【你今日飲咗未】明知肥都要飲！日本人票選10大最愛「肥宅快樂水」

撰文：馬高斯 ｜圖片來源： SUNTORY、楽天市場、PR TIMES、HKTVmall｜編輯：海月

日本人票選10大最愛「肥宅快樂水」

肥宅快樂水第10位：WILKINSON碳酸水

炎炎夏日，齋飲水又口淡淡，飲汽水又好大罪惡感，反而有汽的碳酸水係一個唔錯嘅選擇！

肥宅快樂水第9位：LEMON SQUASH

LEMON SQUASH係不二家旗下嘅檸檬味汽水，又係一款相當之歷史悠久嘅國民級汽水，近年不二家嘅牛奶妹，仲推出咗LEMON SQUASH味香水！

肥宅快樂水第8位：雪碧

雪碧相信唔使多講，香港人一定非常熟悉，小編最鍾意就係檸檬味雪碧！

肥宅快樂水第7位：天然水SPARKLING

Suntory旗下嘅天然水SPARKLING，係日本人愛飲嘅三大碳酸水之一， 採用天然水同埋有機檸檬果汁製成，仲拎過唔少更獲得過獎！

肥宅快樂水第6位：CANADA DRY薑汁汽水

Canada Dry呢個品牌已經擁有過百年歷史，旗下嘅薑汁汽水係一款帶有薑汁微微辛辣，同埋碳酸兩種嘅衝擊，口味非常之醒神！

肥宅快樂水第5位；C.C Lemon

汽水應有嘅甜味與檸檬嘅酸味結合，口味清新，仲聲稱係含有相當於50個檸檬的维生素C。

肥宅快樂水第4位：可爾必思梳打

日本嘅可爾必思始創於明治41年，係相當之有歷史嘅日本飲品，本身已經夠好飲嘅乳酸口味，再加上碳酸嘅爽快感，真係無得輸！

肥宅快樂水第3位：Oronamin C

Oronamin C係日本非常之有人氣嘅即飲維他命、營養碳酸飲品，同寶礦力一樣係出自大塚制藥，官方聲稱每樽含有多種維他命，有助提升免疫力！

肥宅快樂水第2位：可口可樂

估唔到全球人都大愛嘅可口可樂止步喺第2名！可口可樂真係超人氣「肥仔水」，就算明知會致肥，都懶理照飲！

肥宅快樂水第1位：三矢梳打

呢支三矢梳打嘅包裝都幾唔起眼，喺日本便利店嘅雪櫃，見到都未必會買嚟飲。由朝日出產嘅三矢梳打始創於1884年，已經好多年嘅歷史，可以話係深入民心！