youtuber「吸香港人血去旅行」，更指係「大家不願接受嘅事實」。有不少網民同都同意樓主說法，紛紛留言「咪咁蠢畀人利用」、「無本事賺外國人錢，米呃返香港人錢」。
網民點名YouTuber 大J及Bob叔
發文中唔少移居外地嘅Youtuber亦成為討論對象，當中移居日本的大J及移民英國嘅Bob叔就被多次點名。Youtuber大J同老婆現時定居日本，不時會拍攝喺日本生活嘅點滴，例如日本外遊、日本夾公仔、日本美食等，條片都有過十萬 views。如跟據追蹤人數與觀看次數來計算，大J每月收入約2 萬左右，加上不同的品牌合作、廣告創作等等，相信收入亦相當可觀。
而移居英國嘅YouTuber Bob叔就經營住拥有68.4萬訂閱嘅YouTube頻道：「煮家男人」。Bob叔不時會分享一啲英國資訊、各地飲食、文化不同、旅遊等資訊。Bob叔平均每條影片都有超過20萬點擊，可見非常受歡迎。可謂係大部份港人準備移民英國嘅必看指南之一。
網民唔認同：Youtube收入其實好低
而有部分網民就表示唔認同樓主說法，表示其實Youtube片嘅收入好低，未必如樓主所講嘅賺香港人錢供佢地享用，「佢應該唔知view數根本得一百幾十」、「你有冇出過一蚊係youtube先？」、「你係米搞錯咗以為YouTube好易搵錢？」亦有網民認為觀眾有自由選擇權利，喜歡或者覺得有用觀看亦無防，「人唔好咁懶自己research移民咪唔使俾人水囉」、「人地可能真心中意睇呢？你理得人姐」、「啱睇咪睇囉」、「有啲都幾實用」、「百貨應百客啦」、「鍾意睇咪睇，覺得有趣同有用咪聽」。
