【醜男大翻身】難搵工又畀人恥笑！越南男子用4億改變人生
廣告
【醜男大翻身】人係會追求靚嘅生物，或多或少第一刻睇樣係好正常，所以現今社會真係「你的樣子如何，你的日子也必如何」。曾經日本有位猛人用咗10年由肥宅變身成靚仔。不過現實係殘酷，有時天生嘅嘢唔係努力就改變到，越南就有個男仔，因為生得比較醜，又難搵工，又成日畀人嫌棄，又識唔到朋友，於是佢把心一橫決定整容「重生」！
撰文：馬高斯 ｜圖片來源： kenh14、Đỗ Quyền嘅Facebook、TikTok｜編輯：海月
越南男子用4億整容改變人生
外國媒體報道有一位越南26 歲男子杜文奎（Đỗ Quyền），因為自覺生得醜，求職屢次失敗，幾經辛苦終於搵到份工，結果又成日畀腦細羞辱嘲笑。無論職場定識朋友都被人嫌棄。於是佢做咗一個重大決定！
杜文奎決定用晒所有積蓄，大概 4 億越南盾（約 13 萬港幣）去整容，咁成個整容手術總共做咗9次，包括整鼻、做雙眼皮、眼睛放大術，仲有割唇、豐唇、牙齒美白等等。最終佢如願以償，由醜男變身成白淨美男，不過佢亦提到第一次返屋企嗰陣，父母認唔出自已嗰仔。雖然係佢意料中事，不過都忍唔住落淚。
杜文奎整容之後的確順風順水，而家喺胡志明市搵到份化妝師工作之外，仲做埋網紅！杜文奎經常喺Instagram同TikTok 出post，包括自己手術前後嘅相。
小編非常佩服佢嘅覺悟，有時一個決定就可以改變人生。
