【木村都美】17歲社長花2億養軟飯男破產！露宿街頭一件事成功翻身

撰文：馬高斯 ｜圖片來源：《じっくり聞いタロウ～スター近況(秘)報告～》｜編輯：海月

少女一夜成為年輕女社長

前排日本一位38歲嘅木村都美，就上咗綜藝節目《じっくり聞いタロウ～スター近況(秘)報告～》做嘉賓，分享佢大起大跌嘅傳奇事跡。喺木村都美17歲嗰年，經營的士公司嘅爺爺意外遇上強盜搶劫，更慘被殺害。由於屋企無人願意接手公司，當時仲係高中生嘅木村都美，就一夜之間繼承公司，成為年輕女社長！

不過屋企人認為強盜好大機會係結怨犯案，為求令到事件平息，於是刻意營造到公司上下睇落士氣低沉，此時木村都美只繼承咗所有股份，一開始並無用太多時間去營運公司。不過隨住時間過去，木村都美始對經營生意產生興趣，決定一邊讀書一邊打理公司業務，仲成功幫公司起死回生！

原來爺爺嘅死對木村都美都有極大打擊，佢一直借忙碌嘅生活去麻醉自己。為咗填補寂寞又傷心嘅心靈，開始咗用交友app認識新朋友嘅習慣，結果認識一位牛郎後，喺21歲結婚生仔，仲迷得為食軟飯牛郎傾家蕩產，最後搞到破產露宿街頭，可以話係人生有180度大轉變！結果公司倒閉，牛郎老公又走埋，小朋友就寄養喺老家父母度，佢就過住露宿街頭嘅生活。木村都美每日返幾份兼職過活，將賺到嘅錢用喺小朋友身上。

結果皇天不負有心人，令木村都美遇上絕地大翻身嘅好機會，喺2017年，35歲嘅都美於一間人力公司打工，居然被老闆一見鍾情，經過一輪強勢嘅追求後，與老闆組織新家庭，成為坐擁500億日圓公司嘅老闆娘。

雖然木村都美嘅人生大起大跌，之所以老闆愛上咗佢，原來係係因為一次嘅投訴信！當時打工嘅木村都美，眼見公司嘅管理經營方式好有問題，於是上網搵到老闆網上嘅blog，憑住佢過去多年董事長嘅經驗，寫咗一封強烈建議同批評嘅投訴信，老闆亦因此而開始注意木村都美！