【打工仔】兩老唔信個仔可以WFH　打工仔無奈租80呎無窗工廈「扮工」

撰文：馬高斯 ｜圖片來源：《愛回家》劇照｜編輯：海月

打工仔無奈租80呎無窗工廈「扮工」

話說疫情下，好多公司實施在家工作，有位網友「培」就向Facebook專頁「辦公室日報」投稿吐苦水，佢留喺屋企工作，但係兩老又唔信佢，又唔理解WFH嘅概念。小編見到心諗真係WFH都慘變WTF。

係咪畀老細炒咗？係咪失業唔敢講？

父母質疑阿仔被公司炒，阿仔雖然多次否認，又畀父母睇公司批准同事在家工作嘅電郵，結果換嚟嘅係一句無理大鬧「唔識睇啲雞腸！叫你畀心機又唔聽，以前成日請假去旅行，而家好啦！市道唔好一定炒你呢啲懶人先。」

其實啲雞腸就係講緊，公司近日同事居住嘅大廈有人確診，所以再次需要同事在家工作直至3月。成大半個月唔使返公司，父母一定會問咩事，所以阿仔坦白講出口，點知兩老一如既往唔相信。日鬧夜鬧，日哦夜哦，有時要打畀客，已經閂埋房門，佢哋都照樣叩門，照樣係咁叫。

冇可能有老細會畀員工咁樣做嘢！

阿仔無法專心工作，叫兩老靜啲，兩老又再表示「冇可能有老細會畀員工咁樣做嘢！」，阿仔終於忍無可忍回應「你哋冇做過呢啲公司，冇遇過呢啲老細，唔代表呢個世界冇，唔係乜嘢都以你哋見過嘅嘢為標準！」。

兩老固執地認為阿仔每日掩飾已被炒嘅事實，又認為年輕一輩唔珍惜，覺得而家啲後生唔捱得，唔識得珍惜份工，放假即係對公司唔忠誠，冇盡力。結果搞到家嘈屋閉，真係夠晒黑人問號！

焗住租單位「扮工」

於是阿仔決定用2,500蚊月租一個面積只有80呎、又無窗嘅舊式工廈單位去工作。雖然工廈可以短租，但最少要租夠3個月，阿仔白白就無咗7,500蚊。仲要單位入面乜都無，佢為咗慳錢，只係簡單咁買一張摺枱同櫈仔。

而家阿仔每朝一早要「返工」出門口，放工都要教啱時間，六點夠鐘先走人，佢覺得自己好折墮。原本之前諗住新年年廿八收爐，亦變成係零喜悅，「因為我知在家工作係一個大難題，如果唔係老細落聖旨，我真係唔介意自己一個返office做嘢。」

最後崩潰大呻，「希望啲父母唔好再迫死仔女啦！未經歷過嘅嘢唔代表冇，時代唔同喇，唔好再成日講以前啦！」