荃灣7歲男童被狗咬到恐破相索15萬 狗主唔肯 網民反應兩極質疑另有內情
男童臉上有多處嚴重傷口
一名媽媽在上周六（12月30日）在Facebook群組「荃灣友」上載多張照片，並透露兒子於同日早上時遭荃灣一隻黑色唐狗咬傷。從照片中所見，男童傷勢嚴重，其右臉、右眼腫脹，上唇腫至突出，鼻翼和上唇均有多處結痂傷口，狀甚恐怖。
狗主堅拒賠償：公屋要交租，又要俾贍養費
媽媽指事發後已馬上用WhatsApp聯絡狗主，並要求他賠償15萬，對方當時稱會負上責任。可是在數天後，狗主竟反口指自己住公屋，無錢賠償，「我真係冇呀，我唔想㗎。我住緊公屋㗎」媽媽表示住公屋不代表不用賠償，對方堅拒賠償，並稱「咁等個官判。就算判我坐監都冇辦法，我真係冇錢俾」；這時，媽媽提議分期賠償，狗主反問她如何分期，並質疑缺乏醫生證明報告，包括具體醫療費用及後續治療詳情；狗主認為，媽媽一方亦應負上部分責任，他更稱「分期都冇能力」，再度堅拒賠償。 這時，媽媽揚言會找律師，「法官話賠幾多就幾多」，然後再詢問對方能賠償多少金額，狗主最後回答指「計一計條數先，因為我（月薪）萬幾蚊一個月，公屋要交租，又要俾贍養費。我盡計」。
母稱公開晒狗主照片 稱兒子要看心理醫生
媽媽除咗公開對話外，仲放上狗主照片以及狗主鋪頭，再引述警方的說法，漁農處必須捕捉涉事黑狗才可有下一步行動，惟牠被狗主轉移到「無人知道的地步」，她又估計狗主已「私了咗隻狗」。男童媽媽續指，涉事黑狗曾經咬傷很多人，曾有漁護處成功捕捉牠，但後來再放走，並指狗主繼續放養，「無帶口罩、狗帶、狗繩，俾個定時炸彈係街度行走」。 她更指自己作為一名母親，坦言非常心痛，目前兒子仍感害怕，醫生建議他看心理醫生。關於傷勢，醫生更表示如果不幸留下疤痕，「每次治療都會過萬（元）」。事實上，她知道狗主有一間電單車店鋪，也得悉對方也有小朋友，故不理解他為何會漠視男童傷勢，「基本治療止血縫線錢都話無」。她呼籲，若有人見到一隻頭部掛著NO字牌的黑色唐狗，建議立刻報警，希望沒有更多受害者。
網民指黑狗平日好乖：狗狗身上掛咗「不要觸摸」嘅牌
事件曝光後，引來大批網民關注和討論。不少人質疑涉事黑狗的狗帶上已有「NO」及「切勿觸摸」的警告圖案，故懷疑是男童首先觸摸黑狗才導致悲劇發生，「狗係唔會無啦啦咬人，一定係被嚇親或者受到威脅先會咬」，「狗主其實已經喺狗狗身上掛左『不要觸摸』嘅牌」。現時狗狗已現於漁農自然護理署，轄下的動物管理中心接受狂犬病觀察，如觀察期內健康狀況正常，無出現狂犬病的臨床徵狀，狗主就可以喺觀察期後領回狗狗。
有目擊者網民指男童曾「扯狗毛」！
此外，不少荃灣街坊指狗隻平日好乖好溫馴，「隻狗好乖架喎，日常都係瞓」、「呢隻狗已經喺荃灣好多年，對人對狗都好友善」「我好驚大狗，我成日去開呢個街市！我想講隻狗真係超乖囉！即係你有你買餸，佢有佢曬太陽。完全唔會搞任何人，不過先撩者賤」；有目擊者網民留言指，事發前該男童曾「扯狗毛」，其後閉路電視曝光，明顯係男童突然走向狗狗，然後就被狗狗襲擊。也有網民覺得「狗主嘅處理方式有問題」，也有人祝願男童早日康復，「希望小朋友早日康復，唔好留疤」、「小朋友好可憐」。此外，有人覺得關乎管教問題，「點解唔睇住自己個仔嘅？」、「你睇住個仔咁粗魯你都有責任」。仲有網民話而家孩童母親將狗主資料公開擺晒上網，最後可能係孩童母親犯法。
網民：你憑咩要人比15萭你
不過，更多人質疑這名媽媽提出15萬賠償的由來，更狠批佢獅子大開口，一開口就問人拎15萬，仲有嗰句「15萬係香港算得了什麼」覺得孩童母親都非常有問題「15萬點定出嚟？」、「15萬不是基本醫療費用，要有根據，不能隨心說一個數」、「你憑咩要人比15萭你」「好興咁樣屈人錢？」不過亦有網民支持，認為情況真係嚴重，15萬係唔過份。
