【愛妻便當】激嬲老婆無好日子過！人夫開IG講寒酸便當史過萬人追蹤！
廣告
喺日本社會，大部份女士結婚之後會辭去工作，留喺屋企做賢妻良母，照顧家人嘅生活大小事。不過正所謂寧得罪小人，莫得罪女人，更何況係老婆大人！一個唔小心激到老婆大人嬲嬲豬，你都唔使有好日子過。如果想有啖好食，記住記住唔好學以下介紹嘅事主咁！
撰文：馬高斯 ｜圖片來源：鬼嫁弁当 CHANNEL｜編輯：海月
【愛妻便當】激嬲老婆無好日子過
呢位事主一家三口，同老婆、仔仔開心過每日生活，仔仔大個開始返學，老公就要外出工作養家，老婆每日就為兩人準備愛心便當。不過自從事主試過激嬲咗老婆之外，發現便當會隨住心情而唔同，對比起仔仔盒便當，簡直係天堂與地獄！於是事主瞞住老婆開設名為「鬼嫁弁当 CHANNEL」YouTube頻道，以及IG帳號分享老婆的事蹟。
正所謂「女人心，海底針」，事主每日下午放Lunch都好似玩抽獎咁，每日便當嘅飯餸都大不同！有時成盒只得白飯加小量酸菜；有時拳頭咁大嘅飯團入面加兩粒酸梅；亦都試過畀碌青瓜加支蛋黃醬你就算數。
人夫無奈表示：便當只有老婆心情好時，才會有肉有菜。如果惹老婆不高興或吵架，隔天便當就會變成一整盒「石頭便當」，有時更會附上一張「不准回來！」紙條，甚至更試過有發霉麵包。
至於仔仔嘅便當，可以話係超用心機嘅愛心便當，會好用心機自製超人或者其他卡通圖案嘅飯團，又或者豐富又好有營養嘅配菜。再睇返事主個便當，真係一念天堂一念地獄咁，由於事主嘅「愛妻便當」太過寒酸而人氣爆紅，IG吸引超過3萬人去follow！
