花之戀壽司原來係香港獨創！日本人都話正揚威日本！

撰文：海月 ｜圖片來源：《世界くらべてみたら》、洪天明IG

日本人都話正！香港獨創「花之戀」壽司

全球疫情至今情況略為緩和，不過香港人經已2年多無返「鄉下」，人生變得好枯燥。呢個時候好彩「壽司郎」進軍香港市場，等我哋可以喺香港感受身在日本嘅滋味！短短一年間經已全港各區開唔少分店，依然一席難求，每次經過都大排長龍！

今次節目特派員去咗樂富分店做訪問，日本人大讚香港分店嘅外觀同內部裝潢幾乎一模一樣，職員仲會用日文打招呼，連特派員都以為自己返咗日本！

節目中介紹咗2款香港「壽司郎」限定壽司，其中一款就係唔少港人大愛「花之戀」！大家由細食到大，「花之戀」已經成為我哋理所常然嘅香港壽司，之但係「花之戀」嘅由來你又知唔知呢？

原來事源1990年，香港某間日本餐廳嘅店主同老婆鬧大交，店主為咗氹返老婆大人，於是構思出「花之戀」，好似100支玫瑰咁，整夠100件「花之戀」送畀老婆大人。

特派員試食後都話正，其他節目嘉賓個個都睇到流晒口水！其實「花之戀」做法好簡單，用幾塊三文魚包住醋飯，砌成花形狀，再喺中間加入蛋黃醬同魚子。

勢估唔到日本嘅壽司進軍香港，之後又畀「花之戀」打返過去日本！為更了解香港原創壽司「花之戀」，今次記者更喺香港壽司郎親身試食，除外形美且浪漫，記者更認為蛋黃醬為三文魚的甘味增添一份層次，兩者調和非常完美，而三文魚籽粒粒分明很有咬口，非常好食！

而2019年有日本餐廳以藝人洪天明個大名做店舖招徠，只要名字中含有「洪天明」任何一個字，就可以免費得到「花之戀」，如果三隻字齊晒就可以得到1000件壽司，當時成為城中熱話。洪天明過去喺《獎門人》節目入面累積獲得超過20000件花之戀壽司成為「花之戀毀滅者」。

究竟佢點樣先食得曬嗰20,000件花之戀壽司呢？有網民計算過，當一餐食到20件壽司，早午晚都食都要食足一年先食得曬20,000件。難怪曾經一次訪問中，洪天明本人要同「花之戀」劃清界線，話好多年無吃過三文魚。睇嚟貌似洪天明就食到怕咗，反而班日本節目嘉賓就睇到流晒口水，一定好葡萄洪天明節目有得狂食「花之戀」！