【社畜人生】某日資大公司被揭發、員工每月OT過百小時過勞死！
廣告
【社畜人生】「過勞死」呢種現象係講緊一個人因為過度工作，缺乏休息，最後導致捱唔住死亡。至今為止，有員工過勞死事件經常發生，就算日本政府推行法例去保障員工，都斷絕唔到過勞死現象。就算喺SONY呢種大公司都有發生！
撰文：馬高斯 ｜圖片來源：くらしと仕事、LINE NEWS、ANN｜編輯：海月
某大公司員工每月OT過百小時過勞死
喺2018年1月，SONY駐杜拜嘅日藉年過4字頭員工因心臟病死亡，呢位男員工喺2007年入職，2015年開始去到杜拜工作。事到3月15日，死者嘅老婆公開咗原因。透過死者嘅日程表、LINE嘅對話記錄、電腦嘅登入時間、電郵記錄，同埋同事嘅證供等等去判斷，死者死前三個月超時工作約136至265小時，情況非常嚴重！
日本嘅過勞死事件又點止呢單，喺2015年，日本最大廣告公司電通，一名24歲女職員高橋茉莉，喺員工宿舍跳樓自殺身亡。日本厚生勞動省調查發現，死者死前嘅10月至11月期間，佢嘅工作量大增，佢亦因為長時間工作而患咗憂鬱症。單係發病前1個月，已經OT工作105小時，幾乎每日瞓得2小時。
另外，喺2013年7月24日，於NHK電視台工作嘅佐戶未和，被友人發現喺屋企床上暴斃死亡，死因調查發現因為過勞導致心臟衰竭。經調查後發現，死者喺6月至7月期間，至少超時OT咗159小時37分鐘，一個月內只得兩日假期，嚴重缺乏睡眠，最後過勞死。
雖然日本政府有針對超時工作問題，而去制定法例保障員工，每月加班時間上限為45小時，全年就360小時。但係容許繁忙時期可以「每月100小時」同「個別職種全年720小時」嘅特例。先唔講法例到底有無用，要改變現狀，首先要改變日本嘅職場文化，同埋日本人嘅觀念先。
