【PS5】越南機迷扮裝ROUTER！成功瞞過老婆將PS5順利入境
廣告
【PS5】當一個男人成家立室，變成一家之主，唔再係一個人生活，再加上香港的土地問題，想買件心頭好返屋企，都要諗吓計仔避過屋企個「海關」先！最近有一位越南機迷，就成功瞞天過海，避過老婆大人的法眼，成功偷運咗PS5入境，到底佢有咩計仔，我哋即刻睇吓！
撰文：馬高斯 ｜圖片來源： Facebook群組@Playstation Việt Nam｜編輯：海月
自從PS5呢部次世代的新遊戲主機推出，相信世界上唔少男士們都急不及待想帶佢返屋企，之不過呢，呢部新主機都唔平，以越南的價格就係大約1500萬越南盾（約港幣5000蚊）。淨係價錢已經好難過關入境，仲要好鬼死大部，屋企部電視隔離無喇喇多咗部PS5一定好顯眼！
根據呢位越南玩家的發表的作戰計劃，首先叫咗售賣PS5嘅舖頭店員，假扮成網絡安裝人員，同時再夾一夾口供，將PS5講成係路由器ROUTER。於是佢哋就好明正言順，入屋安裝呢部披上「ROUTER」皮的PS5！
好好彩，今次PS5的機身設計又真係幾似ROUTER，咁假扮成安裝網絡路由器嘅店員亦好入戲，仲特登著上制服cosplay埋，然後再喺PS5機身側面，貼上裝ROUTER公司嘅電話標籤，神不知鬼不覺咁將PS5成功入境。
都係個句喇，有啲嘢靜靜雞咪算囉，而家爆晒響口，呢位越南機迷嘅老婆大人好有機會睇到！同埋都通晒天，同一招對聖鬥士係無用，睇怕大家都好難再用同一招！
關鍵詞
PS5
